1 “Cek, a mmis n bnadem, ksi ict n luṣa n třaxt uca sars i-tt zzat i wudem nnec uca arcem xas tandint n Urcalim. 2 Qewwar as uca bna xas ijj n lbaraj uca egg xas acbar, egg xas řemrageḥ n řɛeskar uca wwet xas deg wenneḍ nnes řeqcuɛ n wedham. ◘4:2 2 Ij. 25:1 3 Uca cek, ksi ict n marmita n wuzzař uca egg i-tt am yijj n řḥiḍ n wuzzař jar cek d tendint. Arr udem nnec xas maḥend ad tᵉttwaḥṣar u cek ad tt teḥṣared: man aya ad tiři d řeɛřamet i taddart n Israil. 4 Uca cek, ad tezzřed x uɣezdis nnec azeřmaḍ uca ad xas tegged řmuɛṣiyyet n taddart n Israil. Anect n ussan nni di xasen i ɣa tezzřed, ad tarbud řmuɛṣiyyet nsen. 5 Maɣar Necc ad xak ggeɣ lɛadad n iseggʷusa n řmuɛṣiyyet nsen am lɛadad n wussan: teřt-mya u-tesɛin n wussan ad tarbud řmuɛṣiyyet n taddart n Israil. ◘4:5 Řxř. 14:34 6 Xmi i ɣa tkemmřed ussan nni, ad tezzřed ɛawed x uɣezdis nnec afusi uca ad tarbud řmuɛṣiyyet n taddart n Yahuda, arebɛin n wussan. Ijj n wass i yijj n useggʷas, am mammec i d ac umureɣ. ◼4:6 am mammec i d ac umureɣ - s Tɛibranit ‘am mammec d ac wciɣ’. 7 Ad teqqimed tᵉttarred udem nnec ɣar řeḥṣaret n Urcalim uca ad tɛarrid aɣiř nnec, ad tnebbid ḍidd nnes. ◘4:7 Ica. 8 Xzar, Necc ad xak ggeɣ tisɣunin ařami war tzemmared ad tennqeřbed zeg ijj n uɣezdis ɣar uɣezdis nneɣni ař ɣa tkemmřed ussan n řeḥṣaret nnec.”

9 “Ksi irden, imendi, ibawen, řeɛdes, tafsawt d karṣana uca egg i-ten di tebqect uca egg zzaysen aɣrum i yixef nnec. Ad tecced aya am mecḥař lɛadad n wussan nni i ɣa tezzřed x uɣezdis nnec, teřt-mya u-tesɛin n wussan. ◼4:9 karṣana - niɣ ‘dduxn’ niɣ ‘jawars’. 10 Macca nni i ɣa tecced ad tᵉttwawzen: ɛicrin ciqlu i yijj n wass. Ad tt tecced di tsaɛɛetin ittwaggen. 11 Ad teswed aman s řeɛbar: ict n tsittut zeg ijj n uhinu. Ad tt teswed zi řweqt ař řweqt nneɣni. ◼4:11 ict n tsittut zeg ijj n uhinu - ɛřaḥař azyen litru. 12 Ad tecced ict n txebbazt n imendi uca ad tt tᵉssenggʷed zzat i tiṭṭawin nsen x iẓẓan i dd-iffɣen zi bnadem.”

13 Inna SIDI: “Ammu i ɣa ccen ayt n Israil aɣrum nsen ixemjen jar řegnus mani ten ɣar i ɣa ssuffɣeɣ.” ◘4:13 Ḥuc. 9:3 14 Xenni nniɣ: “A, Sidi inu, SIDI, xzar, řeɛmar inu war ittwassexmej ɛemmarṣ s macca war iḥřin. Zi temẓi inu ař řexxu necc war cciɣ řxecbet niɣ min imezzqen u ɛemmarṣ war yudif weysum n jjɛifect ɣar uqemmum inu.” 15 Uca Netta inna ayi: “Xzar, ad ac wciɣ řeɣbar n ifunasen deg wemcan n ubarruḍ n bnadem. Sewjed xas aɣrum nnec.”

16 Xenni inna ayi: “Cek, a mmis n bnadem, xzar, ad arẓeɣ řeɛweč n weɣrum di Urcalim uca nitni ad ccen aɣrum s řewzen s unexřiɛ uca s arjef ad swen aman s řeɛbar,◼4:16 řeɛweč n weɣrum - s Tɛibranit ‘aɛmud n weɣrum’.  ◘4:16 Lawi 26:26; Ica. 3:1; Ḥiz. 5:16; 14:13 17 minzi ad asen ittxeṣṣa weɣrum d waman. Nitni ad xzaren ayawya s arjef uca ad dewřen arṣuḍen di řmuɛṣiyyet nsen.”