1 Awařen n Ɛamus, wenni tuɣa iǧan jar imeksawen n Taquɛa, awařen i iẓra x Israil, deg wussan n Ɛuzziya, ajeǧid n Yahuda, d Yarubɛam, mmis n Yuwac, ajeǧid n Israil, tnayen n iseggʷusa qbeř i wenhezzi n temmurt. ◘1:1 Zak. 14:5

2 Netta inna: “SIDI ad izehhar zi Ṣihyun, ad issgeɛɛed tmijja nnes zi Urcalim. Ddmani n tarewsa ad ceḍnent u taqiccet n Karmil ad tisřaw.” ◘1:2 Irm. 25:30; Yuw. 4:16

3 “Ammu i iqqar SIDI: X třata n ixeṭṭan i igga Dimacq, ɛad mahu x arebɛa, war t ssbeṭṭařeɣ, minzi nitni ssarwaten Jilɛad s teřwiḥin itteḥřuǧuḍen n wuzzař i usarwet. 4 Ad ssekkeɣ timessi di taddart n Ḥazayil, ad tecc řeqṣur n Binhadad. 5 Ad arẓeɣ zzekrun n Dimacq u ad mḥiɣ wenni izeddɣen zi Buqɛa-Awan, zi řewḍa n wareddeǧ, d wenni zi taddart n meẓri i yarebbun azeǧaḍ, u řgens n Aram ad ittwandeh di tmeḥbast ɣar Qir!, inna SIDI.” ◘1:5 2 Ij. 16:9; Ica. 17:1-11; Irm. 49:23-27

6 “Ammu i inna SIDI: X třata n ixeṭṭan i igga Ɣazza, ɛad mahu x arebɛa, war t ssbeṭṭařeɣ, minzi nitni iwyen řgens inu qaɛ di lmenfa, ḥima ad t sellmen i Idum. ◘1:6 2 Im. 21:16, 17; 28:18 7 Ad ssekkeɣ timessi daxeř di řeḥyuḍ n Ɣazza, ad tecc řeqṣur nnes. 8 Necc ad teḥḥiɣ amezduɣ zi Acdud u zi Acqalun wenni yarebbun azeǧaḍ u Necc ad ksiɣ afus inu ḍidd i Ɛaqrun u min iqqimen n ayt n Ifilisṭiniyyen ad ittwahellek, iqqar Sidi inu, SIDI.”

9 “Ammu i inna SIDI: X třata n ixeṭṭan i igga Ṣur, ɛad mahu x arebɛa, war t ssbeṭṭařeɣ, minzi nitni sellmen řgens inu qaɛ di lmenfa i Idum, war idaren řɛahd ak-d wawmaten nsen. 10 S uyenni ad ssekkeɣ timessi daxeř di řeḥyuḍ n Ṣur, ad tecc řeqṣur nnes.”

11 “Ammu i inna SIDI: X třata n ixeṭṭan i igga Idum, ɛad mahu x arebɛa, war t ssbeṭṭařeɣ, minzi netta iḍfar awmaten nnes s ssif u issɛiǧi arreḥmet nnes, u minzi aɣḍab nnes iqqim icarreg břa qeṭṭu, u minzi aheddi n uduqqez nnes n ufugem iqqim issaggwad řebda. 12 Necc ad ssekkeɣ timessi di Tayman, ad tecc řeqṣur n Buṣra.”

13 “Ammu i inna SIDI: X třata n ixeṭṭan i iggin ayt n Ɛammun, ɛad mahu x arebɛa, war t ssbeṭṭařeɣ, minzi nitni carrgen timɣarin s ddeyset zi Jilɛad, ḥima ad sswessɛen tammurt nsen. 14 Necc ad ssarɣeɣ ict n tmessi daxeř i řeḥyuḍ n Rabba, ad tecc řeqṣur nnes, ɣar iɣuyyan deg wass n umenɣi, am isuḍ usemmiḍ deg wass n tḥaryaḍt. 15 Ajeǧid nsen ad yuyur di lmenfa, netta ak-d řḥukkam nnes, inna SIDI.”