1 Asargab n Yasuɛ Lmasiḥ i d as iwca AREBBI, ḥima ad isscen i imsexxaren nnes min ittxeṣṣa ad imsar deɣya, uca issargeb i-t am t issekk s ufus n lmalak nnes i umsexxar nnes Yuḥanna. 2 Wanita iched x Wawař n AREBBI u zi cchadet n Yasuɛ Lmasiḥ u zi marra min iẓra, 3 Sseɛd n wenni iqqaren d yinni ittesřan awařen n nnubuwa-ya u qqimen ttᵉṭṭfen di min daysen yuran, maɣar aqa řweqt tiweḍ-dd. ◘1:3 Asa. 22:7, 10.

4 Yuḥanna, i sebɛa n tmesmunin di Asiya: Ad kidwem yiři arḍa d řehna zeg wenni iǧan d wenni tuɣa d wenni dd ɣa yasen, uřa zi sebɛa n Arruḥat nni iǧan zzat i řɛarc nnes, ◘1:4 Uf. 3:14; Asa. 1:8; 4:8; 11:17; 16:5. 5 u zi Yasuɛ Lmasiḥ, Acehhad amtiqqi, Amenzu n imettinen d Ameqqran n ijeǧiden n temmurt. I wenni d aneɣ ittexsen u d aneɣ ifekken zi ddnub nneɣ s Idammen nnes, ◘1:5 Ica. 55:4; Řex. 20:28; 1 Kur. 15:20; Kul. 1:18; Ɛbr. 9:12, 14; 1 Bṭ. 1:19; 1 Yḥ. 1:7; Asa. 3:14; 5:9. 6 d wenni yarr aneɣ d ict n Tagelda n ikehhanen ɣar AREBBI d Babas, i Netta ad ɣares yiři uɛuǧi d ṣṣulṭa i řebda qaɛ. Amin! ◘1:6 Rum. 12:1; 1 Bṭ. 2:5, 9; Asa. 5:10.

7 Xzar, Netta ad dd-yas ak-d iseynuten, kuř tiṭṭ ad t tẓar, uřa d inni t issnuqqben. Marra tiqebbař n temmurt ad xas wtent agejdur. Wah, amin! ◘1:7 Dan. 7:13; Zak. 12:10; Mt. 24:30; 25:31; Yḥ. 19:37; Řex. 1:11; 1 Ts. 1:10; 2 Ts. 1:10; Yah. 14.

8 Necc d Alif d Taw, Amezwaru d Uneggaru, iqqar SIDI AREBBI, d wenni iǧan d wenni tuɣa d wenni dd ɣa yasen, Amzemmar x kuřci. ◘1:8 Ica. 41:4; 44:6; Asa. 21:6; 22:13.

9 Necc, Yuḥanna, umatwem d umɛacar nwem di řmeḥnet u di ṣṣbar nni iǧan di Yasuɛ, tuɣa ayi di tegzirt qqaren as Batmus di ṭṭweɛ n Wawař n AREBBI d cchadet n Yasuɛ Lmasiḥ. 10 Usiɣ-dd di Arruḥ deg wass amezwaru n ssimana uca sřiɣ awarni ayi ict n tmijja tejhed am usuḍi deg uyicc n ucarri, ◼1:10 deg wass amezwaru n ssimana - aqa-t deg wass n Umensi Iqeddsen n Arebbi umi ttidaren řmuminin (di mkuř ssimana) řmewt n Yasuɛ Lmasiḥ di tmesmunin.  ◘1:10 Asa. 4:2. 11 teqqar: “Min tᵉttwařid, ari t deg ijj n wedlis ittwanḍen, ssekk i-tt-i-dd i sebɛa n tmesmunin: ɣar Afasus, ɣar Smirna, ɣar Pirɣamus, ɣar Tiyatira, ɣar Sardis, ɣar Filadilfiya uca ɣar Layudikiya.”

12 Xenni nnqeřbeɣ, ḥima ad ssneɣ wi kidi issawařen. Ařami nnqeřbeɣ, ẓriɣ sebɛa n řeqnadeř n wureɣ. 13 Di řwesṭ n řeqnadeř ijjen am Mmis n bnadem, tuɣa yarḍ apalṭu n ukehhan u ɣares ijj n webyas n wureɣ x idmaren. ◘1:13 Ḥiz. 1:26; Dan. 7:13; Asa. 14:14. 14 Azeǧif nnes d ucuwwaf nnes tuɣa aten d icemřařen am taḍuft, am wedfeř, uca tiṭṭawin nnes am yiḥudaq n tmessi, ◘1:14 Dan. 7:9; Asa. 19:12. 15 iḍaren nnes am nnḥas zi Lubnan, iḥman deg ufarran, u řḥess nnes am řḥess n waṭṭas n waman. ◘1:15 Asa. 14:2. 16 Tuɣa ɣares deg ufus nnes afusi sebɛa n yetran uca zeg uqemmum nnes itteffeɣ-dd zzayes lansa iqḍeɛ uca aɣembub nnes am tfuct s jjehd nnes. ◘1:16 Ica. 49:2; Afa. 6:17; Ɛbr. 4:12; Asa. 2:16; 19:15.

17 Ařami t ẓriɣ, wḍiɣ as ɣar iḍaren nnes axmi mmuteɣ uca Netta issars xafi afus nnes afusi, inna: “War tteggʷed ca! Aqa Necc d Amezwaru d Uneggaru, ◘1:17 Ica. 41:4; 44:6; 48:12. 18 Necc d wenni iddaren, u Necc tuɣa mmuteɣ, u xzar, aqa Necc d wenni iddaren i řebda qaɛ! Aqa ɣari tsarut n řmewt d řaxart. ◘1:18 Ayub 12:14; Ica. 22:22; Rum. 6:9; Asa. 3:7; 20:1. 19 S uyenni ari min teẓrid uřa d timesřayin nni iǧan d timesřayin nni i ɣa imsaren awarni man aya. 20 Aqa ssirr n sebɛa n itran i teẓrid deg ufus inu afusi u ssirr n sebɛa n řeqnadeř n wureɣ d wa: sebɛa n itran aqa aten d lmalakat n sebɛa n tmesmunin uca sebɛa n řeqnadeř, aqa aten d sebɛa n tmesmunin.”