1 Xenni fesyen ayt n Israil iqiḍan nsen uca wtin iqiḍan nsen di řewḍat n Mu’ab, arendad n Ariḥa nni iǧan x ujemmaḍ n L’Urdun. 2 Uca iẓra Balaq, mmis n Ṣiffur, marra min igga Israil deg Imuriyyen. 3 Mu’ab tuɣa itteggʷed aṭṭas zi řgens-a, minzi tuɣa aten deg waṭṭas. Mu’ab tuɣa ittnexřaɛ zeg ayt n Israil.

4 Xenni inna Mu’ab i imɣaren n Midyan: “Řexxu řɣaci-ya ad iřseḥ marra min d aneɣ-dd innḍen, am mammec iřesseḥ ufunas taziyzawt n yeyyar.” Tuɣa Balaq, mmis n Ṣiffur, ajeǧid n Mu’ab. 5 Issekk ireqqasen ɣar Balɛam, mmis n Baɛur, ɣar tendint n Fatur ɣar yeɣzar n Lfuraṭ, di temmurt n ayt n řgens nnes, maḥend ad as dd-řaɣan uca netta inna: “Xzar, iffeɣ-dd ijj n řgens zi Miṣra uca xzar, aqa idřa udem n temmurt uca aqa nitni zeddɣen nican arendad inu. ◘22:5 Yac. 24:9 6 As-dd řexxu, nɛeř řgens di ṭṭweɛ inu, minzi aqa ijhed xafi. Ad taɣ necc zemmareɣ ad t ɣeřbeɣ niɣ ad t ssuffɣeɣ zi temmurt, minzi necc ssneɣ belli wi ɣa tbarked cek, ad ittwabarek u wi ɣa tneɛřed, ad ittwanɛeř.”

7 Xenni ruḥen imɣaren n Mu’ab d imɣaren n Midyan ak-d řmunet n uɛezzem deg ufus nsen, iwḍen ɣar Balɛam uca ssiwřen akides s wawařen n Balak. 8 Netta inna asen: “Sensem da ǧiřet-a, xenni necc ad xawem dd-arreɣ am mammec ɣari ɣa issiweř SIDI.” Xenni qqimen řḥukkam n Mu’ab ɣar Balɛam. 9 Yusa-dd AREBBI ɣar Balɛam, inna: “Min ɛnan iryazen nni iǧan akidek?” 10 Inna Balɛam i AREBBI: “Balak, mmis n Ṣiffur, ajeǧid n Mu’ab, issekk i-ten-dd ɣari, inna: 11 ‘Xzar, ijj n řgens iffeɣ-dd zi Miṣra u aqa idřa udem n temmurt. As-dd, nɛeř i-t di ṭṭweɛ inu. Ad taɣ zemmareɣ xenni ad kisen menɣeɣ niɣ ad ten ssuffɣeɣ.’ ” 12 Inna AREBBI i Balɛam: “War ttriḥ kisen niɣ ad tneɛřed řgens nni, minzi řgens aqa ittwabarek.”

13 Xenni ikkar Balɛam di ṣṣbeḥ uca inna i řḥukkam n Balak: “Dewřem-dd ɣar temmurt nwem, minzi SIDI war d ayi ismiḥ ḥima ad raḥeɣ akidwem.” 14 Xenni kkaren řḥukkam n Mu’ab uca dewřen-dd ɣar Balak uca nnan: “Balɛam yugi ad dd-yas akidneɣ.”

15 Issekk Balak ɛawed řḥukkam, ɛad ktar u ɛad wenni icennɛen ktar x yina imezwura. 16 Usin-dd ɣar Balɛam, nnan: “Ammu i iqqar Balak, mmis n Ṣiffur: ‘Ttzawgeɣ cek, war ttejji ixef nnec maḥend war ɣari dd-ttased, 17 minzi ad cek karrmeɣ s waṭṭas uca ad ggeɣ marra min d ayi ɣa tinid. Ttzawgeɣ cek, as-dd uca nɛeř řgens-a di ṭṭweɛ inu!”

18 Yarra-dd Balɛam uca inna i imsexxaren n Balak: “Waxxa Balak ad ayi iwc taddart nnes teccur s nnuqart d wureɣ, ɛad war zmireɣ ad ffɣeɣ x řumur n SIDI, AREBBI inu, maḥend ad ggeɣ ca n řḥajjet d tameẓyant niɣ ca n řḥajjet d tameqqrant. ◘22:18 Řxř. 24:13 19 Xenni řexxu, ttzawageɣ kenniw, qqimem danita ǧiřet-a ḥima ad ssneɣ min d ayi ɣa yini SIDI ɛad ktar.” 20 Di ǧiřet yusa-dd AREBBI ɣar Balɛam, inna as: “Mařa dewřen-dd yeryazen nni maḥend ad ac dd-řaɣan, kkar xenni uca ruḥ akidsen. Maca war ttegg mɣir min d ac ɣa iniɣ.” 21 Ikkar Balɛam ɣar ṣṣbeḥ uca iḥezzem i teɣyuč nnes uca yuyur ak-d řḥukkam n Mu’ab.

22 Xenni yarɣa weɣḍab n AREBBI, minzi netta iruḥ uca lmalak n SIDI ibedd deg webrid am cciṭan ḍidd nnes. Netta inya x teɣyuč nnes uca tnayen n imsexxaren tuɣa aten akides. 23 Uca taɣyuč teẓra lmalak n SIDI ibedd deg webrid s ssif nnes ittwajebden deg ufus nnes. S uyenni teřḥem teɣyuč zeg webrid uca tuyur deg iyyar. Xenni iwta Balɛam taɣyuč ḥima ad tt yarr ɣar webrid. ◘22:23 2 Bṭ. 2:16; Yah. 11

24 Maca lmalak n SIDI ibedd deg ict n tebridt teḥṣar jar imarjaɛen n uḍiř s yijj n weɣbar ɣar ṭṭarf d ijj n weɣbar ɣar ṭṭarf nneɣnit. 25 Umi teẓra teɣyuč lmalak n SIDI, teřṣeq ɣar weɣbar uca ittwaḥṣar uḍar n Balɛam ak-d weɣbar uca netta iqqim iccat i-tt.

26 Uca iruḥ lmalak n SIDI ɣar zzat uca ibedd deg ijj n wemcan iḥṣar aṭṭas ař mani war ittwif ttasiɛ maḥend ad iḥeyyed ɣar yefus uřa ɣar uzeřmaḍ. 27 Umi teẓra teɣyuč lmalak n SIDI, tbarc sadu Balɛam uca Balɛam ixeyyeq aṭṭas uca ifarc taɣyuč s yijj n ukeccuḍ.

28 Xenni yarzem SIDI aqemmum n teɣyuč uca tenna i Balɛam: “Min d ac ggiɣ umi d ayi tfarced řexxu ɛad třata n imuren?” ◘22:28 2 Bṭ. 2:16; Yah. 11 29 Xenni inna Balɛam i teɣyuč: “Minzi cem tbuṣared xafi. Mři ɣari ssif deg ufus inu, ad tiři xenni nɣiɣ cem!” 30 Tenna teɣyuč i Balɛam: “Ma war ǧiɣ necc taɣyuč nnec i xef tenyid zeg wami necc ɣarek ǧiɣ ař ass-a? Ma aqa necc nnumeɣ tteggeɣ ak kik ammu?” Uca yarra-dd xas: “Lla!” 31 Xenni yarzem SIDI tiṭṭawin n Balɛam ařami iẓra lmalak n SIDI ibedd deg webrid s ssif nnes ittwajebden deg ufus nnes. Xenni yuḍar Balɛam, ibendeq s uɣembub nnes ɣar temmurt. 32 Inna as lmalak n SIDI: “Mayemmi tewtid taɣyuč nnec třata n imuren? Xzar, aqa Necc ffɣeɣ-dd am ijj n weɣrim, minzi abrid-a ittḍarra ayi Necc nican. ◘22:32 2 Bṭ. 2:15 33 Teẓra ayi teɣyuč uca teřḥem xenni zi zzat i wudem inu třata n imuren. Mařa war teřḥim zi zzat i wudem inu, xenni Necc ad yiři aqa řexxu nɣiɣ cek u nettat ad tt jjeɣ ad teddar.” 34 Xenni inna Balɛam i lmalak n SIDI: “Aqa necc xḍiɣ, minzi war ssineɣ belli Cek tbedded zzati deg webrid. Ɛad řexxu, mařa aya d řɛib di tiṭṭawin nnec, necc ad dd-dewřeɣ.” 35 Inna lmalak n SIDI i Balɛam: “Ruḥ ak-d iwdan-a, maca siweř waha min d ac ɣa iniɣ Necc.” Ammu iruḥ Balɛam ak-d řḥukkam n Balak.

36 Umi Balak isřa, aqa Balɛam yusa-dd, iruḥ ḥima ad t immeřqa ɣar tandint n Mu’ab i iǧan ɣar jjihet n weymir n Arnun, ɣar ṭṭarf n jjihet n weymir. 37 Uca Balak inna i Balɛam: “Ma war ssekkeɣ necc iwdan ad ac dd-řaɣan? Mayemmi war ɣari dd-tusid? Ma war zemmareɣ necc ad cek karmeɣ?” 38 Xenni yarra-dd Balɛam x Balak: “Xzar, necc usiɣ-dd ɣarek, maca ma zemmareɣ necc řexxu ad ssiwřeɣ x ca? Awař nni i ɣa yegg SIDI deg uqemmum inu, ad t iniɣ.” ◼22:38 yarra-dd - s Tɛibranit ‘inna’. 39 Uca iruḥ Balɛam ak-d Balak uca usin-dd ɣar Qaryat-Ḥaṣut. 40 Xenni iɣarṣ Balak i ifunasen d wuǧi, issekk zzaysen ɣar Balɛam u ɣar řḥukkam nni tuɣa akides. 41 Ɣar ṣṣbeḥ imsar belli Balak yiwi akis Balɛam uca issiři i-t x řuɛřat n Baɛl mani tuɣa izemmar ad iẓar řgens ař ṭṭarf iggʷejen qaɛ.