1 Yusa-dd ɣari wawař n SIDI, inna: 2 “A mmis n bnadem, cek tzeddɣed deg ict n taddart iɣewwɣen, maɣar nitni ɣarsen tiṭṭawin maḥend ad ttwařan, maca war ttwiřin, uřa d imejjanen maḥend ad sřen, maca war ttesřin, minzi nitni d ict n taddart iɣewwɣen. ◘12:2 Ica. 6:9, 10; Irm. 5:21; Ḥiz. 2:3-8; 3:26, 27 3 Cek, a mmis n bnadem, sewjed řeḥwayej i lmenfa uca uyur di lmenfa zzat i tiṭṭawin nsen. Ad tuyured di lmenfa zzat i tiṭṭawin nsen zeg wemcan nnec ɣar ijj n wemcan nneɣni. Ad taɣ ad neɛmen aqa aten d ict n taddart iɣewwɣen. 4 Ad tessuffɣed řeḥwayec nnec deg uziř zzat i tiṭṭawin nsen am řeḥwayec i lmenfa, ad teffɣed di tmeddit zzat i tiṭṭawin nsen, amecnaw iwdan inni igguren di lmenfa. 5 Egg anuqqib di řḥiḍ zzat i tiṭṭawin nsen uca suffeɣ marra aya zzayes. 6 Zzat i tiṭṭawin nsen ad tawyed aya x tɣarḍin nnec, di tbambast ad tessuffɣed aya. Ad teffared udem nnec, ařami war tẓarred tammurt, minzi ggiɣ cek d řeɛřamet n řeɛjeb i taddart n Israil.” 7 Necc ggiɣ am mammec i d ayi iweṣṣa. S uziř ssuffɣeɣ řeḥwayec inu am řeḥwayec i lmenfa. Ɣar tmeddit ɣziɣ s ufus inu x řḥiḍ u di ǧiřet ssuffɣeɣ marra ɣar barra uca iwyeɣ t x tɣarḍin inu zzat i tiṭṭawin nsen.

8 Yusa-dd ɣari wawař n SIDI x tuffut, inna: 9 “A mmis n bnadem, ma war d ac tenna taddart n Israil, taddart iɣewwɣen nni: ‘Min tᵉttegged?’ 10 Ini asen: ‘Ammu i iqqar Sidi inu, SIDI! Řḥukm issaggʷaden wanita ad yiři x řḥakem di Urcalim u x marra taddart n Israil, inni izeddɣen jar asen.’ 11 Ini: ‘Necc d řeɛřamet n řeɛjeb i kenniw. Am mammec ggiɣ necc, ammu i ɣa ggen daysen, ad ttwanedhen di lmenfa, di tmeḥbast. 12 Řḥakem nni iǧan di řwesṭ nsen, ad yarbu řeḥwayec x teɣruḍt nnes di ǧiřet uca ad iffeɣ. Nitni ad ɣzan x řḥiḍ maḥend ad zzayes t ssuffɣen. Netta ad ideř aɣembub nnes ařami ɣa iqqim war izemmar ad iẓar ɛad tammurt s tiṭṭawin nnes. ◘12:12 2 Ij. 25:4 13 Necc ad xasen bezzɛeɣ tracca inu ařami ɣa idweř d ameḥbus di řfex inu uca ad t awyeɣ ɣar Babil, ɣar temmurt n Ikaldaniyyen. Netta maca war tt iẓarr, maca waxxa amenni ad din immet. ◘12:13 Ḥiz. 17:20 14 Marra inni d as dd-innḍen maḥend ad t ɛawnen d marra bandiyyat n řɛeskar nnes, ad ten bezzɛeɣ i marra tiɣemmura n usemmiḍ uca ad jebdeɣ ssif awarni asen. ◘12:14 Ḥiz. 5:10, 12 15 Ammu i ɣa ssnen belli Necc d SIDI, xmi ten ɣa bezzɛeɣ jar řegnus uca ad ten zuzzareɣ di temmura. 16 Maca ad zzaysen jjeɣ ca n yeryazen inni inejmen zi ssif, zi řaẓ u zi ṭṭaɛun, ḥima ad ɛawden i řegnus mani ɣa yawḍen, x marra jjɛayef nsen nni ggin. Xenni ad ssnen belli Necc d SIDI.’ ”

17 Yusa-dd ɣari wawař n SIDI, inna: 18 “A mmis n bnadem, ad tecced aɣrum nnec s tarjiji uca ad teswed aman nnec s warjef d wecḍan. 19 Ad tinid i řgens n temmurt: ‘Ammu i iqqar Sidi inu, SIDI, x imezdaɣ n Urcalim i yeǧan x wudem n temmurt n Israil: Nitni ad ccen aɣrum nsen s wecḍan u ad swen aman nsen s wejɛar, minzi marra aɛemmar nnes ad ittwakkes zi temmurt zi ssibbet n lɛunf n marra inni dayes izeddɣen. ◘12:19 Ḥiz. 4:16 20 Tineddam izeddɣen ad dewřent d řxirbet uca tammurt ad tᵉttwareddeǧ. Ad tessnem belli Necc d SIDI.’ ”

21 Yusa-dd ɣari wawař n SIDI, inna: 22 “A mmis n bnadem, man amedya nni ɣarwem din di temmurt n Israil, umi teqqarem: ‘Ɛeddun wussan uca war dd-iffiɣ ura d ijj n řewḥiy’?”

23 “S uya ini asen: ‘Ammu i iqqar Sidi inu, SIDI: Necc ad ssbeddeɣ amedya-ya, ařami ɣa qqimen war qqaren ɛad man aya am umedya di Israil.’ ”

“S uya siweř akidsen ammu: ‘Aqa iwḍen-dd ussan nni, uca uřa d aseqfeř n kuř řewḥiy!’ 24 Minzi war ittiři ɛad řewḥiy war iǧin uřa d tagezzant s wawařen imiziḍen di taddart n Israil. 25 Minzi Necc, SIDI, ad ssiwřeɣ. Awař i ɣa ssiwřeɣ, ad yiři, war ittɛeṭṭař ɛad, minzi deg wussan nwem, a taddart iɣewwɣen, ad ssiwřeɣ ijj n wawař uca ad t ggeɣ, iqqar Sidi inu, SIDI.”

26 Yusa-dd ɣari wawař n SIDI, inna: 27 “A mmis n bnadem, xzar, inni n taddart n Israil, inni iqqaren: ‘Řewḥiy nni ittwařa aqa-t i yijj n řweqt awarni i waṭṭas n wussan, ittnabba x wussan n zzmanat iggʷejen aṭṭas.’ ” 28 “S uya ini asen: ‘Ammu i iqqar Sidi inu, SIDI: War ittɛeṭṭař ɛad uřa d ijj zeg wawařen inu. Awař i nniɣ, ad yiři, ammu i iqqar Sidi inu, SIDI.’ ”