1 Isřa Yitrun, akehhan n Midyan, aḍeggʷař n Musa, marra min igga AREBBI ak-d Musa u ak-d řgens nnes Israil, aqa issuffeɣ-dd SIDI Israil zi Miṣra. ◘18:1 Uf. 2:16; 3:1 2 Iṭṭef Yitrun, aḍeggʷař n Musa, Ṣaffura, tamɣart n Musa, awarni řami d as iwca tirzifin nnes n tesřit, 3 uřa d tnayen n iḥenjiren nnes, ijjen qqaren as Jarcum, minzi tuɣa inna: “Tuɣa ayi d abarrani di temmurt d tabarranect!”, ◘18:3 Uf. 2:22 4 u wenneɣni qqaren as Aliɛazir, minzi tuɣa inna: “AREBBI n baba iɛawen ayi uca ifekk ayi zi ssif n firɛun.” 5 Yitrun aḍeggʷař n Musa, ak-d iḥenjiren nnes d tmeṭṭut nnes, iwḍen ɣar Musa di řexřa, ɣar mani iwta iqiḍan, ɣar wedrar n AREBBI. 6 Uca netta ijja ad inin i Musa: “Necc, aḍeggʷař nnec Yitrun, usiɣ-dd ɣarek s temɣart nnec d tnayen n iḥenjiren nnes akides.” 7 Xenni iffeɣ Musa ad iřqa aḍeggʷař nnes, ibendeq uca issudem i-t. Ijjen isseqsa wenneɣni x umeddur nnes uca udfen ɣar uqiḍun. 8 Musa iḥaja i uḍeggʷař nnes marra min igga SIDI ak-d firɛun u ak-d Imiṣriyyen di ṭṭweɛ n Israil u x marra tamara nni xasen ikkin deg webrid d mammec ten ifekk SIDI. 9 Ifarḥ Yitrun zi marra řxir nni igga SIDI i Israil, umi t ifekk zeg ufus n Imiṣriyyen. 10 Inna Yitrun: “Ad ittwabarek SIDI d wenni kenniw ifekken zeg ufus n Imiṣriyyen u zeg ufus n firɛun, d wenni ifekken řgens zeg ufus n Imiṣriyyen! 11 Řexxu ssneɣ belli SIDI imɣar aṭṭas x marra irebbiten, aqa di tmesřact nni dessaren xasen.” ◘18:11 Uf. 1:10, 16, 22; 5:7; 14:18 12 Xenni iksi Yitrun, aḍeggʷař n Musa, taɣarṣt n wecmaḍ d tiɣarṣa i AREBBI uca yusa-dd Harun jmiɛ ak-d marra imɣaren n ayt n Israil, maḥend ad yecc aɣrum jmiɛ ak-d uḍeggʷař n Musa zzat i wudem n AREBBI.

13 Tiwecca nnes tuɣa Musa ittɣima x řkursi, maḥend ad iḥkem řgens. Tuɣa řgens ibedd zzat i Musa zi ṣṣbeḥ zic ař ǧiřet. 14 Iẓra uḍeggʷař n Musa marra min tuɣa ittegg Musa i řgens, inna: “Manawaya i teggid cek i řgens? Mayemmi tᵉttɣimid cek weḥḥdek u marra řgens ibedd zzatek zi ṣṣbeḥ zic ař ǧiřet?” 15 Yarra-dd Musa x uḍeggʷař nnes: “Minzi řgens ittas-dd ɣari ḥima ad ittar ccwar n AREBBI. 16 X minni ɣarsen tᵉttiři ca n tmesřact, ttasen-dd ɣari s man aya uca necc ad carrɛeɣ jar ijj d wenneɣni, ssecaneɣ asen tiweṣṣa d izerfan n AREBBI.” 17 Řexdenni inna as uḍeggʷař n Musa: “Min teggid war iǧi ca mliḥ. 18 Ammu i ɣa taḥřed aṭṭas, cek d řgens-a i kik iǧan, minzi man aya idqeř xak aṭṭas, war d as tzemmared ad t tegged weḥḥdek. 19 Seř řexxu i wawař inu, necc ad cek neṣḥeɣ uca AREBBI ad kik yiři. Iři cek d aweṣṣay x řgens zzat i AREBBI uca qeddem ddɛawi zzat i AREBBI. 20 Scen asen tiweṣṣa d izerfan uca scen asen abrid i ten ittxeṣṣan ad uyuren u řxedmet i d asen ittxeṣṣan ad tt ggen. 21 Ɛawed xzar cek, ad tarzud jar marra řgens x iryazen izeɛɛamen, inni itteggʷeden AREBBI, iryazen iṣdiqen, inni icarrhen tarezzut x arbeḥ. Egg i-ten d imeqqranen x wařef, d imeqqranen x mya, d imeqqranen x xemsin d imeqqranen x ɛecra. 22 Ejj i-ten ad carrɛen jar řgens řebda. Ejj i-ten ad qeddmen marra ddɛawi iwɛaren zzatek, maca marra ddɛawi timeẓyanin ad xasent carrɛen s yixef nsen. Egg i-t tefsus x yixef nnec uca ejj i-ten ad tt arbun akidek. 23 Mařa teggid aya, u AREBBI i cek yumuren, tzemmared ad teqqimed tbedded uca marra řgens aya ad yaweḍ ɛawed di řehna ɣar wemcan i d asen ittwagg.”

24 Isřa Musa ɣar wawař n uḍeggʷař nnes, igga marra min d as inna. ◘18:24 Aɛwd. 1:9 25 Ixḍar Musa iryazen izeɛɛamen zi marra Israil uca igga i-ten d izeǧifen x řgens: imeqqranen x wařef, imeqqranen x mya, imeqqranen x xemsin d imeqqranen x ɛecra. 26 Uca nitni tuɣa ttcarrɛen řgens řebda uca ddɛawi iwɛaren qedmen tent ɣar Musa, maca marra ddɛawi timeẓyanin carrɛen tent s yixef nsen. 27 Iqebbeḍ Musa aḍeggʷař nnes uca iɛqeb netta ɣar temmurt nnes.