1 Wa d awař dayes řaman: mařa ixs ḥed ad yiři d amɣar, aqa ittmeẓri deg ict n řxedmet tecna. 2 Maca ittxeṣṣa i umɣar ad itwaf břa řɛib, ad yiři d aryaz n ict n temɣart, ɣares amekken n nnefs, ad yiři d asexxay, ad igg s usettef, ad yareḥḥeb s inewjiwen, izemmar ad isseřmed. ◘3:2 2 Tim. 2:24; Tit. 1:6. 3 Netta war ittiři d amescar niɣ iwwet deɣya s ufus nnes, maca ad yiři d amwaḍeɛ, war ittemcubbuc, war ittiři d aqezzaz. 4 Aqa netta isseggur taddart nnes mliḥ uca iḥekkem x iḥenjiren nnes s marra řeṣfayet. 5 Maca mařa netta war izemmar ad issuyur taddart nnes, mammec ɣa igg ad iḥḍa tamesmunt n AREBBI? 6 War ittiři d ameḥḍar n jdid di l’iman, ḥima war ittuff s řefyuc uca ad iwḍa di ccreɛ n cciṭan. 7 Ɛawed ittxeṣṣa ad ɣares tiři ṣṣumɛet tecna ɣar yinni di barra, ḥima war xas ttɛeyyiben uca war iweṭṭi ca di řefxux n cciṭan.

8 Ittxeṣṣa ɛawed i imsexxaren di tmesmunt ad iřin d imezdagen, war ssiwiřen ca s tnayen n iřsawen, war xezzaren ca ɣar binu aṭṭas, war ḍemmɛen di arrbeḥ war iḥřin. ◘3:8 Řex. 6:3. 9 Ittxeṣṣa asen ad ṭṭfen di ssirr n l’iman s tnefsect teṣfa. ◘3:9 1 Tim. 1:19. 10 Ejj i-ten ad ttwaqeǧben d amezwaru, řexdenni, mařa iban-dd war daysen ittiři bu řɛib, ad sexxaren. 11 Ammu ittxeṣṣa uřa i timɣarin ad arsint s tsexxayt, ad ḥḍant di řeɛquř nsent, ad daysent tiři řmanet di marra, war d ttiřint d timceqqafin. 12 Ittxeṣṣa i imsexxaren di tmesmunt, aqa kuř ijjen zzaysen ad yiři s ict n temɣart, uca ittxesṣa as ad issuyur mliḥ iḥenjiren nnes d taddart nnes. 13 Minzi inni itteggen taseyyart nsen mliḥ, ad ṭṭfen i yixef nsen ijj n wemcan icna d waṭṭas n teryast di l’iman n Yasuɛ Lmasiḥ. ◘3:13 Mt. 25:21.

14 Uriɣ ac-dd man aya uca ssitimeɣ ad ɣarek dd-aseɣ deɣya. 15 Maca mařa ɛeṭṭařeɣ xak, ad tessned mammec ittxeṣṣa ad nuyur di taddart n AREBBI, tenni iǧan d Tamesmunt n AREBBI iddaren, apilar d dsas n tidett. ◘3:15 Afa. 2:19; Ɛbr. 10:21; 1 Bṭ. 4:17 16 Ssirr wanita n tsegda d ameqqran s tidett!

“D Wenni ittwassargben di ddat,

ittwaseggden di Arruḥ,

iḍḥaren-dd i lmalakat,

ittwabarrḥen zzayes jar řegnus,

d Wenni zzayes yumnen di ddunect,

immeksin deg uɛuǧi.” ◘3:16 Mk. 16:19; Lk. 9:51; Yḥ. 1:14; Řex. 1:2; Afa. 3:5, 6.