1 Řami tuɣa ɣares ɣar Abram tesɛa u-tesɛin n iseggʷusa, iban as-dd SIDI i Abram, inna as: “Necc d Arebbi Amzemmar x kuřci! Uyur zzat i wudem inu uca iři d bnadem ikemmřen! ◼17:1 Amzemmar x kuřci - wenni ɣares tizemmar x marra min iǧan.  ◘17:1 Amz. 5:22. 2 Necc ad ggeɣ Řɛahd inu jar ayi d cek uca ad cek sskettareɣ s yijj n cckel imɣar.” ◘17:2 Amz. 12:2; 13:16; 15:5, 18; Uf. 2:24; 6:4; Lawi 26:42. 3 Xenni iwḍa Abram x uɣembub nnes uca issiweř AREBBI akides, inna as: 4 “Xzar, Necc ad ggeɣ Řɛahd inu akidek uca cek ad tiřid d babatsen n waṭṭas n řegnus. ◘17:4 Rum. 4:17. 5 War ittiři isem nnec ɛad ‘Abram’ maca ‘Ibrahim’, minzi Necc ggiɣ cek d babatsen n waṭṭas n řegnus. 6 Uca Necc ad cek arreɣ ad tegged řɣiǧet aṭṭas s waṭṭas u ad cek arreɣ d řegnus, uca ijeǧiden ad zzayek dd-ffɣen. ◘17:6 Mt. 1:6. 7 Ad ggeɣ Řɛahd inu jar ayi d cek d zzariɛet nnec awarni ac di marra jjiřat nsen, am yijj n Řɛahd i řebda, ḥima ad iřiɣ d AREBBI i cek u i zzariɛet nnec awarni ac. ◘17:7 Amz. 13:15. 8 Ad ac wceɣ, i cek u i zzariɛet nnec awarni ac, tammurt mani tzeddɣed am ubarrani, marra tammurt n Kenɛan d agřa i řebda. Necc ad iřiɣ d AREBBI i nitni.” ◘17:8 Amz. 15:18; Aɛwd. 1:8. 9 Inna AREBBI ɛawed i Ibrahim: “Cek ad teḥḍid Řɛahd inu, cek d zzariɛet nnec awarni ac, di marra jjiřat nsen. 10 D wa d Řɛahd inu wenni i ɣa teḥḍam jar ayi-dd d kenniw d zzariɛet nnec awarni ac: ittxeṣṣa ad ixten zzaywem marra min iǧan d awtem. 11 Kenniw ad txetnem aysum n řeɛdařyet nwem uca man aya ad tiři d řeɛřamet n Řɛahd jar ayi-dd d kenniw. ◘17:11 Řex. 7:8; Rum. 4:11. 12 Mmis n tmenya n wussan ad ixten jar awem, mkuř awtem di marra jjiřat nwem, am wenni dd-ixeřqen di taddart nnec am wenni ittwasɣen s nnuqart zi kuř abarrani u war iǧin zi zzariɛet nnec. ◘17:12 Lawi 12:3; Lk. 2:21. 13 Am wenni dd-ixeřqen di taddart nnec, am wenni tesɣid s nnuqart, ittxeṣṣa as ad ixten. Ammu i ɣa yiři Řɛahd inu deg weysum nwem d Řɛahd i řebda. 14 Aryaz war ixtinen, wenni řeɛdařyet nnes war tt xtin, aryaz nni ittxeṣṣa ad t qessen zi řgens nnes, aqa yarẓa Řɛahd inu.” ◼17:14 aryaz nni - s Tɛibranit ‘řeɛmar nni’.

15 Inna AREBBI ɛawed i Ibrahim: “I Saray tamɣart nnec war d as třiɣid ɛad ‘Saray’, maca ‘Sara’ d wa i ɣa yiřin isem nnes. ◼17:15 Saray - ad taɣ isem-a wanita ixs ad yini ‘yeǧis n ujeǧid’ (‹’amira’›), maca ɛlaḥsab inneɣni ‘tamɣart imeḥden’. Sara - isem-a wanita ixs ad yini ‘tajeǧidt’ niɣ ‘yemmatsen n řegnus’. 16 Minzi ad tt barkeɣ u zzayes ad ac wceɣ mmic. Wah, ad tt barkeɣ uca nettat ad tedweř d řegnus u ijeǧiden n řegnus ad zzayes dd-ffɣen!” 17 Xenni iwḍa Ibrahim x uɣembub nnes uca iḍḥec, inna deg wuř nnes: “Aryaz n mya n iseggʷusa ma ad as dd-ittwaxřeq mmis? U Sara, tenni ɣar iǧa tesɛin n iseggʷusa, ma ɛad ad dd-taruw?” 18 Inna Ibrahim i AREBBI: “Mři Ismaɛil iddar qibač i wudem nnec!” 19 Maca AREBBI inna: “Lla, ɛad Sara, tamɣart nnec, d tenni d ac dd ɣa yarwen aseymi, uca cek ad as třaɣid Isḥaq. Necc ad ggeɣ Řɛahd inu akides d Řɛahd i řebda, i zzariɛet nnes awarni as.◼17:19 Isḥaq - isem wanita ixs ad yini ‘netta iḍeḥḥec’.  ◘17:19 Amz. 18:10; 21:2. 20 Zi jjihet n Ismaɛil, aqa seǧeɣ ac. Xzar, Necc barkeɣ t uca ad t arreɣ ittaruw řɣiǧet u ad t arreɣ d aṭṭas. Tenɛac n řḥukkam i dd ɣa yejj, ad t ggeɣ d ijj n řgens imɣar. ◘17:20 Amz. 16:10; 25:12, 16. 21 Maca ad ggeɣ Řɛahd inu ak-d Isḥaq, wenni i d ac dd ɣa taruw Sara di řweqt-a, deg useggʷas i dd ɣa yasen.” ◘17:21 Amz. 21:2. 22 Umi ikemmeř awař nnes akides, igeɛɛed AREBBI, iggʷej x Ibrahim.

23 Iksi Ibrahim mmis Ismaɛil d marra isemɣan i dd-ittwaxeřqen di taddart nnes d marra inni immesɣen s nnuqart, marra min iǧan d awtem jar aytbab n taddart n Ibrahim uca ixten řeɛdařyet nsen deg wass nni am mammec d as inna AREBBI. 24 Tuɣa ɣar Ibrahim tesɛa u-tesɛin n iseggʷusa umi ixten deg weysum n řeɛdařyet nnes. ◼17:24 tesɛa u-tesɛin n iseggʷusa - man aya ixs ad yini belli Isḥaq ittwaxeřqed-dd umi tuɣa Ibrahim ɛad ittwaxten (Amz. 18:10-14 d 21:5), aqa-t awarni řami igga Arebbi řɛahd nnes akides (xzar Amz. 17:21). Maca Ismaɛil ittwaxřeq-dd qbeř mma igga Arebbi řɛahd nnes ak-d Ibrahim. 25 Igga mmis Ismaɛil třeṭṭac n iseggʷusa, umi t xetnen deg weysum n řeɛdařyet nnes. 26 Ixten Ibrahim d mmis Ismaɛil deg wass d ijjen. 27 Xetnen akides marra iryazen n taddart nnes, inni dd-ittwaxeřqen di taddart nnes uřa d inni immesɣen s nnuqart zeg ubarrani. ◼17:27 zeg ubarrani - s Tɛibranit ‘zi mmis n ubarrani’.