50
1 Ijj n uzehhed n Asaf. Arebbi x marra irebbiten, SIDI issawař. Netta ittřaɣa i temmurt zi mani dd-tenqar tfuct ař mani teɣři.
2 Zi Ṣihyun, aẓri ikemmřen,
ittban AREBBI ittissiq.
3 AREBBI nneɣ ad dd-yas,
war isseɣd ca.
Timessi zzates ad tecc,
taḥaryaḍt i d as dd-ittennḍen
ad tsuḍ aṭṭas.
4 Netta ad iřaɣa i ijenwan sennej,
i temmurt ḥima ad iḥkem x řgens nnes:
5 “Smunem-dd ɣari imtiqqan inu,
inni kidi itteggen řɛahd s tɣarṣt.”
6 Ijenwan ttbarrḥen tasegda nnes,
maɣar AREBBI s Yixef nnes
aqa-t d řqaḍi. Silah. ◼50:6 řqaḍi - niɣ ‘amezruf’.
7 “Seř, a řgens inu,
u Necc ad ssiwřeɣ, Israil,
Necc ad cehdeɣ ḍidd nnec:
Aqa Necc, AREBBI, d AREBBI nnec!
8 War iǧi x tɣarṣa nnec
ad cek webbxeɣ,
maɣar tiɣarṣa nnec
aqa atent řebda zzati.
9 War kessiɣ ca afunas ameẓyan
zi taddart nnec,
uřa d iɣayḍen zi teqwirin nnec.
10 Maɣar marra imuddar n wezɣar,
aqa inu, řmař x wařef idurar. ◼50:10 azɣar - niɣ ‘řɣabet’ niɣ ‘tazgant’.
11 Necc ssneɣ marra ijḍaḍ n idurar,
marra min ittenhezzan deg iyyar,
aqa-t Inu.
12 Mři tuɣa dayi řaẓ,
ma war d ac t qqareɣ,
maɣar inu ddunect d uɛemmar nnes. ◘50:12 Uf. 19:5; Aɛwd. 10:14; Ayub 41:3; Izhd. 24:1; 1 Kur. 10:26, 28
13 Ma ad cceɣ xenni
aysum n ifunasen ijehden,
niɣ idammen n iɣayḍen?
14 Awi-dd i AREBBI tawhibt n uqadi,
kemmeř lwuɛud nnec i Umɛuǧi x kuřci. ◘50:14 Aɛwd. 23:22; Ayub 22:27; Izhd. 76:12; Amb. 5:3, 4, 5
15 Řaɣa ayi-dd deg wass n řeḥṣaret,
xenni ad cek ssnejmeɣ
uca cek ad ayi tegged ccan.”
16 Maca i uɛeffan iqqar AREBBI:
“Mayemmi tbarrḥed tiweṣṣa inu,
mayemmi i teggid Řɛahd inu
deg uqemmum nnec,
17 umi tcarrhed ttarbiyyet inu
u tenḍared awařen inu awarni ac.
18 Mařa teẓriḍ ijj n uxewwan,
ammu i teggured akides,
tᵉttṣurid ak-d yinni izennan.
19 Aqemmum nnec tᵉttarrid i-t i řɣar,
iřes nnec ittxarreṣ deg wecmat.
20 Tettɣimid dinni, tessawařed x umac,
tessefdaḥeḍ zi mmis n yemmas.
21 Aya tᵉttegged u Necc sseɣdiɣ.
Ttɣiř ac, aqa ayi am cek.
Necc ad cek webbxeɣ,
ad ssarseɣ ddnub nnec
zzat i tiṭṭawin nnec.
22 Fhem aya xenni, a cek i ittun Arebbi,
ḥima war cek tmezzqeɣ
am war din ittiři ufekki.”
23 Wenni dd-ittawyen taɣarṣt n uqadi,
ittegg ayi ccan u issewjad abrid,
ḥima ad as ssecneɣ asenjem n AREBBI.
◼50:6 50:6 řqaḍi - niɣ ‘amezruf’.
◼50:10 50:10 azɣar - niɣ ‘řɣabet’ niɣ ‘tazgant’.
◘50:12 50:12 Uf. 19:5; Aɛwd. 10:14; Ayub 41:3; Izhd. 24:1; 1 Kur. 10:26, 28
◘50:14 50:14 Aɛwd. 23:22; Ayub 22:27; Izhd. 76:12; Amb. 5:3, 4, 5