1 Deg wussan n Amrafil, ajeǧid n Cinɛar, d Ariyuc, ajeǧid n Illasar, d Kidurlaɛumer, ajeǧid n Ɛilam, d Tidal, ajeǧid n řegnus, imsar belli 2 ina ggin řbaruḍ ak-d Bira, ajeǧid n Sadum u ak-d Bircaɛ, ajeǧid n Ɛamurra, u ak-d Cinab, ajeǧid n Adma, u ak-d Cim’ibar, ajeǧid n Ṣabuyim, u ak-d ujeǧid n Bilaɛ, wenni iǧan d Ṣuɣar. 3 Marra ina munen di řewḍa n teɣzurt n Siddim, aqa d Řebḥar Ameǧaḥ. ◼14:3 Řebḥar Ameǧaḥ - niɣ ‘Ill Ameǧaḥ’. 4 Tuɣa xeddmen tenɛac n iseggʷusa i Kidurlaɛumir, maca ɣar useggʷas wiss třeṭṭac ɣewwɣen. 5 Uca deg useggʷas wiss arbeɛṭac yusa-dd Kidurlaɛumir d ijeǧiden i yeǧan akides uca ɣeřben x Irafawiyyen di Actirut-Qarnaym, x Izuziyyen di Ham, x Imitiyyen di Cawa-Qaryatayim ◼14:5 Irafawiyyen - ijj n řgens n jjwaheř amecnaw Iɛanaqiyyen d Izuziyyen d Imiyyen. Isem wanita uřa d isem n marra řegnus-a inni jar asen jjwaheř.  ◘14:5 Amz. 15:20; Aɛwd. 2:10, 11. 6 u x Ixuriyyen deg idurar nsen n Saɛir ař Faran, wenni iǧan zzat i řexřa. 7 Awarni aya dewřen-dd, usin-dd ɣar Ɛayn-Micfat, wenni d Qadac, uca ɣeřben x yewdan nni izeddɣen di marra tammurt n ayt n Ɛamaliq u ɛawed x Imuriyyen inni izeddɣen di Haṣṣun-Tamar. ◼14:7 Ɛayn-Micfat - isem wanita ixs ad yini ‘anu n řḥukm’. Kades - isem wanita ixs ad yini ‘amqeddas’. Haṣṣun-Tamar - isem wanita ixs ad yini ‘azbar n tini’.

8 Xenni iffeɣ ujeǧid n Sadum d ujeǧid n Ɛamurra d ujeǧid n Adma d ujeǧid n Ṣabuyim d ujeǧid n Bilaɛ, aqa-tt d Ṣuɣar. Ruḥen nitni ɣar řewḍa n teɣzurt n Siddim, maḥend ad mmenɣen 9 ak-d Kidurlaɛumir, ajeǧid n Ɛilam d Tidɛal, ajeǧid n řegnus, d Amrafil, ajeǧid n Cinɛar, d Aryuk, ajeǧid n Illasar: arebɛa n ijeǧiden ggin řbaruḍ ak-d xemsa. ◼14:9 ajeǧid n Juyim - ixs ad yini ‘ajeǧid n řegnus’. 10 Tuɣa řewḍa n teɣzurt n Siddim teccur s wanuten n tizeft. Uca arewřen ijeǧiden n Sadum d Ɛamurra uca wḍan daysen, u inni iqqimen arewřen ɣar idurar. 11 Ksin marra agřa n Sadum d Ɛamurra d marra macca i xeznen uca uyuren. 12 Ksin ɛawed Luṭ, mmis n umas n Abram, d wagřa nnes uca ruḥen. Netta tuɣa izeddeɣ di Sadum.

13 Xenni yusa-dd ijjen zeg inni yarewřen, inna man aya i Abram, Aɛibrani, wenni tuɣa izeddɣen ɣar tcejjura n yigg n Mamri, aryaz d Amuriy, umas n Ackul d Ɛanir. Nitni d arfiqen di řɛahd n Abram. ◼14:13 Aɛibrani - tanita d twařa tamezwarut i nᵉttaf isem-a deg Wedlis Iqeddsen. Deg wedlis ‘Amezwaru’, udem 39, ayat 4 d 17 uřa deg wudem 41, ayet 21 nᵉttaf isem-a am uceyyar ɣar Yusuf u deg wedlis Amezwaru (Amz. 43:32) am ijj n uceyyar ɣar marra ihenjiren n Yaɛqub (xzar ɛawed Amz. 40:15).  ◘14:13 Amz. 13:18. 14 Řami isřa Abram belli umas ṭṭfen t d ameḥbus, yiwi iryazen inni idarrben i umenɣi, inni dd-ittwaxeřqen di taddart nnes, di teřt-mya u-tmenṭac, uca iḍfar i-ten ař Dan. 15 S ǧiret bḍan xasen nitni, ggin terfiqin, netta d imsexxaren nnes, uca iɣřeb xasen uca iḍfar i-ten ɣar tendint n Ḥuba, tenni iǧan x uzeřmaḍ n Dimacq. 16 Yarra-dd marra agřa uřa d umas Luṭ d wagřa nnes uřa d timɣarin d řgens.

17 Umi dd-iɛqeb, awarni řami iɣřeb netta x Kidurlaɛumir u x ijeǧiden nni tuɣa akides, iffeɣ ujeǧid n Sadum ḥima ad t iřqa di Řewḍa n Teɣzurt n Cawa, tenni iǧan d Taɣzurt n Ujeǧid. 18 U Malkiṣadiq, ajeǧid n Calim, yiwi-dd aɣrum d binu. Netta tuɣa d akehhan n Arebbi, Amɛuǧi x kuřci. ◼14:18 Malkiṣadiq - isem wanita ixs ad yini ‘ajeǧid amsegged’ niɣ ‘ajeǧid d amtiqqi’.  ◘14:18 Ɛbr. 7:1, 2, 3. 19 Ibark i-t, inna as: “Ad ittwabarek Abram zi Arebbi, Amɛuǧi x kuřci, wenni iggin ijenwan d temmurt. 20 Ad ittwabarek Arebbi, Amɛuǧi x kuřci, wenni isellmen iɣrimen nnec deg ifassen nnec!” Uca Abram iwca as řeɛcur n marra.

21 Uca inna ujeǧid n Sadum i Abram: “Ewc ayi marra min iddaren, maca ksi agřa i yixef nnec.” 22 Maca Abram yarra-dd x ujeǧid n Sadum: “Aqa ssgeɛɛdeɣ afus inu ɣar SIDI Arebbi, Amɛuǧi x kuřci, wenni iggin ajenna d temmurt, jjuǧeɣ 23 maḥend war kessiɣ afiřu niɣ taḥezzemt n sandaliyat uřa ca n řḥajjet zi marra min iǧan nnec, ḥima war teqqared: ‘Necc sstejjareɣ Abram!’ 24 War ɣari dayes bu tasɣart! Mɣir min ccin imsexxaren d tesɣart n iryazen nni kidi iruḥen, Anir d Ickul d Mamri, ejj i-ten ad ksin tasɣart nsen!”