1 Iksi Ibrahim tamɣart nneɣni, qqaren as Qatura. ◼25:1 Qatura - isem wanita ixs ad yini ‘řebxur’.  ◘25:1 [1 Im. 1:28-42] 2 Netta turuw as-dd Zimran, Yaqcan, Midyan, Yicbaq d Cuḥa. ◘25:2 1 Im. 1:32. 3 Yuqcan ijja-dd Caba d Dadan. Uca arrawen n Dadan tuɣa aten d Iccuriyyen d Ilituciyyen d Iliyumiyyen. 4 Iḥenjiren n Midyan tuɣa aten d Ɛiyfa, Ɛifar, Ḥanux, Abidaɛ d Aldaɛa. Marra ina tuɣa aten d iḥenjiren n Qaṭura. 5 Ibrahim iwca marra min ɣares i Isḥaq. ◘25:5 Amz. 24:36. 6 Maca i iḥenjiren n tiyya i tuɣa ɣar Ibrahim, iwca asen Ibrahim arriɣalut uca, am t tuɣa ɛad iddar, issekk i-ten ssenni ɣar ccarq, ɣar temmurt n ccarq, issiggʷej i-ten x Isḥaq mmis. 7 Ibrahim tuɣa iddar mya u-xemsa u-sebɛin n iseggʷusa, wa d řmijař n tudart nnes. 8 Iḍřeq Ibrahim i buḥbeř nnes uca immut di ccib isegged, di tewsar d tyawant. Uca immarni ɣar řgens nnes. ◘25:8 Amz. 15:15. 9 Isḥaq d Ismaɛil, iḥenjiren nnes, neḍřen t deg ifri n Makfila deg iyyar n Ɛifrun, mmis n Ṣuḥar, Aḥitti, iyyar i iǧan qibač i Mamri. 10 Ittwanḍeř Ibrahim d temɣart nnes Sara deg iyyar nni isɣa Ibrahim zi tarwa n Ḥit.

11 Awarni i řmewt n Ibrahim ibarek AREBBI mmis Isḥaq. Uca izdeɣ Isḥaq zzat i wanu n Laḥay-Ru’i. ◼25:11 Laḥay-Ru’i - xzar Amz. 16:14.

12 Ina d imezruyen n yinni dd-ittwaxeřqen zi Ismaɛil, mmis n Ibrahim, inni dd-tejja Hajar, tayya n Sara zi Miṣra, i Ibrahim. 13 D yina d ismawen n iḥenjiren n Ismaɛil, s ismawen nsen ɛlaḥsab axřaq nsen. Amenzu n Ismaɛil tuɣa-t d Nabayut, xenni Qidar, Adbiyil, Mibsam, ◘25:13 1 Im. 1:29. 14 Misma, Duma, Massa, 15 Ḥadar, Tayma, Yaṭur, Nafic d Qidma. 16 D yina d iḥenjiren n Ismaɛil s ismawen nsen, s dcurat nsen d řmarageḥ nsen: tenɛac n řḥukkam s řaǧat nsen. 17 Tuɣa iddar Ismaɛil mya u-sebɛa u-třatin n iseggʷusa. Xenni iḍřeq Ismaɛil i buḥbeř nnes, immut uca immarni ɣar řgens nnes. 18 Nitni zeddɣen zi Ḥawila ɣar Cur, wenni iǧan arendad n Miṣra, am tᵉṭṭfed abrid ɣar Accur. Netta izdeɣ arendad n marra aytmas.

Ina d imezruyen n yinni dd-ittwaxeřqen zi Isḥaq, mmis n Ibrahim.

19 Ibrahim ijja-dd Isḥaq. 20 Tuɣa ɣar Isḥaq arebɛin n iseggʷusa umi yiwi Rifqa d tamɣart. Nettat d yeǧis n Bituwil, Aramiyu zi Faddan-Aram, učmas n Laban, Aramiyu. 21 Iḥeccem Isḥaq SIDI di ṭṭweɛ n temɣart nnes, tenni tuɣa war ittirwen ca, uca istajeb as SIDI s tẓaǧit nnes yuǧɣen, ařami teksi temɣart nnes, Rifqa, ddeyset. ◘25:21 Rum. 9:10. 22 Uca mmdeḥsen iḥenjiren deg uɛeddis nnes. Xenni tenna: “Manawya ɛawed, mayemmi d ayi ittemsar man aya?”, uca truḥ ad tesseqsa SIDI. 23 Inna as SIDI: “Aqa din tnayen n řegnus di ddeyset nnem u tnayen n ccuɛub ad mmsebḍan zi dwaxeř nnem. Ijj n cceɛb ad yiři ijhed x cceɛb nneɣni u wenni d amenzu ad ixdem i umaẓuẓ.” ◘25:23 2 Ṣm. 8:14; Rum. 9:12. 24 Ařami dd-iwḍen wussan nnes ad taru, xzar, aqa da deg uɛeddis nnes acniwen. 25 Iffeɣ-dd umezwar. Tuɣa-t d azeggʷaɣ, iceɛɛar qaɛ am yict n thiḍurt. S uyenni ggin as Ɛisu. ◼25:25 Ɛisu - isem wanita ixs ad yini ‘azeggʷaɣ’ niɣ ‘iḥḥarcuw’. 26 Awarni as iffeɣ-dd umas. Iṭṭef afus nnes deg unirz n Ɛisu. S uya semman t s yisem Yaɛqub. Tuɣa ɣar Isḥaq settin n iseggʷusa ɣar wexřaq nsen. ◘25:26 Ḥuc. 12:4.

27 Řami gman iḥenjiren, idweř Ɛisu d ijj n weryaz issen aneymar, ijj n weryaz n barra, maca Yaɛqub idweř d ijj n weryaz yarsa, wenni izeddɣen deg iqiḍan. ◼25:27 aryaz yarsa - awař Aɛibrani ixs ad yini s lḥarf ‘aryaz ikemřen’ niɣ ‘aryaz břa řɛib’, maca di ca n twařawin am řexxu nzemmar ad nini ‘aryaz amtiqqi’, niɣ ‘aryaz yarsan’. 28 Isḥaq tuɣa ittexs Ɛisu, minzi iɛjeb as ad yecc aysum n řmař n řexřa, u Rifqa tuɣa tᵉttexs Yaɛqub. 29 Uca issnenni Yaɛqub ict n macca, umi dd-iɛqeb Ɛisu zi řexřa, yuḥeř. 30 Inna Ɛisu i Yaɛqub: “Ttzawgeɣ cek ad ayi tewced ad cceɣ zeg uzeggʷaɣ, azeggʷaɣ nni diha, maɣar aqa fniɣ s ufadi.” X uya qqaren as ‘Idum’. ◼25:30 Idum - isem wanita ixs ad yini ‘azeggwaɣ’. 31 Řexdenni inna Yaɛqub: “Zenz ayi ass-a řḥeqq nnec n umenzu.” 32 Inna Ɛisu: “Xzar, aqa necc ad mmteɣ, min ɣa ggeɣ s řḥeqq n umenzu?” ◘25:32 Ica. 22:13; 1 Kur. 15:32. 33 Xenni inna Yaɛqub: “Jaǧ ayi řexxu!” Uca ijjuǧ as, izzenz i Yaɛqub řḥeqq n umenzu nnes. 34 Xas uca iwca Yaɛqub i Ɛisu aɣrum d umecři n řeɛdes, u Ɛisu icca, iswa, ikkar, iruḥ. Ammu isseḥqar Ɛisu řḥeqq n umenzu nnes.