1 Ina d ismawen n ayt n Israil i dd-yiwḍen ak-d Yaɛqub ɣar Miṣra. Yusa-dd kuř ijj zzaysen ak-d aytbab n taddart nnes: ◼1:1 Israil - wanita d isem n jdid i Yaɛqub. Xzar Amz. 32:29.  ◘1:1 Amz. 46:8; Uf. 6:14. 2 Rubin, Cimɛun, Lawi d Yahuda, ◼1:2 afessar n řmeɛna n ismawen n ayt n Israil - xzar Amz. 49. 3 Issakar, Zabulun d Binyamin, 4 Dan d Naftali, Jad d Acir. 5 Marra řeɛmur nni dd-iffɣen zi tmeṣṣaḍt n Yaɛqub, tuɣa aten di sebɛin. Yusuf tuɣa-t di Miṣra. ◘1:5 Amz. 46:27; Aɛwd. 10:22; Řex. 7:14. 6 Immut Yusuf d marra aytmas, d jjiř nni marra. 7 Mmarenyen ayt n Israil u jjin-dd řɣiǧet ařami zzaysen tesfuffi temmurt uca ttwaktaren uca dewřen jehden aṭṭas, minzi teccur zzaysen temmurt. ◘1:7 Aɛwd. 26:5; Řex. 7:17

8 Iffeɣ-dd xenni ijj n ujeǧid d jdid iḥekkem x Miṣra, wenni tuɣa war issin Yusuf. ◘1:8 Řex. 7:18 9 Inna i řgens nnes: “Xzar, řgens n ayt n Israil imɣar u ijhed xaneɣ. 10 Řexxu, aqa ad xas neḥkem s řeɛqeř, ḥima war ittmarni řgens ktar, uca, mařa imsar ikkar ca n řbaruḍ, ad idweř ak-d řɛedyan nneɣ, ad yegg řḥarb akidneɣ uca xenni ad iffeɣ zi temmurt.” ◘1:10 Řex. 7:19 11 Nitni ggin xasen imeḥḍayen x warbar n tesmuɣi, ḥima ad ssdeǧen řgens s ddquřat i xasen ssarebbun. Bnan i firɛun, ajeǧid, tineddam n řexzen: Fitum d Raɛamsis. 12 Maca mecḥař ma deǧen nitni řgens, amenni i igma u ibezzeɛ řgens, ařami iwḍen nitni ad carhen ayt n Israil aṭṭas. ◘1:12 Izhd. 105:24 13 Uca arrin Imiṣriyyen ayt n Israil d isemɣan s uɣiř 14 uca ssarezgen tudart nsen s tesmuɣi iqesḥen deg ubeǧaɛ d llajur uřa di marra tesmuɣi deg iyyaren. Marra tasmuɣi i ggin nitni di řwest nsen, tuɣa tt s uɣiř. ◼1:14 tasmuɣi - ‘řxedmet n isemɣan’.

15 Issiweř ujeǧiḍ n Miṣra ak-d řqabřat tiɛibraniyyin, icten zzaysent qqaren as Sifra, u tenneɣni qqaren as Fuɛat. 16 Inna: “Xmi ɣa tɛawnent timɣarin tiɛibraniyyin ad arwent, uca ad texzarent xmi ttɣimant x iẓra maḥend ad arwent, ittxeṣṣa kennint ad nɣent aḥenjir mařa d mmis, maca mařa d yeǧis, jjent tt ad teddar!” 17 Maca řqabřat tuɣa tteggʷedent AREBBI, war ggint muxas tent yumur ujeǧid n Miṣra, maca ḥḍant tudart n iḥenjiren. 18 Xenni iřaɣa ujeǧid n Miṣra i řqabřat, inna asent: “Maɣar teggint aya, aqa teḥḍant tudart n iḥenjiren?” 19 Řqabřat arrint x firɛun: “Tiɛibraniyyin war ǧint am Timiṣriyyin, minzi nitenti jehdent, ttarwent qbeř ma ad ɣarsent dd-tas řqabřa.” 20 Uca AREBBI igga mliḥ i řqabřat uca immarni řgens, dewřen jehden s waṭṭas. 21 Minzi řqabřat ggʷedent AREBBI, imsar, aqa yarzeq i-tent-i-dd s tudrin ak-d řwacun. ◼1:21 yarzeq - s Tɛibranit ‘yegga’.

22 Řexdenni yumur firɛun marra řgens nnes, inna: “Kuř aḥenjir i dd ɣa ixeřqen ad t tenḍarem deg iɣzar u marra taḥenjirt i dd ɣa ixeřqen ad tt tejjem ad teddar.” ◘1:22 Řex. 7:19  *