1 “Xmi ɣa tadfed ɣar temmurt nni d ac ɣa iwc SIDI, AREBBI nnec, d řwart, uca ad tt tᵉṭṭfed uca ad dayes tzedɣed, 2 xenni ad teksid zi tmezwarut n kuř řɣiǧet i ɣa tessmuned zi temmurt nni d ac ɣa iwc SIDI, AREBBI nnec, ad t tegged di tsuǧet uca ad traḥed ɣar wemcan i ɣa yixḍar SIDI maḥend ad din issezdeɣ Isem nnes. ◘26:2 Uf. 23:19; 34:26; Lawi 2:14; 23:10; Řxř. 15:17 3 Uca ad dd-tased ɣar ukehhan, wenni din ɣa yiřin deg wussan nni, ad as tinid: ‘Aqa ass-a ad barrḥeɣ i SIDI, AREBBI nnec, belli aqa udfeɣ ɣar temmurt nni x ijjuǧ SIDI i řejdud nneɣ ḥima ad aneɣ tt iwc.’ 4 Uca ad iksi ukehhan tasuǧet zeg ufus nnec, ad tt issars zzat i uɛalṭar n SIDI, AREBBI nnec. 5 Ad tbarrḥed zzat i wudem n SIDI, AREBBI nnec, ad tinid: ‘Aramiyu nni tuɣa iǧan ɛřaḥař ad ifna aqa tuɣa-t d baba. Netta ihwa ɣar Miṣra uca izdeɣ din am ubarrani ak-d ijj n wuru n yeryazen waha uca iyma, idweř d ijj n řgens imɣar, ijhed u deg waṭṭas. ◘26:5 Amz. 46:1 6 Imiṣriyyen ḍeřmen u ḥṣaren aneɣ u ggin xaneɣ tasmuɣi teqseḥ. 7 Uca nesɣuy ɣar SIDI, AREBBI n řejdud nneɣ, uca isřa SIDI i tmijja nneɣ u iẓra arẓiyyet nneɣ d řeɣben nneɣ d řmeḥnet nneɣ. 8 Issuffeɣ aneɣ-dd SIDI zi Miṣra s ufus ijehden, s uɣiř isswiẓẓḍen, s timegga imɣaren issiggʷiden, s řeɛřamat u s lmuɛjizat, 9 uca issidef aneɣ ɣar wemcan-a uca iwca aneɣ tammurt-a, tammurt ifeyyḍen s uɣi d tamment. 10 Uca řexxu, xzar, iwyeɣ-dd tamezwarut n řɣiǧet n temmurt nni d ayi tewcid, a SIDI!’ Xenni ad t tegged zzat i wudem n SIDI, AREBBI nnec, ad tbendqed zzat i wudem n SIDI, AREBBI nnec. 11 Ad tfarrḥed zi marra řxař i ɣa iwc SIDI, AREBBI nnec, i cek u i aytbab n taddart nnec: cek d Ulawi d ubarrani i iǧan di řwesṭ nnec.”

12 “Xmi ɣa tkemmřed zeg uɛeccar n marra řeɛcur n řɣiǧet nnec deg useggʷas wiss třata, wenni d aseggʷas n řeɛcur, xenni ad ten tewced i Ulawi, i ubarrani, i uyujiř, i tajjač, ḥima ad ccen daxeř i tewwura nnec u ad jjiwnen. ◘26:12 Lawi 27:30; Řxř. 18:24, Aɛwd. 14:28, 29 13 Uca ad tinid zzat i wudem n SIDI, AREBBI nnec: ‘Aqa ksiɣ min iǧan iqeddsen zi taddart inu uca ɛawed wciɣ t i Ulawi, i ubarrani, i uyujiř, i tajjač, am mammec marra tiweṣṣa i d ayi tweṣṣid. Necc war ɛeddiɣ uřa x icten zi tweṣṣa nnec u war ttuɣ walu. ◘26:13 Aɛwd. 14:27 14 War zzayes cciɣ deg wecḍan inu u war zzayes ksiɣ umi xemjeɣ uřa war zzayes wciɣ i yijj n umettin. Aqa sřiɣ i tmijja n SIDI, AREBBI inu, u ggiɣ marra min d ayi tumured. 15 Xzar zi Tzeddiɣt nnec iqeddsen, zeg ujenna, ɣar swadday uca barek řgens nnec Israil d temmurt nni d aneɣ tewcid, am mammec tejjuǧed i řejdud nneɣ, tammurt nni ittfeyyḍen s uɣi d tamment.’ ” ◘26:15 Ica. 63:15

16 “SIDI, AREBBI nnec, aqa yumur i cek ass-a, ad tegged tiweṣṣa-ya d lfarayiḍ-a. Ḥḍa tent uca egg zzaysen s marra uř nnec d marra řeɛmar nnec. 17 Ass-a tennid aqa SIDI ad yiři d AREBBI nnec, ad tuyured deg ibriden nnes, ad teḥḍid tiweṣṣa d řumurat nnes d lfarayiḍ nnes uca ad tesřed i tmijja nnes. ◘26:17 Amz. 17:7 18 Uca SIDI inna ac ass-a i cek, aqa cek ad ɣares tiřid d ijj n řgens iɣřa aṭṭas, am mammec d awem inna, u ittxeṣṣa ac ad teḥḍid marra tiweṣṣa nnes, ◘26:18 Uf. 19:5; Aɛwd. 7:6; 14:2 19 ḥima Netta ad cek issuɛřa x marra řegnus i usemɣar d yisem d řɛezz, ḥima ad tiřid d ijj n řgens iqeddsen i SIDI, AREBBI nnec, am mammec tuɣa inna.” ◘26:19 Aɛwd. 4:7