1 Uca netta isscen ayi ijj n iɣzar izdig n Waman Iddaren, d amezdag, iṣfa am ukristal, i dd-itteffɣen zi řɛarc n AREBBI u n Yezmar. ◘22:1 Ḥiz. 47:1; Zak. 14:8. 2 Di řwesṭ n wazzay nnes, x tma-ya u x tma nni n iɣzar, tuɣa Tacejjart n Tudart tenni tessenḍay řɣiǧet tenɛac n twařawin. Di mkuř ayur tettic řɣiǧet nnes d tifray nnes i usgenfu n řegnus. ◘22:2 Ḥiz. 47:1-12; Asa. 2:7. 3 War dayes tᵉttiři ɛad nneɛřet. Ad dayes yiři řɛarc n AREBBI u n Yezmar uca imsexxaren nnes ad xas sexxaren. 4 Nitni ad ẓaren udem nnes, Isem nnes ad yiři x tenyarin nsen. ◘22:4 Asa. 3:12. 5 War din tᵉttiři ǧiřet uca nitni war tteḥdijen ɛad ṭṭya n řefnarat niɣ n tfawin niɣ n tfawt n tfuct, minzi SIDI AREBBI ad asen igg tafawt uca ad yiři d Ajeǧid nsen i řebda qaɛ. ◘22:5 Ica. 60:19; Zak. 14:7; Asa. 21:23.

6 Xas uca inna ayi:

“Awařen-a daysen řaman d tidett!

SIDI, AREBBI n Arruḥ n inabiyyen iqeddsen,

aqa issekk lmalak nnes,

ḥima ad isscen i imsexxaren nnes

min i ɣa yiřin deɣya.” ◘22:6 Asa. 1:1; 19:9; 21:5.

7 “Xzar Necc ad dd-aseɣ deɣya!

Sseɛd n wenni ittᵉṭṭfen

deg wawařen n nnubuwat

n Wedlis-a ittwanḍen.” ◘22:7 Asa. 1:3.

8 Necc, Yuḥanna, aqa ẓriɣ u sřiɣ timesřayin-a. Uca řami tent ẓriɣ u sřiɣ, wḍiɣ ɣar iḍaren n lmalak wenni d ayi issecnen timesřayin-a, ḥima ad as ɛebdeɣ. 9 Maca netta inna ayi:

“Ḥḍa, lla, war ttegg man aya,

maɣar necc d amsexxar amɛacar nnec,

u n aytmac, inabiyyen, uřa n yinni ittᵉṭṭfen

deg wawařen n Wedlis-a ittwanḍen.

Ɛebdet AREBBI!” ◘22:9 Řex. 10:26; 14:14; Asa. 19:10.

10 Xas uca inna ayi:

“War ttegg acemmiɛ x wawařen i ittwanabben

deg Wedlis-a ittwanḍen,

minzi řweqt aqa tiweḍ-dd.” ◘22:10 Dan. 8:26; 12:4; Asa. 1:3.

11 “Wenni itteggen min war iseggden,

ad igg min war iseggden ktar,

amengus ad idweř d amengus ktar,

amseggad ad igg tasegda ktar

uca amqeddas ad idweř d amqeddas ktar.”

12 “Xzar, Necc ad dd-aseɣ deɣya

uca řmunet inu aqa-tt akidi,

ḥima ad xeǧṣeɣ kuř ijjen

anect n řxedmet nnes. ◘22:12 Izhd. 62:13; Irm. 17:10; 32:19; Mt. 16:27; Rum. 2:6; 14:12; 1 Kur. 3:8; 2 Kur. 5:10; Gal. 6:5; Asa. 2:23.

13 Necc d Alif u Necc d Taw,

d Amezwaru d Aneggaru,

d Beddu d Akemmeř.” ◘22:13 Ica. 41:4; 44:6; 48:12; Asa. 1:8; 21:6.

14 “Sseɛd nsen i yinni itteggen tiweṣṣa nnes.

Ad ɣarsen tiři ṣṣulṭa x Tcejjart n Tudart

uca ad dd-adfen ɣar tendint

zi tewwura nnes.

15 Barra iǧan inni itteggen farq-ccɣeř

d yinni ineqqen

d yinni iɛebbden l’aṣnam

d yinni daysen řexmej

d yinni ittseḥḥaren d marra imwařawen

d inni itteggen min i dd-itteffɣen

zeg uxarriq.” ◘22:15 1 Kur. 6:10; Afa. 5:5; Kul. 3:5, 6.

16 “Necc, Yasuɛ, aqa ssekkeɣ lmalak inu

maḥend ad xawem iched man aya

zzat i tmesmunin.

Aqa d NECC, d Aẓwar d Zzariɛet n Dawud,

d Wenni akides,

d Itri n Řefjar yareqqen.” ◘22:16 Ica. 11:10; Rum. 15:12; 2 Bṭ. 1:19; Asa. 1:1; 5:5.

17 Arruḥ d tesřit qqaren:

“As-dd!”

Uca ejj wenni t isřin, ad yini:

“As-dd!”

“D wenni ifuden, ejj i-t ad dd-yas,

ad isu Aman Iddaren baṭeř.” ◘22:17 Ica. 55:1; Yḥ. 7:37

18 “Necc cehhdeɣ i marra inni ittesřan

i wawařen n nnubuwa n Wedlis-a ittwanḍen:

Mařa din ḥed wenni xasen i ɣa yarnin,

AREBBI ad xas yarni jjrayeḥ,

tinni ittwazemmemen deg wedlis-a.

19 Mařa ca n ijjen ikkes zeg wawařen

n Wedlis ittwanḍen n nnubuwa-ya,

ad as ikkes AREBBI tasɣart nnes

zi Tcejjart n Tudart u zi Tendint iqeddsen.” ◘22:19 Aɛwd. 4:2; 12:32; Awřn. 30:6; Asa. 13:8; 17:8.

20 Xmi Netta iched x man aya, inna:

“Wah, Necc ad dd-aseɣ deɣya!”

“As-dd, a SIDI Yasuɛ!”

21 Arḍa n Siditneɣ Yasuɛ Lmasiḥ aqa-t ak-d marra imqeddasen nnes. “Amin!”

Aneggar n Řɛahd n Jdid.

Aɛuǧi i Yisem n AREBBI,

Babatneɣ d Siditneɣ Yasuɛ Lmasiḥ

d Arruḥ Iqeddsen.