1 Iffeɣ ssenni, yusa-dd ɣar tendint nnes, uca ḍfaren t-i-dd imeḥḍaren nnes. ◘6:1 [Mt. 13:53-58; Lk. 4:16-30] — Mt. 13:53; Lk. 4:16. 2 Řami dd-tiweḍ ssebt, ibda isseřmad di temzida. Aṭṭas n yinni d as isřin, tbehten, nnan: “Zi manis dd-usint tmesřayin-a ɣar Wanita? Mana tiɣit-a i d as immewcen ařami msarent x ifassen nnes řeɛjayeb am tina? 3 Ma war iǧi Wa d anejjar, mmis n Maryam, d umas n Yaɛqub d Yusis d Yahuda d Cimɛun? Ma war ǧint suyᵉtmas da akidneɣ?” U nitni nderfen dayes. ◘6:3 Mt. 13:55; Yḥ. 6:42. 4 Maca Yasuɛ inna asen: “Anabi ɛemmarṣ war iǧi břa ccan mɣir di tendint nnes, jar řaǧ nnes u di taddart nnes.” ◘6:4 Mt. 13:57; Lk. 4:24; Yḥ. 4:44. 5 Uca Netta war izemmar ad din igg uřa d ijj n řeɛjeb, illa issars afus nnes x drus n imehřac waha uca issgenfa i-ten. ◘6:5 Mt. 13:58. 6 Tuɣa ittebhet zi tikkest n l’iman nsen. Xenni iruḥ, ittsara dcurat yudsen, isseřmad. ◘6:6 Mt. 9:35; Lk. 13:22.

7 Iřaɣa-dd i tenɛac n rrusul, ibda issekk i-ten tyuya tyuya uca iwca asen ṣṣulṭa x řaryaḥ imengas, maḥend ad ten ssuffɣen. ◘6:7 [Mt. 10:1; 5-15; Lk. 9:1-6] — Mt. 10:1; Lk. 6:13; 9:1. 8 Yumur i-ten ḥima war kessin walu deg webrid mɣir taɣɣarct waha, lla ttesṭim, lla aɣrum, lla tipyisin n nnḥas di tecyarin nsen, ◘6:8 Mt. 10:10; Lk. 9:3 9 maca iwc asen ttesriḥ maḥend ad qqnen sandaliyat, maca war yarrḍen tyuya n tcamirat. ◘6:9 Řex. 12:8. 10 Inna asen: “Mani ma tudfem ɣar ca n taddart, qqimem dayes, ař ssenni i ɣa teffɣem. 11 Ɣar marra inni war kenniw iqbiřen u war ɣarwem ttesřin, zzerzem taɛejjajt zeg iḍaren nwem d cchadet i nitni. S tidett, Necc ad awem iniɣ, ad yiři řḥař ihwen i temmurt n Sadum d Ɛamurra deg wass n lḥisab zi tendint nni.” ◘6:11 Mt. 10:14, 15; Lk. 9:5; 10:12; Řex. 13:51; 18:6 12 Uca ruḥen, barrḥen ḥima ad tuben. 13 Ssuffɣen aṭṭas n ccwaṭen, dehnen imehřac aṭṭas s zzect uca ssgenfan ten. ◘6:13 Yaɛ. 5:14.

14 Isřa xas ujeǧid Hirudus, minzi Isem nnes idweř icneɛ, inna: “Aqa Yuḥanna Amseɣḍaṣ ittwassnekkar-dd zi taddart n imettinen, s uyenni ttwaggent zzayes řeɛjayeb nni.” ◘6:14 [Mt. 14:1-12; Lk. 9:7-9] — Mt. 14:1; Lk. 9:7. 15 Inneɣni nnan: “Aqa-t d Iliya!”, u inneɣni nnan ɛawed: “Aqa-t d nnabi am yijjen zeg inabiyyen!” ◘6:15 Mt. 16:14; Mk. 8:28; Lk. 9:8, 19 16 Řami isřa Hirudus man aya, inna: “Wa d Yuḥanna wenni umi qesseɣ azeǧif, aqa netta ittwassnekkar-dd zi taddart n imettinen.” 17 Minzi Hirudus simant nnes, tuɣa issekk-dd ɣares uca iḥebbes Yuḥanna, icarf i-t di řeḥbes x ssibbet n Hirudiyya, tamɣart n umas Filippus, tenni i-k-d imřec Hirudus. ◼6:17 afessar - Hirudus tuɣa d ařwes n Hirudiyya, tamɣart n umas Filippus.  ◘6:17 Mt. 14:3; Lk. 3:19; 9:9. 18 Minzi Yuḥanna tuɣa iqqar i Hirudus: “War d ac iḥeǧeř ad ɣarek tiři temɣart n umac.” ◘6:18 Lawi 18:16; 20:21. 19 S uyenni tuɣa Hirudiyya tenḍar dayes tiṭṭawin uca tarezzu ad t tneɣ, maca war tzemmar, 20 minzi Hirudus tuɣa itteggʷed zi Yuḥanna, issen belli netta d aryaz d amseggad d amqeddas u iḥeṭṭa xas. Isřa zzayes aṭṭas n tmesřayin, x min tuɣa ittegg, uca ifarḥ ad as iseř. ◘6:20 Mt. 14:5; 21:26.

21 Deg ijj n wass ittwassnen igga Hirudus ict n zzardet deg wass n třařit nnes i řḥukkam nnes i ɣarsen řemɣaret aṭṭas, i arruyas x wařef n řɛeskar u i imeqqranen n Ljalil. ◘6:21 Amz. 40:20; Mt. 14:6. 22 Uca tudef-dd yeǧis n Hirudiyya, tecḍeḥ, teɛjeb as i Hirudus d yinni iqqimen akides. Xenni inna as ujeǧid i tḥenjirt: “Ttar zzayi marra min texsed, ad am t wceɣ!” 23 Ijjuǧ as: “Mecḥař ma zzayi i ɣa tᵉttared, ad am t wceɣ, waxxa ař azyen n tgeldit inu!” ◘6:23 Řqḍ. 11:30; Ist. 7:2 24 Teffeɣ-dd nettat, tenna i yemmas: “Min d as i ɣa ttareɣ?” Tenna as tanita: “Azeǧif n Yuḥanna Amseɣḍaṣ.” 25 Tudef deɣya s tazřa ɣar ujeǧid, tenna as: “Xseɣ ad ayi dd-tessarsed di tsaɛɛet-a azeǧif n Yuḥanna x ijj n ṭṭebṣi.” 26 Icḍen ujeǧid aṭṭas, maca x ssibbet n tjaǧit u x ssibbet n inewjiwen i iqqimen ɣar ṭṭabřa, war ixs ad tt iqemmeɛ, 27 u řexdenni issekk ujeǧid ijj n uɛessas ɣar řeḥbes s ssif, yumur ḥima ad dd-yawi azeǧif n Yuḥanna. Wanita iruḥ, iqess as azeǧif i Yuḥanna di řeḥbes. ◘6:27 Mt. 14:10. 28 Xas uca yiwi-dd azeǧif nnes x ṭṭebṣi, iwca as t i tḥenjirt u taḥenjirt tewc as t i yemmas. 29 Řami sřin imeḥḍaren nnes man aya, usin-dd, ksin řxecbet nnes, ssarsen tt deg wenḍeř.

30 Munen rrusul ɛawed ɣar Yasuɛ, xebbaren t x kuřci, x min ggin d x min tuɣa sseřmaden. ◼6:30 rrusul - niɣ ‘imazanen’.  ◘6:30 [Mt. 14:13-21; Lk. 9:10-17; Yḥ. 6:1-14] — Lk. 9:10. 31 Inna asen: “Asem-dd, ejj aneɣ ad nraḥ weḥḥedneɣ ɣar ijj n wemcan ixřan, ḥima ad tareyyḥem cwayt!” Minzi tuɣa din aṭṭas n yinni dd-yusin d n yinni iruḥen, ařami war iwiḍen ad ccen. ◘6:31 Mk. 3:20. 32 Xenni ruḥen weḥḥedsen di tɣarrabut ɣar ijj n wemcan ixřan. ◘6:32 Mt. 14:13; Lk. 9:10; Yḥ. 6:1. 33 Maca řɣaci iẓra i-ten ffɣen-dd di tɣarrabut uca aṭṭas i-t ɛeqřen. Uca izwaren as am ttazzřen x iḍaren ɣar dinni zi marra tineddam.

34 Umi dd-iḍra Yasuɛ, iẓra aṭṭas n řɣaci, zziǧzen as, minzi tuɣa aten am wuǧi břa ameksaw. Xenni ibda ad ten isseřmed aṭṭas. ◘6:34 Irm. 23:1; Ḥiz. 34:2; Mt. 9:36; 14:4; Lk. 9:11.

35 Rami iruḥ wass ad iqḍa, qarrben-dd ɣares imeḥḍaren nnes, nnan as: “Amcan-a ixřa u řweqt teɛdu. ◘6:35 Mt. 14:15; Lk. 9:12; Yḥ. 6:5. 36 Sekk i-ten ḥima ad raḥen ɣar řeɛraṣiyyat u ɣar dcurat yudsen, ḥima ad sɣen aɣrum i yixef nsen, minzi war ɣarsen min ɣa ccen.” 37 Maca Netta inna asen: “Wcem asen kenniw min ɣa ccen!” Nnan as: “Ma ad nraḥ maḥend ad asen nseɣ aɣrum s mitayen dinar uca ad asen newc min ɣa ccen?” 38 Inna asen: “Ruḥem, xzarem mecḥař n tecnifin i ɣarwem danita!” Umi argben, nnan as: “Xemsa n tecnifin n weɣrum d tnayen n iseřman.” ◘6:38 Mt. 14:17; Mk. 8:5; Lk. 9:13; Yḥ. 6:9.

39 Yumur i-ten ad ten ssɣimen marra di tɛurricin x arbiɛ aziza. 40 Uca qqimen di tɛurricin n mya u di tɛurricin n xemsin. 41 Umi iksi Yeccu xemsa n tecnifin d tnayen n iseřman nni, issgeɛɛed tamuɣři nnes ɣar ujenna, ibarek uca yarẓa ticnifin, iwca i-tent i imeḥḍaren nnes, ḥima ad tent ssarsen zzatsen. Ammu i farqen nitni ɛawed tnayen n iseřman i marra. 42 Ccin marra, jjiwnen. 43 Xenni řeqḍen iřeqqʷaz iceṭṭen, ccuren tenɛac n tsuǧatin, uřa d iseřman iceṭṭen. 44 Inni iccin zi tecnifin tuɣa aten di xemsa-ařaf n yeryazen.

45 Řexdenni iziyyar x imeḥḍaren nnes maḥend ad adfen ɣar tɣarrabut, ad as izwaren ɣar ujemmaḍ, ɣar Bayt-Ṣayda am isqad Netta řɣaci. ◘6:45 [Mt. 14:22-33; Yḥ. 6:16-21] — Mt. 14:22; Yḥ. 6:17. 46 Uca awarni řami ten isqad, iruḥ ɣar wedrar ḥima ad iẓẓaǧ. ◘6:46 Mt. 14:23; Lk. 6:12. 47 Řami dd-tewḍa tmeddit tuɣa taɣarrabut di řbuɣaz uca Netta tuɣa weḥḥdes x řbarr. ◘6:47 Mt. 14:23; Yḥ. 6:16. 48 Iẓra belli nitni ttemqetmaren s uqeddef n tɣarrabut, minzi asemmiḍ yusa asen-dd deg uɣembub. Ɣar ḥeṭṭu wiss arebɛa n ǧiřet yusa-dd ɣarsen Yasuɛ, iggur x wawan n řebḥar, uca tuɣa ixs ad ten iɛdu. 49 Umi t ẓrin iggur di řebḥar, ittɣiř asen d řexyař aɣeddar uca sɣuyen, ◘6:49 Mt. 50 minzi marra ẓrin t uca nnxeřɛen. Řexdenni issiweř akidsen, inna asen: “Ggem uř! Aqa d NECC, war teggʷedem ca!” 51 Inyi-dd ɣarsen di tɣarrabut uca yarsa usemmiḍ. Tuɣa nitni ttbehten, arewwɛen aṭṭas deg yixef nsen, 52 minzi war fhimen walu i lmuɛjiza n tecnifin, minzi uř nsen tuɣa iqseḥ.

53 Awarni řami ẓwan ɣar ujemmaḍ, usin-dd ɣar temmurt n Jinnisaret. ◘6:53 [Mt. 14:34-36] — Mt. 14:3. 54 Umi dd-ffɣen zi tɣarrabut, ɛeqřen t iwdan deɣya. 55 Uzzřen ɣar marra jjwayeh nni uca bdan ad dd-awyen inni tuɣa iheřcen aṭṭas di tassut ɣar wemcan mani sřin aqa-t Netta. 56 Mani ma dd-yusa, di tendint niɣ di ředcur niɣ di řeɛraṣiyyat, ssrusan as-dd imehřac deg ibriden uca ttzawagen t ad asen ismeḥ ad ḥadan mɣir abeḥřuř n ujeǧab nnes, u marra inni t iḥadan, ggenfan.