42
ADLIS WISS TNAYEN - IZEHHIDEN 42-72
1 I umeqqran n imeɣnajen. Axemmi n ayt n Quraḥ.
2 Am iɣayḍ n wezɣar ittmeẓri
ɣar tɣezratin n waman,
ammu uřa d uř inu
ittmeẓri ɣarek, a AREBBI.
3 Řeɛmar inu ittfada ɣar AREBBI,
ɣar Arebbi iddaren.
Meřmi i ɣa adfeɣ,
ad baneɣ zzat i wudem n AREBBI? ◘42:3 Izhd. 63:2
4 Imeṭṭawen inu
tuɣa aten d aɣrum inu
ass d ǧiřet,
umi d ayi qqaren ass imun:
“Mani iǧa AREBBI nnec?” ◘42:4 Izhd. 80:6
5 Necc ttidareɣ di man aya
u ssfarrɣeɣ řeɛmar inu dayi,
maɣar necc ttnumeɣ ggeɛɛdeɣ
deg ijj n uhimur iqqen,
am ggureɣ akidsen
ɣar Taddart n AREBBI,
s řḥess n usřiwřew d uqadi,
ijj n řɣaci ittɛeyyden.
6 A řeɛmar inu,
mayemmi tqenḍed ammu,
thekkweřed dayi?
Raja AREBBI,
maɣar ad qqimeɣ ad t qadiɣ ɛad
x isenjamen i dd-itteffɣen
zi zzat n wudem nnes. ◘42:6 Izhd. 43:5; Izhd. 42:12; 43:5
7 A AREBBI, řeɛmar inu
iqneḍ ammu dayi.
X uya ttidareɣ Cek
zi temmurt n L’Urdun,
zeg idurar n Hirmun,
zeg idurar n Miṣɛara.
8 Řḥemřet tᵉttřaɣa i řḥemřet nneɣni
ɣar zzhir n icercuren nnec,
marra řemhamed nnec
d řemwaj nnec kkin xafi.
9 Ejj SIDI ad iweṣṣa
tamexsiwt nnes icewwaren s wass,
uca ad ɣari yiři yijj n izři di ǧiřet,
aqa-t d tẓaǧit i Arebbi n tudart inu.
10 Necc ad iniɣ i Arebbi:
“Taṣḍart inu d Cek, mayemmi d ayi tᵉttud?
Mayemmi ggureɣ deg werruḍ d abarcan
zi ssibbet n ddeǧ n řeɛdu?” ◘42:10 Izhd. 35:14; 38:7; 43:2
11 Inni d ayi iḥeṣṣaren ssbehttřen ayi
s ict n tajjut ineqqen deg iɣsan inu,
umi d ayi qqaren:
“Mani iǧa AREBBI nnec?”
12 A řeɛmar inu,
mayemmi tqenḍed ammu,
thekkweřed dayi?
Raja AREBBI, maɣar ad t qadiɣ ɛad
x isenjamen i dd-itteffɣen
zi zzat n wudem inu,
u zi zzat n AREBBI inu. ◘42:12 Izhd. 42:6; Izhd. 43:5
◘42:3 42:3 Izhd. 63:2
◘42:4 42:4 Izhd. 80:6
◘42:6 42:6 Izhd. 43:5; Izhd. 42:12; 43:5
◘42:10 42:10 Izhd. 35:14; 38:7; 43:2
◘42:12 42:12 Izhd. 42:6; Izhd. 43:5