1 Issewjed SIDI ijj n wesřem ameqqran ḥima ad isseɣri Yunus uca Yunus ikka třata n wussan d třata n ǧiyaři deg uɛeddis n wesřem. ◘2:1 Mt. 12:40; 16:4; Lk. 11:30 2 Uca iẓẓuǧ Yunus i SIDI, AREBBI nnes, zeg uɛeddis n wesřem. 3 inna:

”Zi řeḥṣaret inu řaɣiɣ i SIDI

u Netta yarra-dd xafi.

Zeg weḥwic n řaxart řaɣiɣ

uca Cek tesřid i tmijja inu. ◘2:3 Izhd. 120:1

4 Tuɣa tenḍared ayi di řaǧaɣ,

deg wuř n řebḥur,

tennḍen ayi-dd řemwaj.

Marra zzhir nnec d řemwaj nnec

kkin-dd xafi sennej. ◘2:4 Izhd. 42:8

5 Nniɣ: ‘Necc ttwassuffɣeɣ

zi zzat i wudem nnec.

Ɛad ad twařiɣ ɛawed

Zzawect nnec Tameqqrant Iqeddsen.’ ◘2:5 Izhd. 31:23

6 Ṭṭfen ayi waman

ař mani iwḍen ɣar řeɛmar inu,

aman ihewřen nnḍen ayi-dd,

iřṣeq-dd arbiɛ n řebḥar deg uzeǧif inu.

7 Hwiɣ ɣar ṭṭrufa yuǧɣen qaɛ n idurar,

ttwabellɛen zzekrunat n temmurt xafi

sennej i řebda,

maca Cek tessgeɛɛded tudart inu

zi turṣuḍi deg waman,

a SIDI, AREBBI inu!

8 Umi idewwex řeɛmar inu dayi,

fekkareɣ di SIDI,

u taẓaǧit inu tgeɛɛed ɣarek,

di Zzawect nnec Tameqqrant Iqeddsen. ◼2:8 dayi - s Tɛibranit ‘xafi’.

9 Nitni ṭṭfen di l’aṣnam ibeṭṭřen d iɣeccen,

semḥen di tmexsiwt nsen icewwaren.

10 Maca necc ad Cek ḥemdeɣ

s yict n tmijja teccur s uqadi.

Min waɛdeɣ, ad t qefřeɣ.

Asenjem zi SIDI.” ◘2:10 Izhd. 3:9; 50:14, 23; 116:17; Ḥuc. 14:3; Ɛbr. 13:15

11 Issiweř SIDI ak-d wesřem uca iɛuqq-dd Yunus di řbar.