6
Řixḍaret n sebɛa imsexxaren n řmuminin
1 Deg wussan nni, řami tuɣa ktaren imeḥḍaren aṭṭas, aqa imeḥḍaren inni ɣarsen iřes n Iyunaniyyen ɛeksen inni ɣarsen iřes n Tɛibranit minzi tijjař nsen farrḍen daysent di tsexxart n zzad n kuř ass. 2 S uya řaɣan tenɛac n rrusul x marra agraw n imeḥḍaren maḥend ad munen, nnan asen: “War iɛeddeř ad nsexxar ṭṭwabeř i macca am nᵉttejja deg Wawař n AREBBI. ◘6:2 Uf. 18:17. 3 Arzum xenni, a aytma, u xḍarem sebɛa n yeryazen zzaywem inni ɣar teǧa cchadet tecna, ccuren s Arruḥ n SIDI d tiɣit, uca neccin ad ten nkellef xenni s tmesřact-a. ◘6:3 Aɛwd. 1:13; Řex. 1:21; 16:2; 1 Tim. 3:7. 4 Maca neccin ad neṣbar di tẓaǧit u di tsexxart n Wawař.” 5 Iɛjeb wawař-a i marra řɣaci uca nitni ixḍaren Stifanus, ijj n weryaz iccuren s l’iman d Arruḥ Iqeddsen, xenni Filippus d Pruxurus d Nikanur d Timun d Parminas d Nikulas, ijj n umɛacar n ddin n Wudayen zi Antiyuxiya. ◘6:5 Řex. 11:24; 21:8. 6 Ssbedden ten qibač i rrusul uca, awarni řami ẓẓuǧen, ssarsen xasen ifassen nsen. ◘6:6 Řex. 1:23; 8:17; 13:3; 1 Tim. 4:14; 5:22; 2 Tim. 1:6.
7 Tuɣa Awař n AREBBI iggam u řqedd n imeḥḍaren di Urcalim tuɣa imeqqar aṭṭas. Ijj n ubarru d ameqqran n Wudayen iṭaɛ i l’iman. ◘6:7 Řex. 19:20.
Uḍuf n Stifanus
8 Stifanus, iccur s arḍa d jjehd, tuɣa ittegg řeɛřamat d řeɛjayeb mɣarent jar řgens. 9 Kkaren yeryazen zi temzida umi qqaren ‘Alibertinu’, iryazen zi Qayrawan d Iskandariyya, uřa zi Kilikiya d Asiya, uca nitni tuɣa ttqacaḥen Stifanus. ◼6:9 Alibertinu - iwdan qqaren belli Ilibirtiniyyen d ca n Israiliyyen i tuɣa ḥebbsen-ten Irumaniyyen iwyen ten ɣar tendint n Ruma. Menbaɛd ḍeȓqen-asen-dd, ssufɣen-ten zi Ruma, uca ɛeqben-dd ɣar Israil d imucan nneɣni. (Řex. 6:9). 10 Maca war zemmaren ad ɛeksen tiɣit d Arruḥ i zzayes tuɣa issawař. ◘6:10 Uf. 4:12; Ica. 54:17; Lk. 21:15. 11 Řexdenni ssekken iryazen, ɛarrnen ten maḥend ad inin: “Aqa nesřa asen ssawařen s wawařen iceqqfen di Musa u di AREBBI!” ◘6:11 Mt. 26:59. 12 Aqa ssɣewwɣen řgens d imɣaren n řgens d imseřmaden n idlisen uca umi xas dd-dduqqzen, ṭṭfen t, nedhen t ɣar Jmaɛet Tameqqrant. 13 Ggin řechud issxarriqen, inni innan: “Bnadem-a war issbeddi ad iceqqef di Ccariɛa u deg wemcan-a iqeddsen, 14 minzi nesřa as iqqar belli Yasuɛ Nnaṣiri wanita ad yareddeǧ amcan-a, ad ibeddeř ṭṭbayeɛ i d aneɣ iwca Musa.”
15 Marra inni tuɣa ɣar iǧa řkursi di Jmaɛet Tameqqrant, ḥekkaren dayes u ẓrin aɣembub nnes am uɣembub n ijj n lmalak.
◘6:3 6:3 Aɛwd. 1:13; Řex. 1:21; 16:2; 1 Tim. 3:7.
◘6:5 6:5 Řex. 11:24; 21:8.
◘6:6 6:6 Řex. 1:23; 8:17; 13:3; 1 Tim. 4:14; 5:22; 2 Tim. 1:6.
◘6:7 6:7 Řex. 19:20.
◼6:9 6:9 Alibertinu - iwdan qqaren belli Ilibirtiniyyen d ca n Israiliyyen i tuɣa ḥebbsen-ten Irumaniyyen iwyen ten ɣar tendint n Ruma. Menbaɛd ḍeȓqen-asen-dd, ssufɣen-ten zi Ruma, uca ɛeqben-dd ɣar Israil d imucan nneɣni. (Řex. 6:9).
◘6:10 6:10 Uf. 4:12; Ica. 54:17; Lk. 21:15.