1 “Xzaret, ad dd-yas ijj n wass i SIDI i di i ɣa tᵉttwabḍa tkeccaḍt nnem di řwesṭ nnem! ◘14:1 Yuw. 2:10, 31; 3:15; Ica. 13:6-13; 24:23; Am. 8:9; Mt. 24:29; Řex. 2:20; Asa. 6:12-13 2 Necc ad ssmuneɣ marra řegnus i umenɣi ak-d Urcalim. Tandint ad tᵉttwaṭṭef, tudrin ad ttwakeccḍent, timɣarin ad ttwassnuqqbent u azyen n tendint ad ittwandeh di lmenfa, maca min iqqimen n řgens war ggur ca ad ittwaqḍeɛ. ◘14:2 Ica. 13:16 3 SIDI ad iffeɣ u Netta ad immneɣ ak-d řegnus am deg wass n umenɣi, deg wass n ittmenɣa řebda deg wass n wehjam. ◘14:3 Ica. 42:13

4 Deg wass nni ad bedden iḍaren nnes x wedrar n Zzitun wenni qibač i Urcalim, ɣar ccarq. Adrar n Zzitun ad ittwafeǧeq di tnayen n iziynat, jjihet n ccarq u jjihet n řebḥar, maḥend ad din tiři ict n teɣzurt d tameqqrant. Azyen n wedrar ad imeyyeř ɣar ccamal u azyen nneɣni n wedrar ad imeyyeř ɣar ljanub. ◘14:4 Řex. 1:11 5 Uca kenniw ad tarewřem zi hekkwu n idurar inu, maɣar taɣzurt n idurar ad dd-taweḍ ař Aṣal u kenniw ad tarewřem am mammec tarewřem kenniw zeg wenhezzi n temmurt deg wussan n Ɛuzziya, ajeǧid n Yahuda, uca SIDI, AREBBI inu, ad dd-yas u marra imqeddasen akidek. ◘14:5 Ɛam. 1:1

6 Deg wass nni ggur ad imsar aqa war tᵉttiři tfawt, itran ittissiqen ad tᵉttwakemmcen. 7 Ad yiři d ijj n wass ittwafarz, ad yiři ittwassen ɣar SIDI. War iǧi d ass uřa d ǧiřet. Ad imsar ɣar řweqt n uɛecci ad tiři tfawt.◘14:7 Asa. 21:25

8 Deg wass nni ad imsar aqa aman iddaren ad dd-ffɣen zi Urcalim, azyen zzaysen ɣar řebḥar acarqi u azyen nneɣni ɣar řebḥar n řɣarbi. Ammu i ɣa yiři deg unebdu u di tgarst. ◼14:8 řebḥar - niɣ ‘il’. tagerst - niɣ ‘řmecṭa’.  ◘14:8 Ḥiz. 47:1-12; Yuw. 4:18; Asa. 22:1 9 SIDI ad yiři d ajeǧid x marra tammurt.

Deg wass nni ad yiři Netta d ayenni n SIDI u Isem nnes d ayenni n Yisem. 10 Marra tammurt ad tedweř am Řewḍa, zi Jabɛa ař Rimmun, ɣar jjihet n ljanub n Urcalim. Tandint ad tᵉttwassgeɛɛed u ad dayes zedɣen iwdan deg wemcan nnes, zi Tewwart n Binyamin ař amcan n Tewwart i din tuɣa zic, ař tawwart n Teɣmart, u zi lburj n Ḥananiyil ař tisarin n weḥray n ddiřect n ujeǧid. 11 Nitni ad dayes zedɣen u war ittiři ɛad uřa d ijj n uḥarrem i uteḥḥi, minzi Urcalim ad yiři d amcan mani ɣa zeddɣen di řaman.

12 Ta ad tiři d ticti i zi ɣa iwwet SIDI marra řegnus nni immenɣen ak-d Urcalim: Netta ad yarr arrimet n kuř bnadem ad ikkiccu am netta ɛad ibedd x iḍaren nnes u tiṭṭawin nnes ad kkiccwent deg ixubac nsen u iřes nnes ad ikkiccu deg uqemmum nnes. ◼14:12 aqemmum nnes - s Tɛibranit ‘aqemmum nsen’.

13 Deg wass nni ggur ad imsar aqa ijj n umxarweḍ d ameqqran zi SIDI ad idweř jar asen, ařami ɣa iṭṭef kuř ijj afus n jjar nnes u xenni afus n kuř ijjen ad inneqřeb ḍidd i ufus n jjar nnes. 14 Ɛad ad immneɣ Yahuda di Urcalim uca ad ttwassmunen wagřa n marra řegnus i d as dd-innḍen: ureɣ d nnuqart d warruḍ aṭṭas s waṭṭas. 15 Ammu i ɣa tiři ɛawed tecti n uyis d usardun d weřɣem d yeɣyař d marra řmař nni iǧan di řɛeskarat, aqa ticti-ya ad ten teřqef.

16 Xenni ad imsar aqa marra inni iqqimen zi marra řegnus nni dd-yusin ɣar Urcalim i řeḥṣaret, ad geɛɛden zeg useggʷas ař aseggʷas, ḥima ad bendqen zzat i Ujeǧid, i SIDI n řɛeskarat u ḥima ad ɛeyyden Řɛid n Iɛuccuten. ◘14:16 Ica. 66:23 17 Ad imsar belli man wen zi řaǧat n temmurt war dd-ittgiɛɛid ca ɣar Urcalim ḥima ad ibendeq i ujeǧid, i SIDI n řɛeskarat, aqa war xas iweṭṭi ca wenẓar. 18 Mařa řaǧ n Miṣra war dd-igeɛɛed u war dd-tusi ca, xenni war xasen iccit wenẓar. Ta ad tiři d ticti i zi ɣa iřqef SIDI řegnus nni war din ittgiɛɛiden ca ḥima ad ɛeyyden ficta n Řɛid n Iɛuccuten. 19 Ta ggur ad tiři d ticti i ddnub n Miṣra uřa d ticti i marra řegnus, inni war din ittgeɛɛeden, ḥima ad ɛeyyden Řɛid n Iɛuccuten.

20 Deg wass nni ggur ad yiři x tnaqusin n yeysan ‘D AMQEDDAS i SIDI!’ Ttnajar di Taddart n SIDI ad iřin am ṭṭawyat i urucci zzat i uɛalṭar. 21 Marra ttnajar di Urcalim u di Yahuda ad iřin qeddsen i SIDI n řɛeskarat u marra inni i dd ɣa yasen ḥima ad qeddmen tiwhibin, ad zzaysent ksin u ad daysent ssnennan.

Deg wass nni war din ittiři uřa d ijj n Ukenɛani di Taddart n SIDI n řɛeskarat.” ◘14:21 Ica. 35:8; Yuw. 4:17; Asa. 21:27; 22:15