1 Yusa-dd wawař n SIDI ɣar Yunus i twařa wiss tnayen, inna: 2 “Kkar, ruḥ ɣar tendint n Ninwa tameqqrant uca barreḥ asen tabarreḥt nni i d ac ɣa iniɣ.” 3 Uca ikkar Yunus, iruḥ ɣar Ninwa ɛlaḥsab awař n SIDI. Tuɣa Ninwa d ict n tendint tameqqrant s waṭṭas, aqa ittxeṣṣa ticři n třata n wussan i ucuqi. 4 Yudef Yunus tandint ticři n ijj n wass uca ibarreḥ, inna: “Awarni arebɛin n wussan ad tᵉttwaneqřeb tendint n Ninwa.” 5 Iryazen n Ninwa umnen di AREBBI uca barrḥen s yijj n uẓummi uca arḍen txuncay n wecḍan, zeg umeqqran ař ameẓyan jar asen. ◘3:5 Mt. 12:41; Lk. 11:32 6 Yiweḍ wawař uřa ɣar ujeǧid n Ninwa uca ikkar zi řkursi n řɛarc nnes, ikkes xas arruḍ nnes igellden, issduriy ixef nnes s yict n txancet n wecḍan uca iqqim x yiɣɣed.

7 X řumur n ujeǧid jmiɛ ak-d ayt n ccurfa ggin ad barrḥen di Ninwa, nnan: “War ttejjim bnadem d řmař d ifunasen d tfunasin d wuǧi ad ccen ca, war ten ttejjim ad hdan uřa ad swen. ◼3:7 ayt n ccurfa - niɣ ‘ayt n taṣiřet’. 8 Jjem ad yarḍ bnadem d řmař tixuncay n wecḍan uca jjem ten ad sɣuyen s jjehd ɣar AREBBI uca ad itub kuř ijj zeg webrid nnes aɛeffan u zi lɛunf i yumsen ɣar ifassen nnes. 9 Ad taɣ ad indem AREBBI uca ad itub uca ad ibeɛɛed x řḥaduq n weɣḍab nnes ḥima war nettwathellik ca.” ◘3:9 Yuw. 2:14

10 Uca iẓra AREBBI min ggin, aqa tuben x webrid nsen aɛeffan uca indem AREBBI x řɣar nni tuɣa inna ad kisen igg uca war t iggi ca.