4
Taẓaǧit d tbarreḥt n Wawař n Arebbi
1 Kenniw, a aytbab, ggem s uweqqar d tsegda ak-d imsexxaren nwem. Snem, belli kenniw ɣarwem ɛawed Sidi deg ujenna. ◘4:1 Afa. 6:9.
2 Ṣbarem di tẓaǧit, ḥḍam dayes u wcem aqadi i Arebbi. ◘4:2 Lk. 18:1; Rum. 12:12; Afa. 6:18; 1 Ts. 5:17. 3 Ẓaǧem ɛawed i neccin, ḥima AREBBI ad aneɣ yarzem tawwart n Wawař, ḥima ad nessiweř x ssirr n Lmasiḥ, wenni umi ǧiɣ ɛawed d ameḥbus di ssnaseř, ◘4:3 Afa. 6:19; 2 Ts. 3:1. 4 ḥima ad t ssaregbeɣ uca ad zzayes ssiwřeɣ nican am mammec i xafi icuwwar.
5 Uyurem di tiɣit ak-d yinni n barra, arebḥem řweqt i yeǧan. ◘4:5 Afa. 5:15, 16. 6 Ad yiři wawař nwem řebda s řxaḍar, meǧḥem t s tmeǧaḥt, u ssnem min zi ɣa dd-tarrem nican x kuř ijjen. ◘4:6 Mk. 9:50.
Awař ɣar uneggaru d useǧem
7 Ticikus, uma iɛizzen d umsexxar amtiqqi, wenni d amsexxar amɛacar nneɣ di SIDI, ad kenniw issargeb x umeddur inu. ◘4:7 Řex. 20:4; Afa. 6:21; 2 Tim. 4:12. 8 Ssekkeɣ t ɣarwem, ḥima ad issen mammec teǧam u ḥima ad issareyyeḥ uřawen nwem, 9 jmiɛ ak-d Unisimus, umatneɣ amtiqqi iɛizzen, wenni iǧan d ijjen zzaywem. Nitni ad kenniw ssaregben mammec neǧa neccin. ◘4:9 Flmn. 10.
10 Aristarxus wenni di řeḥbes akidi, ittseǧam-dd xawem s řehna, am mammec xawem ittseǧam uřa d Markus, ayyaw n Bar-Naba wenni x teksim kenniw tiweṣṣa - mařa yusa-dd ɣarwem, qebřem t - ◘4:10 Řex. 15:37; 27:2; 2 Tim. 4:11. 11 d Yasuɛ, umi d as qqaren Yustus. Nitni ǧan zeg wextan. Nitni weḥḥedsen ɛawnen ayi di tmesřact n Tgeldit n AREBBI uca ssfewwjen ayi.
12 Ittseǧam-dd xawem Ipafras s řehna. Netta d ijjen zzaywem, aqa-t d amsexxar n Lmasiḥ, ittedɛa awem řebda di tẓaǧit nnes s jjehd, ḥima ad tbeddem nican, ad tiřim tkemmřen di marra min ixs AREBBI. ◘4:12 Kul. 1:7; Flmn. 23. 13 Minzi cehhdeɣ xas, aqa netta aṭṭas i xawem iksi uřa x yinni di Layudikiya d yinni di Hirapulis.
14 Luka, aḍbib nneɣ iɛizzen, d Dimas ttseǧamen-dd xawem s řehna. ◘4:14 2 Tim. 4:10, 11
15 Seǧmem x wawmaten inni iǧan di Layudikiya s řehna, x Nimfas u x tmesmunt di taddart nnes.
16 Xmi ɣa tᵉttwassɣar tebrat-a jar awem, xenni ḥḍam ad tᵉttwassɣar ɛawed di tmesmunt n Layudikiya uca ad tɣarem kenniw ɛawed tenni zi Layudikiya.
17 Ini i Arxippus: “Ḥḍa ad tkemmřed řxedmet n tsexxart i teksid zi Siditneɣ!”
18 Sřam wanita uriɣ t s ufus inu, zi Bulus. Ɛeqřem x ssnaseř inu. Ad kiwem yiři arḍa. Amin. ◘4:18 2 Ts. 3:17; Ɛbr. 13:3.
◘4:2 4:2 Lk. 18:1; Rum. 12:12; Afa. 6:18; 1 Ts. 5:17.
◘4:3 4:3 Afa. 6:19; 2 Ts. 3:1.
◘4:5 4:5 Afa. 5:15, 16.
◘4:7 4:7 Řex. 20:4; Afa. 6:21; 2 Tim. 4:12.
◘4:10 4:10 Řex. 15:37; 27:2; 2 Tim. 4:11.
◘4:12 4:12 Kul. 1:7; Flmn. 23.
◘4:14 4:14 2 Tim. 4:10, 11
◘4:18 4:18 2 Ts. 3:17; Ɛbr. 13:3.