1 Deg useggʷas wiss třata n tgelda n ujeǧid Balcaṣṣar, iban-ayi-dd ijj n řewḥiy, i necc Daniyal, awarni i řewḥiy amezwaru nni tuɣa i d ayi dd-ibanen. 2 Necc tuɣa ttwařiɣ deg ijj n řewḥiy u ẓriɣ tuɣa ayi di lburj n Cucan nni iǧan di lɛamala n Ɛilam. Necc ttwařiɣ di řewḥiy tuɣa ayi ɣar yeɣzar n Ulay.

3 Necc ssgeɛɛdeɣ tiṭṭawin inu, u xzar, ijj n icarri ibedd zzat i iɣzar. Tuɣa ɣares tnayen n waccawen u tnayen nni n waccawen tuɣa aten d iziraren. Tuɣa ijj n yicc zzaysen yuɛřa x wenneɣni u wenni yuɛřan igeɛɛed d aneggar. 4 Necc ẓriɣ aqa icarri iccat s waccawen nnes ɣar řɣarb u ɣar ccamal d ljanub. Uřa d ijj n umuddar izemmar ad ibedd zzates u war iǧi wi ɣa inejmen zeg ufus nnes. Netta igga min ixs u issemɣar ixef nnes.

5 Necc qqimeɣ ḥekkareɣ, u xzar, yusa-dd ijj n wemyan zi lɣarb x marra udem n temmurt, war iḥidi tammurt. Amyan-a ɣares ijj n ddeg n yicc jar tiṭṭawin nnes ɣares řqimet. 6 Netta yiweḍ-dd ɣar icarri nni i ɣar iǧa tnayen n waccawen, wenni ẓriɣ ibedd zzat i iɣzar. Iqarreb-dd ɣares s tezřa ak-d řeqsaḥet n jjehd nnes, 7 u ẓriɣ aqa yiweḍ ɣar uɣezdis n icarri u iccat dayes s teyyita qesḥent. Netta imqarqeb ak-d icarri u yarẓa as tnayen n waccawen nnes uca icarri tuɣa war ɣares jjeḥd ɛad maḥend ad iqqim ibedd. Inḍar i-t ɣar temmurt u yarfes i-t u tuɣa war din wi t ɣa ifekken zeg ufus nnes.

8 Amyan issemɣar ixef nnes ař ṭṭarf, maca ařami idweř ijhed, yarẓa yicc nni ameqqran uca xeřfen-dd deg wemcan nnes arebɛa n waccawen ittbanen ɣar jjwayeh n arebɛa n iɣezdisen n usemmiḍ n ujenna.

9 Zeg yijj zzaysen iffeɣ-dd ijj n yicc d ameɛnan uca idweř d ameqqran ař ṭṭarf, ɣar ljanub u ɣar ccarq u ɣar Temmurt n Telwizt. 10 Idweř imɣar igeɛɛed ař řɛeskar n ujenna uca inḍar-dd ca zi řɛeskar u zi yetran ɣar temmurt uca yarfes i-ten. 11 Wah, issemɣar ixef nnes ařami dd-yiweḍ ɣar Řḥakem n řɛeskar. Wanita tᵉttwakkes zzayes tewhibt n řebda u immenḍar wemcan n Zzawect nnes Iqeddsen. 12 Ad ittwagg ijj n řɛeskar x tewhibt n řebda zi ssibbet n ijj n uɛeddi uca temmenḍar-dd tidett x temmurt u marra min igga, iffeɣ as-dd.

13 Awarni uya sřiɣ i yijj n umqeddas issawař u inna ijj n umqeddas nneɣni i wenni tuɣa issawařen: “Ař meřmi ɣa yiři řewḥiy n tewhibt n řebda d nnɛi n řmuɛṣiyyet, aqa ad tᵉttwasellem Zzawect Iqeddsen d řɛeskar maḥend ad ttwarefsen?”

14 U netta inna ayi: “Ař ařfayen d teřt-mya n tmedditin d tuffutin, xenni Zzawect Iqeddsen ad tᵉttwassegged.”

15 Uca imsar, řami necc, Daniyal, ẓriɣ řewḥiy nni u arzuɣ ad ssneɣ řmeɛna nnes, xzar, aqa da ibedd zzati am waddud n ijj n Weryaz. 16 Uca sřiɣ tmijja n ijj n Bnadem jar temmawin n iɣzar n Ulay, iřaɣa, inna: “Jibril, fessar as řewḥiy!” ◘8:16 Dan. 9:21; Lk. 1:26 17 Uca yusa-dd ɣar uɣezdis inu mani tuɣa ttbeddiɣ u řami dd-yusa, nnxeřɛeɣ u wḍiɣ x uɣembub inu. Xenni inna ayi: “A mmis n bnadem, ssen aqa řewḥiy iřeqqef řweqt n uneggar.” 18 Řami tuɣa akidi issawař, hwiɣ s uɣembub inu ɣar temmurt deg yijj n yiḍeṣ yuǧeɣ. Xenni iḥada ayi, issbedd ayi x iḍaren, 19 inna: “Xzar, ad ac ssecneɣ min ɣa imsaren ɣar uneggar n řweqt-a n wesxeḍ, maɣar aneggar ad yiři di řweqt ittwaggen.

20 Icarri nni teẓrid, aqa ɣares tnayen n waccawen. Ina d ijeǧiden n ayt n Maday d ayt n Lfurs. 21 Amyan nni s ucuwwaf, netta d ajeǧid n Yawan, ixs ad yini n Lyunan u icc ameqqran i iǧan jar tiṭṭawin nnes d ajeǧid amezwaru. 22 Icc nni ittwarẓ, xeřfen t arebɛa nneɣni deg wemcan nnes, man aya ixs ad yini zi řgens nnes ad kkarent arebɛa n tgeldiwin, maca war iǧi s jjhed nnes. 23 Deg uneggar n tgelda nsen, umi kemmřen inni ittɛeddan ař řqedd nsen, ad dd-ikkar ijj n ujeǧid s wudem iqseḥ u s řeɛqeř n teḥraymect. 24 Jjehd nnes ad imɣar, maca war iǧi zi jjehd n yixef nnes. Netta ad yareddeǧ s utebhet u marra min ɣa yegg ad dayes ifřeḥ. Netta ad yareddeǧ inni ɣar teǧa ṣṣulṭa, uřa d řgens n imqeddasen. 25 S teḥraymect nnes ad as injeḥ řɣecc nni deg ufus nnes u netta ad issemɣar ixef nnes deg wuř nnes u deg ict n tecti ad yareddeǧ aṭṭas u ad iɣewweɣ x Řḥakem n řḥukkam, maca břa ma ikka xas ufus ggur ad ittwarẓ.

26 Řewḥiy n tmedditin d teffutin i xef ssawařen, aqa-tt d tidett. U cek, cemmeɛ řewḥiy-a, maɣar aqa netta ad dd-yas awarni i waṭṭas n wussan.”

27 Necc, Daniyal, tuɣa ḍeɛfeɣ aṭṭas ca n wussan. Xenni kkareɣ-dd u ggiɣ ɛawed řxedmet n ujeǧid. Nnxeřɛeɣ aṭṭas zi řewḥiy-a, maca uřa d ijj war yuci.