1 Marra wenni yumnen belli Yasuɛ d Lmasiḥ, aqa netta ittwaxřeq-dd zi AREBBI, uca marra wenni ittexsen wenni t-i-dd yejjin, ad ixs ɛawed wenni zzayes dd-ittwaxeřqen. ◘5:1 Yḥ. 1:12. 2 Zi man aya nessen belli nᵉttexs tarwa n AREBBI, xmi nᵉttexs AREBBI u nᵉttegg tiweṣṣa nnes. 3 Minzi ta d tayri n AREBBI, ad neḥḍa tiweṣṣa nnes, uca tiweṣṣa nnes war wɛarent ca. ◘5:3 Mt. 11:29, 30; Yḥ. 14:15; 15:10. 4 Maɣar mkuř ijjen i dd-ittwaxeřqen zi AREBBI ad iɣelleb x ddunect. D wa d aɣřab i ittɣellaben x ddunect, aqa-t d l’iman nneɣ. ◘5:4 Yḥ. 16:33. 5 Man wen i ɣa iɣellben x ddunect, mɣir wenni yumnen belli Yasuɛ d Mmis n AREBBI! ◘5:5 1 Kur. 15:57; 1 Yḥ. 4:15. 6 D Wa i dd-ikkin zeg waman d Idammen, Yasuɛ Lmasiḥ. War dd-yekki zeg waman waha, maca zeg waman d Idammen. 7 Arruḥ d wenni icehhden, minzi Arruḥ d tidett. 8 Aqa din třata n yinni icehhden: Arruḥ d waman d Idammen, uca nitni s třata deg ijjen.

9 Mařa neqbeř cchadet n iwdan, mecḥař d tameqqrant cchadet n AREBBI. Ta d cchadet n AREBBI tenni iched x Mmis. 10 Wenni yumnen di Mmis n AREBBI, ɣares cchadet-a deg ixef nnes. Wenni war yuminen ca di AREBBI, aqa igga i-t d bu-ixarriqen, minzi netta war yumin ca di cchadet tenni iwca AREBBI x Mmis. ◘5:10 Yḥ. 3:36; Rum. 8:16; Gal. 4:6. 11 Uca ta d cchadet: AREBBI iwca aneɣ Tudart ittduman uca Tudart nni aqa-tt di Mmis. ◘5:11 Yḥ. 1:4. 12 Wenni ɣar iǧa Mmis, ɣares Tudart. Wenni war ɣar iǧi Mmis n AREBBI, war ɣares bu Tudart.

13 Uriɣ awem-dd man aya, ḥima ad tessnem belli ɣarwem Tudart ittduman, kenniw inni ittamnen deg Yisem n Mmis n AREBBI. ◘5:13 Yḥ. 20:31.

14 D ta d ttiqqet tenni ɣarneɣ dayes, mařa nettar zzayes ca n řḥajjet ɛlaḥsab min ixs Netta, Netta ad ɣarneɣ iseř. ◘5:14 Irm. 29:12; Mt. 7:8; 21:22; Mk. 11:24; Lk. 11:9; Yḥ. 14:13; 15:7; 16:24; Yaɛ. 1:5; 1 Yḥ. 3:2. 15 Mařa nettwasseqneɛ nican aqa ad aneɣ iseř min ma d as nettar, xenni nettiqq belli aqa yusa-dd aneɣ min d as nettar.

16 Mařa ḥed iẓra umas ixeṭṭa, ijj n uxeṭṭu war ihdijen ca řmewt, ejj i-t ad iẓẓaǧ di ṭṭweɛ nnes, uca ad as temmewc Tudart, i wenni war ixeṭṭin ca ař řmewt. Aqa din axeṭṭu ař řmewt, war qqareɣ ca aqa ittxeṣṣa ad iẓẓaǧ i man aya. ◘5:16 Řxř. 15:30; 1 Ṣm. 2:25; Mt. 12:31; Mk. 3:29; Lk. 12:10; Ɛbr. 6:4; 10:26; 2 Bṭ. 2:2. 17 Marra řmuɛṣiyyet, aqa-tt d ddenb uca aqa din ddenb i war iǧin ca ař řmewt. ◘5:17 1 Yḥ. 3:4.

18 Nessen belli kuř ijjen wenni dd-ittwaxeřqen zi AREBBI, war ixeṭṭi ca, minzi wenni dd-ittwaxeřqen zi AREBBI ad iḥḍa ixef nnes u amɛeffan war t ittḥidi.◘5:18 1 Yḥ. 3:9. 19 Nessen, aqa aneɣ zi AREBBI uca ddunect marra aqa-tt deg ifassen n umɛeffan. 20 Nessen belli Mmis n AREBBI aqa yusa-dd uca iwca aneɣ-dd řefhamet ḥima ad nessen Wenni iǧan d tidett u ḥima ad niři deg Wenni d tidett, di Mmis Yasuɛ Lmasiḥ. D wa d AREBBI s tidett d Tudart ittduman. ◘5:20 Ica. 9:5; 44:6; 53:11; 54:5; Lk. 24:45; Yḥ. 20:28; Rum. 9:5; 1 Tim. 3:16.

21 A iḥenjiren inu, ḥḍam ixef nwem zeg weɛbed n l’aṣnam!