1 Maca tuɣa din ɛawed jar řgens inabiyyen issxarriqen, am mammec i ɣa iřin uřa d imesɣaren issxarriqen jar awem, ad ssidfen tibridin ittareddǧen, ad nkaren Sidi i ten isɣin, ad ssiwḍen ammu areyyeb deɣya x yixef nsen. ◘2:1 Aɛwd. 13:2; Mt. 24:11; Řex. 20:29; 1 Tim. 4:1; 2 Tim. 3:1. 2 Aṭṭas i ɣa iḍfaren taxmuji nsen ař ɣa ittwaceqqef webrid n tidett zi ssibbet nsen. 3 S ṭṭmeɛ u s wawařen ittwaggen ad zzaywem ggen am zi sseřɛet, maca řḥukm xasen zeg wecḥař uya war ibḍiř ca uca ahellek nsen war ittnudum ca. ◘2:3 Yah. 4.

4 Minzi mařa AREBBI war issar x lmalakat i yeggin ddnub, maca inḍar i-ten di ssnaseř n taǧest di řaǧaɣ yuǧɣen uca isellem i-ten ḥima ad ttwaxemmřen ař řḥukm n uɛeddeb, ◘2:4 Yah. 6; Asa. 20:3. 5 u ɛawed war issar x ddunect n zic, maca tuɣa iḥḍa Nuḥ, wenni d wiss tmenya, ambarreḥ n tsegda, řami dd-iḍřeq řḥemřet x ddunect n lkuffar, ◘2:5 Amz. 7:23; 1 Bṭ. 3:19. 6 u ɛawed řami issecmeḍ Netta tineddam n Sadum d Ɛamurra u iḥkem xasent s uneqřeb, aqa yarra i-tent d lmital i lkuffar i ɣa yiřin ɛad. ◘2:6 Amz. 19:24; Aɛwd. 29:22; Ica. 13:19; Irm. 50:40; Ḥiz. 16:49; Ḥuc. 11:8; Ɛam. 4:11; Yah. 7.

7 Ɛawed issenjem Netta Lut, amseggad, wenni tuɣa iweddben aṭṭas zi ticři ixemjen n yinni war ɣar teǧi ccariɛa. ◘2:7 Amz. 19:7, 8. 8 Maɣar umi amsegged wanita iẓra d isřa timegga nsen i war dd-yusin ak-d ccariɛa, ittwaɛeddab řeɛmar nnes iseggden zeg wass ař wass, am tuɣa izeddeɣ jar asen. ◘2:8 Izhd. 119:158. 9 Ammu i issen SIDI mammec i ɣa issuffeɣ inni t itteggʷeden, zi řmeḥnet, maca Netta iḥeṭṭa inni war iseggden ḥima ad ttwaɛeddben deg wass n lḥisab, ◘2:9 1 Kur. 10:13. 10 mahu qaɛ inni iḍfaren ddat nsen am ttmeẓẓren di min ixemjen, u seḥqarran ṣṣulṭa n ijenwan. Aqa aten d imɛeffaren d imneffxen, war ttarjijin zzat min iɛuǧen am ttceqqafen. 11 Waxxa lmalakat ujarent ten di ṣṣulṭa d jjehd, war xasen ssiwiḍent řḥukm n SIDI di ssibbet n uceqqaf. 12 Maca nitni s řɛeks ǧan am imuddaren ignawen ɛlaḥsab ṭṭbiɛet, inni yuran i tɣarṣt s řmus d tajeyyaft am ttceqqafen di min di war fehhmen. Ad ttwajeyyfen di tjeyyaft n yixef nsen. ◼2:12 imuddaren - ixs ad yini ‘iwdan’ d ‘lḥayawanat’ d marra min iddaren nni izemmar ad yuyur.  ◘2:12 Irm. 12:3; Yah. 10. 13 Ina d inni x teǧa řmuɛṣiyyet d řmunet i řmuɛṣiyyet. Nitni ḥesben tawarrit n meẓri deg nnecwat s uziř d abarreɛ am ccuren nitni s ibeqqiḍen n řewsex. Xmi ttarran nnitni meẓri deg uraren nsen n uɣebbi, sellmen ixef nsen ɣar twarrit n meẓri tameqqrant. 14 Tiṭṭawin nsen ccurent s zzina u s ddenb war iqeṭṭin, xmi ɣekkwan nitni řeɛmur n yinni war ibedden nican. Aqa ɣarsen uř ittwarebban x ṭṭmeɛ, aqa nitni d tarwa n nneɛřet, 15 ffɣen zeg webrid iseggmen, weddaren, uca ḍfaren abrid nni ikka Balɛam, mmis n Faɣur, wenni tuɣa ittexsen řmunet n řɣecc. ◘2:15 Řxř. 22:7, 21; Yah. 11. 16 Maca netta iksi awebbex i řmuɛṣiyyet nnes, minzi zzayřet tagnawt tessiweř ɣares s ict n tmijja n iwdan, temneɛ tubbuheřya n unabi. ◘2:16 Řxř. 22:21.

17 Nitni d řɛunṣarat war dayes bu waman, d iseynuten ttwaɛarrnen s tḥaryaḍt, aqa tubbarcent n taǧest tᵉttwassewjed asen. ◘2:17 Yah. 12. 18 Maɣar mařa ssiwřen s nnɛi n řhard nsen ixwan, aqa nitni ssɣekkʷan s nnecwat ixemjen n arrimet inni igguren ad arewřen zeg inni isellmen ixef nsen i uɣekkwi. 19 Waɛden ten s tiřelli, waxxa nitni simant nsen d isemɣan n řɣecc. Minzi wi zi ittwaɣelleb bnadem, aqa i netta ad yiři d amsexxar. ◘2:19 Yḥ. 8:34; Rum. 6:16. 20 Maɣar awarni řami dd-arewřen nitni zi řexmej n ddunect s tussna n Siditneɣ d Amsenjem nneɣ, Yasuɛ Lmasiḥ, aqa dewřen-dd ɣar řexmej nni ɛawed uca ttwaɣellben zzayes twařa nneɣni, aqa xenni aneggar nsen ad asen yura mahu x umezwar. ◘2:20 Mt. 12:45; Ɛbr. 6:4; 10:26. 21 Aqa ḥsen asen meɛlik qqimen war ssinen abrid n tsegda zi min ssnen, uca řexdenni ad ffɣen ɛawed x tewṣeyyet iqeddsen i d asen dd-ittwasellmen. 22 Aqa temsar asen am tt iqqar wawař-a n tidett: “Aqzin aqa idweř-dd x min tuɣa dd-iɛuqq!” niɣ mammec d as qqaren nneɣni: “Tiřeft tenni ittwassirden qaɛ, tedweř-dd tᵉttmarraɣ deg ubaryuḍ nnes!” ◘2:22 Awřn. 26:11.