55
Asem-dd ɣar waman
1 “A, marra inni iffuden, asem-dd ɣar waman, wenni war ɣar ǧint tenɛacin, asem-dd, sɣem, ccem, wah, asem-dd uca sɣem binu d uɣi, břa tinɛacin u břa ttaman. ◘55:1 Yḥ. 7:37,38; Asa. 22:17, 20 2 Mayemmi twezznem nnuqart i min war iǧin d aɣrum u mayemmi tjehdem i min war ijjiwnen? Sřem-dd ɣari mliḥ, ccem min icnan uca ejj řeɛmar nwem ad iɣebba tadunt. 3 Wcem amezzuɣ uca asem-dd ɣari, sřem, xenni ad iddar řeɛmar nwem, maɣar Necc ad akidwem ggeɣ ijj n Řɛahd i řebda, timegga n tmexsiwt n řaman icewwaren n Dawud. ◘55:3 Řex. 13:34
4 Xzar, ggiɣ t d acehhad i ccuɛub, d řḥakem, d bab n řumur i ccuɛub. 5 Xzar, ad třaɣid ijj n řgens i war tessined, u řgens i war cek issinen ad ɣarek dd-yas di ṭṭweɛ n SIDI, AREBBI nnec, u di ṭṭweɛ n Umqeddas n Israil, minzi Netta issɛuǧa cek.”
6 “Arzum x SIDI řami Netta ittejja ixef nnes ad ittwaf, řaɣam as řami dd-yudes Netta. 7 Ejj aɛeffan ad ismeḥ deg webrid nnes uca aryaz n řɣecc deg ixarriṣen nnes. Ejj i-t ad dd-idweř ɣar SIDI, xenni Netta ad as izziǧez, u ɣar AREBBI nneɣ, maɣar Netta iɣeffar aṭṭas n twařawin.
8 Maɣar ixariṣṣen inu war ǧin am yixariṣṣen nwem u ibriden inu war ǧin am yibriden nwem, iqqar SIDI. 9 Maɣar am mammec uɛřan ijenwan x temmurt, ammu i yuɛřan ibriden inu x ibriden nwem u ixarriṣen inu x ixarriṣen nwem. 10 Maɣar am mammec i dd-ihekkwa wenẓar d wedfeř zeg ujenna u war ɣares dd-iddikkwiř ca, maca issuffa tammurt d amezwaru uca ittarra i-tt ad tewc řɣiǧet, ad tawi aɣemmuy uca awarni as ittic zzariɛet i wenni iẓarrɛen d weɣrum i wenni ittetten, 11 ammu i ɣa yiři uřa d awař i dd-itteffɣen zeg uqemmum inu. War dd ɣari iddikkwiř ixwa, maca ad yegg min xseɣ u ad yaweḍ marra min ɣar t ssekkeɣ.”
12 “Maɣar ad teffɣem s řefraḥet uca ad kenniw ssqebbḍen di řehna. Idurar d tewririn ad dduqqzen s usřiwřew zzat i wudem nwem u marra ticejjura n yeyyar ad wtent camxa s ifassen. ◘55:12 1 Im. 16:33 13 Deg wemcan n usennan ad teɣmi tcejjart n umerzi, deg wemcan n tzeggʷart ad teɣmi tcejjart n tariḥant. Aya ad yiři i SIDI, i ccan n Yisem nnes, i řeɛřamet n řebda i war imeḥḥin ɛemmarṣ.” ◼55:13 amerzi - niɣ ‘ameḍzi’.
◘55:1 55:1 Yḥ. 7:37,38; Asa. 22:17, 20
◘55:3 55:3 Řex. 13:34
◘55:12 55:12 1 Im. 16:33
◼55:13 55:13 amerzi - niɣ ‘ameḍzi’.