1 Uca yarzef SIDI ɣar Sara, am mammec t inna, uca ikemmeř SIDI awař i inna i Sara. ◘21:1 Amz. 17:19; 18:10. 2 Teksi Sara s ddeyset uca turuw-dd ijj n useymi i Ibrahim x tewsar nnes, di řmijar nni i d as inna AREBBI. ◘21:2 Amz. 18:10, 14; Gal. 4:23; Ɛbr. 11:11. 3 Uca iřaɣa Ibrahim i mmis aseymi, wenni d as dd-turuw Sara, Isḥaq. 4 Ibrahim ixten i mmis Isḥaq umi tuɣa ɣares tmenya n wussan, am mammec d as yumur AREBBI. ◘21:4 Amz. 17:10. 5 Tuɣa ɣar Ibrahim mya n iseggʷusa, ařami ɣares dd-ixřeq mmis Isḥaq. 6 Tenna Sara: “Isseḍḥec ayi AREBBI u kuř ijj wenni i ɣa isřan i man aya, ad iḍḥec ɛawed akidi.” 7 Tenna ɛawed: “Man wen izeɛmen ad yini i Ibrahim, aqa Sara ad tessuṭṭeḍ iseyman? Aqa urweɣ as-dd aḥenjir x tewsar nnes!”

8 Igma useymi uca ittwakkes as uṭṭuḍ. Deg wass i d as kksen uṭṭuḍ i Isḥaq, issewjed Ibrahim ict n zzardet temɣar. 9 Umi teẓra Sara mmis n Tmiṣrect Hajar, wenni dd-turuw Hajar i Ibrahim, iqeṣṣar xas, 10 tenna i Ibrahim: “Aẓẓeř x tayya-ya d mmis, minzi mmis n tayya-ya war iwarret ca ak-d mmi, ak-d Isḥaq.” ◘21:10 Gal. 4:30. 11 Awař-a iban-dd d aɛeffan aṭṭas di tiṭṭawin n Ibrahim di ssibbet n mmis. 12 Maca inna AREBBI i Ibrahim: “War ttejji aḥenjir d tayya nnec ad iřin d tisineft di tiṭṭawin nnec. Seř ɣar marra min i d ac ɣa tini Sara, minzi di Isḥaq ad ac tiři zzariɛet. ◼21:12 zzariɛet - ixs ad yini ‘tarwa’.  ◘21:12 Rum. 9:7; Ɛbr. 11:18. 13 Ad ggeɣ ɛawed ijj n řgens zi mmis n tayya-ya, minzi uřa d netta d zzariɛet nnec.” ◘21:13 Amz. 16:10; 17:20. 14 Xenni ikkar Ibrahim zic uca iksi aɣrum d ict n tecyart n waman, iwca i-ten i Hajar, issars as ten x teɣruḍt. Iwca as ɛawed aḥenjir uca issqebbeḍ i-tt. Uca nettat truḥ, tennejru di řexřa n Bi’r-Sebɛa. 15 Řami neqṣen waman zi tecyart, tenḍar aḥenjir sadu ijj n cbarq, 16 uca truḥ teqqim qibač nnes řaggʷaj n tecti n řqews, minzi tenna: “War zemmareɣ ad ẓareɣ meřmi i ɣa immet uḥenjir.” Ammu i teqqim qibač nnes uca tessgeɛɛed tmijja nnes, tesɣuyyu. 17 Isřa AREBBI ɣar tmijja n uḥenjir uca lmalak n AREBBI iřaɣa i Hajar zeg ujenna, inna as: “Min cem yuɣin, Hajar? War tteggʷed ca, minzi AREBBI isřa řḥess n uḥenjir, din mani iǧa. 18 Kkar, sgeɛɛed aḥenjir uca ṭṭef as deg ufus nnem, minzi ad zzayes ggeɣ ijj n řgens imɣar.” ◘21:18 Amz. 16:10; 17:20. 19 Uca yarzem AREBBI tiṭṭawin nnes, teẓra řɛunṣar n waman. Truḥ, tɛemmar tacyart s waman, tewca as i uḥenjir, ad isu. 20 Tuɣa AREBBI ak-d uḥenjir, iyma, izdeɣ di řexřa u tuɣa-t d amjebbad n řqews. 21 Tuɣa izeddeɣ di řexřa n Faran uca teksi as-dd yemmas tamɣart zi temmurt n Miṣra.

22 Di řweqt nni d ict imsar, belli Abimalik ak-d Fikul, akumandar n řɛeskar nnes, issiweř ak-d Ibrahim, inna: “AREBBI aqa-t akidek di marra min tᵉttegged. ◼21:22 Fikul - isem-a wanita ixs ad yini ‘aqemmun n marra’. Aqa netta x marra iɛeskariyyen u tuɣa ittxeṣṣa ad as ṭṭaɛen di marra min yumur netta. 23 Řexxu, jaǧ ayi ɣar AREBBI, aqa war tᵉttɣeccid iḥenjiren inu uřa d ayyawen inu! Maca s muxas tamexsiwt icewwaren i kik ggiɣ qbeř, ad zzayes tegged cek akidi u ak-d temmurt mani teqqimed am ubarrani.” ◘21:23 Amz. 14:23. 24 Inna Ibrahim: “Necc ad jjaǧeɣ!” 25 Xas uca iɛeyyeb Ibrahim Abimalik x řɛunṣar n waman nni iṭṭfen zzayes imsexxaren n Abimalik s uɣiř. 26 Xenni inna Abimalik: “Necc war ssineɣ wi iggin man aya u cek war d ayi t tennid ca qbeř. Aqa ař řexxu i zzayek t sřiɣ.” 27 Iksi Ibrahim uǧi d ifunasen d tfunasin uca iwca as ten i Abimalik uca nitni s tnayen idsen ggin ijj n řɛahd jar asen. 28 Maca issars Ibrahim sebɛa n txeswin zeg wuǧi ɣar uɣezdis. 29 Xenni inna Abimalik i Ibrahim: “Min ɛnant sebɛa n txeswin nni teggid ɣar uɣezdis?” 30 Inna netta: “Ksi zeɛma sebɛa aya n txeswin zeg ifassen inu, ḥima ad iřint d cchadet di ṭṭweɛ inu belli necc i iɣzin anu-ya.” 31 X uya semman amcan nni Bi’r-Sebɛa, minzi nitni s tnayen idsen tuɣa jjuǧen din. 32 Ammu i ggin řɛahd di Bi’r-Sebɛa. Awarni man aya ikkar Abimalik ak-d Fikul, akumandar n řɛeskar nnes, iɛqeb ɣar temmurt n Ifilisṭiniyyen. 33 Iẓẓu Ibrahim ict n tcejjart n tmarist di Bi’r-Sebɛa uca iřaɣa din isem n SIDI, Arebbi n řebda. ◼21:33 tacejjart n tmarist - s tlatinit ‘Tamarix’.  ◘21:33 Amz. 4:26. 34 Izdeɣ Ibrahim am ubarrani di temmurt n Ifilisṭiniyyen aṭṭas n wussan.