1 A aytma, war tteggem s wudmawen di l’iman iɛuǧen n Siditneɣ Yasuɛ Lmasiḥ. ◘2:1 Lawi 19:15; Aɛwd. 16:19; Awřn. 24:23; Mt. 22:16. 2 Minzi mařa yudef-dd ɣar tmesmunt nwem ijj n weryaz s txadent n wureɣ u s warruḍ icnan, am dd-yudef ɛawed ijj n umezřuḍ s warruḍ ixemjen, 3 maca ad tewcem taynit i wenni ɣar iǧa warruḍ icnan, ad as tinim: “Aqa da ijj n wemcan iṣebḥen!”, maca i umezřuḍ ad as tinim: “Cek bedd diha!” niɣ: “Qqim zzat i tnebdat n iḍaren nneɣ!”, 4 ma war ttemṣurrufem xenni jar awem s iɣembab uca tdewřem d řḥukkam s ixarriṣen iɛeffanen?

5 Sřem, a aytma iɛizzen, ma war ǧin imezřaḍ n ddunect-a d bu-wagřa di l’iman? Aqa ixḍar-i-ten AREBBI, ḥima ad iřin d iwriten n Tgeldit i zzayes iwaɛd AREBBI i yinni t ittexsen. ◘2:5 Uf. 20:6; 1 Ṣm. 2:30; Awřn. 8:17; Mt. 5:3; Yḥ. 7:48; 1 Kur. 1:26-29. 6 Maca kenniw tɣeṭṭrem zeg imezřaḍ! Xzar, ma war ǧin d inni s wagřa d inni xawem iḥekkmen u d inni kenniw ineddhen ɣar řfusina? 7 Xzar, ma war ǧin d nitni inni ittceqqafen deg Yisem iṣebḥen wenni xawem ittwařaɣan? 8 Maca mařa tkemmřem Ccariɛa n AREBBI di man aya am mammec tura: “Ad texsed jjar nnec am yixef nnec!”, aqa tᵉtteggem mliḥ, ◘2:8 Lawi 19:18; Mt. 22:39; Mk. 12:31; Rum. 13:9; Gal. 5:14; Afa. 5:2; 1 Ts. 4:9. 9 maca mařa teggim s wudmawen, aqa tᵉtteggem ddnub uca ad tᵉttwaḥekmem s Ccariɛa am yinni ixḍan ak-d Ccariɛa.

10 Minzi wenni iḍfaren marra Ccariɛa, maca yarẓa ict n tewṣeyyet, aqa netta d bu-umarwas zi Ccariɛa marra. ◘2:10 Aɛwd. 27:26; Mt. 5:19; Gal. 3:10. 11 Minzi wenni innan: “War zenni!”, inna ɛawed: “War neqq!” Mařa war teznid, maca tenɣid, aqa cek d axeṭṭay n Ccariɛa. ◘2:11 Uf. 20:13, 14; Aɛwd. 5:17, 18; Mt. 5:27. 12 Siwřem uca ggem am yinni i ɣa ittwaḥekmen s tebridt n Ccariɛa n tiřelli. 13 Minzi řḥukm war yareḥḥem ca x wenni tuɣa war yareḥḥmen, maca s arreḥmet ad tiřim tᵉttwassuɛřam x řḥukm. ◘2:13 Mt. 6:15; 18:35; Mk. 11:25; Lk. 16:25.

14 A aytma, man řefḍeř mařa ijjen iqqar: “Necc aqa ayi ɣari l’iman!”, maca netta war ɣares bu řexdayem? Ma izemmar l’iman nnes ad t issenjem? ◘2:14 Mt. 7:26; Yaɛ. 1:23. 15 Mařa ittxeṣṣa as i yijj n tewmat niɣ i yict n twečmat min ɣa yarḍen niɣ min ɣa ccen kuř ass, ◘2:15 Lk. 3:11; 1 Yḥ. 3:17. 16 uca ijjen zzaywem ad asen yini: “Uyurem di řehna, arḍem min isseḥman, jjiwnem macca!”, maca war d asen iwci walu min ittxeṣṣan i arrimet, man nnfaɛ? 17 Aqa ammu uřa d l’iman břa řexdayem, aqa immut s ixef nnes.

18 Mařa ad ac inna ijjen: “Cek ɣarek l’iman, necc ɣari řexdayem!” Scen ayi l’iman nnec břa řexdayem uca necc ad ac ssecneɣ l’iman inu zi řexdayem inu! 19 Ma cek tumned belli AREBBI d ijjen? Aqa teggid mliḥ. Uřa d ccwaṭen umnen di man aya uca ttarjijen. 20 Ma texsed ad tessned, a bnadem iḍeɛfen, belli l’iman břa řexdayem immut? 21 Ma war ittwasegged jedditneɣ Ibrahim zi řexdayem umi ikkar ad iɣarṣ i mmis Isḥaq x uɛalṭar? ◘2:21 Amz. 22:10. 22 Aqa teẓrim belli l’iman nnes tuɣa ixdem ak-d řexdayem nnes, uca l’iman ittwakemmeř s řexdayem. 23 Ammu ittwakemmeř wawař n Tira Iqeddsen i iqqaren: “Ibrahim yumen di AREBBI uca ittwaḥseb as-t-i-dd d tasegda!”, uca řaɣan as ‘ameddukkař n AREBBI’. ◘2:23 Amz. 15:6; Rum. 4:3; Gal. 3:6.

24 Tᵉttwařam xenni, belli bnadem ittwasegged zi řexdayem, war iǧi zi l’iman waha.

25 Ma war tuɣi Raḥab, tamɣart n farq-ccɣeř, tᵉttwasegged ammu zi řexdayem umi tareḥḥeb zeg ibergagen, tessuffeɣ i-ten zeg webrid nneɣni? ◘2:25 Yac. 2:1; 6:23; Ɛbr. 11:31. 26 S uya, am arrimet břa buḥbeř temmut, ammu uřa d l’iman břa řexdayem immut.