1 Cek xenni, a mmi, iři tmeḥḥḍed di arḍa nni iǧan di Yasuɛ Lmasiḥ, 2 u min zzayi tesřid zzat i waṭṭas n řechud, wekkeř i-t i iwdan imtiqqan, inni izemmaren ad ssřemden ɛawed inneɣni. ◘2:2 Tit. 1:5.

3 Arbu řɣar ak-d inneɣni am yijj n uɛeskari icnan n Yasuɛ Lmasiḥ. 4 War din uřa d ijj n uɛeskari iřehha ak-d řeswaq n tudart. Ittxeṣṣa as ad yarḍa wenni t iggin d aɛeskari waha. ◘2:4 1 Kur. 9:25. 5 Uca ɛawed wenni ittemḥizwaren am bu-umḥizwar, war d as tticen ttaj mařa war immniɣ ɛlaḥsab řqanun. 6 Afeǧaḥ i itteggen řxedmet iqesḥen, ittxeṣṣa as ad iksi d amezwar zi řɣiǧet. ◘2:6 1 Kur. 9:10.

7 Xarreṣ di min d ac qqareɣ. Ad ac iwc Siditneɣ řefhamet di kuřci. 8 Ɛqeř řebda belli Yasuɛ Lmasiḥ, wenni dd-ittwassnekkaren zi taddart n imettinen, aqa-t zi zzariɛet n Dawud ɛlaḥsab L’Injil inu, 9 Řexbar Aṣebḥan nni xef ksiɣ tuɛeffna, ɛad ssnaseř axmi ǧiɣ necc d ijj n uɛeffan! Maca awař n AREBBI war izemmar ad ittwaqqen s ssnaseř. ◘2:9 Afa. 3:1, 13; 4:1; Fil. 1:7; Kul. 1:24; 4:3, 18; 2 Tim. 1:8. 10 S uyenni ttḥemřeɣ marra di ṭṭweɛ n yinni ittwafarzen, ḥima ad afen uřa d nitni Tudart di Yasuɛ Lmasiḥ ak-d uɛuǧi ittduman. 11 Wa d awař dayes řaman, minzi mařa nemmut akides, ad kis neddar ɛawed, ◘2:11 Rum. 6:8. 12 u mařa nṣebbar, ad kis neḥkem ɛawed am ijeǧiden, maca mařa nenkar i-t, Netta ad aneɣ inkar ɛawed. ◘2:12 Mt. 10:33; Mk. 8:38; Lk. 9:26; 12:9; Rum. 8:17; 2 Kur. 4:10; Fil. 3:10; 1 Bṭ. 4:13. 13 Mařa war dayes nettiqq, aqa Netta ittɣima d amtiqqi, minzi war izemmar ad inkar Ixef nnes. ◘2:13 Řxř. 23:19; Rum. 3:3; 9:6.

14 Seɛqeř asen man aya, ɛřem asen zzat i Siditneɣ maḥend war ttmenɣin ca s wawařen war ineffɛen, inni dd ɣa yawyen areddeǧ x yinni ittṣennaten. 15 Ḥḍa ixef nnec, maḥend ad tarred ixef nnec am tkemřed zzat i AREBBI, am uxeddam nni war ɣares min zi ɣa iseḍḥa, wenni ittbarrḥen nican awař n tidett.

16 Aggʷej x wawařen ixwan i war ineffɛen, minzi nitni ad arnin aṭṭas di řeqjaḥet n yinni iceɣřen ixef nsen ak-d man aya. ◘2:16 1 Tim. 1:4; 4:7; 6:20; Tit. 1:14; 3:9. 17 Awař nsen ad ittwaɣiyyez am uxsas. Aqa Himiniyus d ijjen zzaysen u Filitus d ijjen nneɣni. 18 Nitni ffɣen zeg webrid n tidett, qqaren belli tanukra aqa temsar, uca qeřben l’iman n ca.

19 Maca dsas n AREBBI ibedd nican uca wa d acemmiɛ nnes: “SIDI issen inni iǧan nnes!”, uca” ‘Ejj marra inni ittřaɣan x SIDI ad aggʷejen x řmuɛṣiyyet.” ◘2:19 Řxř. 16:5; Ica. 52:11; Yḥ. 10:14.

20 Maca di taddart tameqqrant war dayes řeqcuɛ n wureɣ d nnuqart waha, maca ɛawed n ukeccuḍ d třaxt, ca zzaysen n ccan u ca n ubehdeř. ◘2:20 Rum. 9:21. 21 Xenni mařa issizdeg ḥed ixef nnes zi ddegga, ad yiři d ict n řqecɛet n ccan, tᵉttwaqeddes i teǧa uca tedweř tneffeɛ i Sides, aqa tᵉttwassewjed i marra řexdayem iṣebḥen.

22 Arweř zi marra nnecwat n temẓi uca ardef tasegda d l’iman d tayri d řehna ak-d yinni ittřaɣan x Siditneɣ zeg wuř izdig. ◘2:22 1 Tim. 6:11. 23 Beɛɛed x imḥarwaḍen ibuhařiyyen i war iǧin i řebni, maɣar tessned aqa neddhen ɣar imcubbac. ◘2:23 1 Tim. 1:4; 6:4; Tit. 3:9. 24 War icuwwar i umsexxar n Siditneɣ ad imcubbec, maca icuwwar as ad yuyur s temhint ak-d marra, issen ad isseřmed, aqa ɣares ttasiɛ n řxaḍar, ◘2:24 1 Tim. 3:2. 25 maḥend ad isseřmed s temhint inni t ittɛekkasen. Ad taɣ AREBBI ad asen iwc ad tuben ad ssnen tidett, ◘2:25 Gal. 6:1. 26 uca ad dd asen-yarr řbař, ad nfekken zi řfex n cciṭan, wenni i-ten iḥebbsen i tizi nnes.