1 A imɛizzen inu, ta d tabrat wiss tnayen i d awem dd-uriɣ řexxu, u di tnayen n tebratin-a arezzuɣ ad ssfaqeɣ nneyyet nwem iṣfan am kenniw ssɛeqřeɣ, ◘3:1 2 Bṭ. 1:13. 2 ḥima ad teqqimen tᵉttfekkarem deg wawařen nni tuɣa innan inabiyyen iqeddsen zic, uřa di tewṣeyyat n Siditneɣ d Amsenjem nneɣ, tinni ɣarneɣ dd-yiwḍen s rrusul. 3 Man aya ittxeṣṣa ad tessnem d amezwaru, aqa deg wussan ineggura ad dd-asen imestehzayen inni istehzan am uyuren ɣar nnecwat nsen, ◘3:3 1 Tim. 4:1; 2 Tim. 3:1; Yah. 18. 4 ad inin: “Mani iǧa lwaɛd n twasit nnes? Zeg wami ṭṭṣen řejdud nneɣ, ammu i yeqqim kuřci am tuɣa iǧa zeg umezwar řami tᵉttwagg ddunect.” ◘3:4 Ḥiz. 12:22. 5 Meɛlik ufin ad ttun belli s wawař n AREBBI aqa ijenwan izwaren ad iřin, u aqa řbarr igeɛɛed zeg waman u s ufus n waman s Wawař n AREBBI, ◘3:5 Amz. 1:9; Izhd. 24:2. 6 aman i zi tᵉttwahellek ddunect n řweqt nni umi dd xas ssefyen waman n řḥemřet deg wussan n Nuḥ, uca tᵉttwamḥa. ◘3:6 Amz. 7:10, 21. 7 Maca ijenwan d temmurt n yiḍa aqa ttwaḥefḍen s wawař nnes, xemmřen i tmessi ař ass n lḥisab d uweddar n lkuffar. ◘3:7 Izhd. 102:27; Ica. 51:6; 2 Ts. 1:8; Ɛbr. 1:11; 2 Bṭ. 3:10.

8 Maca ittxeṣṣa kenniw war tᵉttᵉttum ict n řḥajjet, a imɛizzen, aqa-tt d ta: ɣar SIDI ijj n wass am ařef n iseggʷusa uca ařef n iseggʷusa am yijj n wass. ◘3:8 Izhd. 90:4. 9 Aqa SIDI war issɛizzi deg usuffeɣ n řwuɛud nnes am mammec d asen ittɣiř i ca n iwdan, maca Netta iggur akidwem s ttasiɛ n řxaḍar, minzi Netta war ittexs ca ad yareyyeb uřa d ijj, maca maḥend ad tuben marra. ◘3:9 Ḥiz. 18:32; 33:11; Ica. 30:18; Ḥab. 2:3; Rum. 2:4; 1 Tim. 2:4; 1 Bṭ. 3:20; 2 Bṭ. 3:15.

10 Maca ass n SIDI ad dd-yas am uxewwan s ǧiřet. Deg wass nni ad weddaren ijenwan s řɣefřet u timesřayin timezwura n ddunect ad fesyent di tmessi uca tammurt d řexdayem i xas iǧan ad ttwafent. ◘3:10 Mt. 24:43,44; 1 Ts. 5:2; Asa. 3:3; 16:15.

11 Am marra timesřayin-a ad fesyent ammu, mammec ittcuwwar ad tuyurem kenniw s tqeddast d tiggʷudi zi AREBBI, 12 am tᵉttrajam tawasit n wass n AREBBI, am tᵉttmeẓrem dayes, xmi ɣa fnan ijenwan am ttwaqeǧben s tmessi uca ad fesyent timesřayin timezwura n ddunect s řɛabuq nnes. ◘3:12 Izhd. 50:3; 2 Ts. 1:8. 13 Maca neccin aqa nettraja ijenwan n jdid d temmurt n jdid mani ɣa tezdeɣ tsegda ɛlaḥsab lwaɛd nnes. ◘3:13 Ica. 65:17; 66:22; Asa. 21:1.

14 S uyenni, a imɛizzen inu, umi kenniw tᵉttrajam man aya, cḍarem maḥend ad tᵉttwafem břa řexmej u břa řɛib zzates di řehna. 15 Ḥesbem ttasiɛ n řxaḍar n SIDI d tawwart i weṣřaḥ, am mammec uřa d umatneɣ iɛizzen Bulus d awem dd-yura ɛlaḥsab tiɣit i d as immewcen, ◘3:15 Rum. 2:4. 16 am mammec xas issiweř netta di marra tibratin nnes. Aqa din ca n tmesřayin iwɛaren i řefhamet, tinni i ssfarraɣen řjuhhař d yewdan war imtinen deg wuř nsen, am mammec ggin uřa i Tira Iqeddsen nneɣni i wareyyeb n yixef nsen. ◘3:16 Rum. 8:19; 1 Kur. 15:24; 1 Ts. 4:15.

17 S uyenni kenniw a imɛizzen inu, am tessnem man aya qbeř, ḥḍam ixef nwem, ḥima war tḍeffaram awarni i uweddar n yinni iǧan břa ccariɛa uca ad tewḍam waxxa tuɣa tᵉttbeddam nican, 18 maca s řɛeks ḥḍam ad teymem deg arḍa d tussna n Siditneɣ d Amsenjem nneɣ, Yasuɛ Lmasiḥ, u n AREBBI, Babas, i Wenni umi ɣa yiři uɛuǧi, am řexxu am řebda, ař deg wussan n řebda! Amin.