1 S uyenni tasexxart i d aneɣ ittwaggen war d aneɣ tessiḥeř ca, zi ssibbet n arreḥmet i xaneɣ iǧan. 2 Maca aqa nenḍar timesřayin innufaren isseḥcimen, war neggur ca s teḥraymect. Ɛawed war nettẓuwwar ca awař n AREBBI, maca aqa nessargeb ixef nneɣ am narezzem tawwart n tidett i qaɛ tanefsect n iwdan zzat i AREBBI. ◘4:2 2 Kur. 2:17; 2 Kur. 6:4

3 Maca mařa L’Injil nneɣ ɛad iřeḥḥef, aqa ittřeḥḥaf i yinni i ɣa iweddaren, ◘4:3 2 Kur. 2:15; 2 Ts. 2:10. 4 i yinni issdarɣeř asen arebbi n ddunect-a řeɛqeř nsen, ḥima xenni war xasen tareqq ṭṭya n L’Injil n uɛuǧi n Lmasiḥ wenni iǧan d ṣṣifet n AREBBI. ◘4:4 Ica. 6:10; Yḥ. 12:40; 14:9. Fil. 2:6. Kul. 1:15. Ɛbr. 1:3.

5 Minzi war nettbarreḥ ca ixef nneɣ, maca Lmasiḥ Yasuɛ, Siditneɣ, maca neccin s ixef nneɣ d imsexxaren nwem di ṭṭweɛ n Yasuɛ. 6 Minzi AREBBI d wenni innan: “Ad tareqq tfawt zi taǧest!”, aqa d wenni issruɣan uřawen nneɣ, ḥima ad aneɣ issarɣ s tussna n uɛuǧi n AREBBI deg wudem n Yasuɛ Lmasiḥ. ◘4:6 Amz. 1:3; 2 Bṭ. 1:19.

7 Maca ɣarneɣ řkenz-a di řeqcuɛ n třaxt, ḥima xenni řemɣaret n jjehd ad tiři n AREBBI, war teǧi zzayneɣ. ◘4:7 1 Kur. 2:5; 2 Kur. 5:1. 8 Maɣar nettwaziyyar di marra, maca war nettwajeyyef, aqa ccaten aneɣ, maca war nettwaḥkem ca, 9 ttdarracen xaneɣ, maca war nettwasmeḥ, aqa nemmenḍar, maca war nettwahellek. 10 Aqa narebbu řmewt n Yasuɛ řebda di arrimet nneɣ, ḥima uřa d Tudart n Yasuɛ ad tᵉttwasseḍhar di arrimet nneɣ. ◘4:10 Rum. 8:17; Gal. 6:17; Fil. 3:10; 2 Tim. 2:11, 12; 1 Bṭ. 4:13. 11 Minzi mařa neccin, inni iddaren, aqa nettwasellem i řmewt di ṭṭweɛ n Yasuɛ, ad tesseḍhar uřa d Tudart n Yasuɛ di arrimet nneɣ ittmettan. ◘4:11 Izhd. 44:23; Mt. 5:11; Rum. 8:36; 1 Kur. 4:9; 15:49; Kul. 3:4. 12 Řexxu xenni txeddem řmewt dayneɣ, maca tudart daywem. 13 Am ɣarneɣ Arruḥ d ijj n l’iman - am mammec tura: “Aqa umneɣ, s uya ssiwřeɣ ɛawed!” - aqa nettamen neccin, u s uya nessawař ɛawed ◘4:13 Izhd. 116:10. 14 uca nessen belli wenni dd-issnekkaren Siditneɣ Yasuɛ, ad aneɣ dd-issnekkar ɛawed ak-d Yasuɛ uca ad aneɣ igg akidwem zzates. ◘4:14 Rum. 8:11; 1 Kur. 6:14; 1 Th. 4:16, 17 15 Minzi marra timesřayin-a ttwaggent di ṭṭweɛ nwem, ḥima ad yarni arḍa i waṭṭas, uca ad ifeyyeḍ uqadi i uɛuǧi n AREBBI. ◘4:15 2 Kur. 1:11.

16 S uyenni war nxessar ca uřawen, waxxa bnadem nneɣ n barra ittwahellak, aqa bnadem n daxeř iddakkwař d jdid zeg wass ɣar wenneɣni. 17 Waxxa řmeḥnet n řweqt-a ifsusen d řmijař nnes drus waha, ɛad tᵉttawi aneɣ-dd ijj n řqedd n uɛuǧi i war ɣares iǧi uneggar i řebda qaɛ. ◘4:17 Izhd. 30:6; Mt. 5:12; Rum. 8:18; 1 Yḥ. 3:2. 18 Maɣar war nfarreḥ ca zi min ittwařan maca zi min war ittwiřin, minzi min ittwařan aqa i yict n řweqt waha, maca min war ittwiřin aqa-t i řebda.