1 Tuɣa di Qayṣariya ijj n weryaz, isem nnes Kurniliyus, aqa-t d řqebṭan x mya, inni zi řkumpaniyyet umi qqaren ‘Aṭalyan’. 2 Netta tuɣa ittweqqar u itteggʷed AREBBI ak-d aytbab n taddart nnes marra, ittic aṭṭas n ṣṣdaqi i iwdan uca ikessi s řmeɛruf i AREBBI řebda. 3 Wa iẓra deg ijj n řewḥiy iṣfa aqa ijj n lmalak n AREBBI yudef-dd ɣares ɣar tsaɛɛet wiss tesɛa n wass, ixs ad yini ɣar tsaɛɛet wiss třata n uziř, inna as: “A Kurniliyus!” 4 Umi dayes inḍar tiṭṭawin nnes, iggʷed aṭṭas, inna: “Min din, a Sidi?” Inna as lmalak: “Tiẓaǧitin nnec d ṣṣdaqi nnec iwḍent ɣar řidaret zzat i wudem n AREBBI. 5 Ssekk řexxu iryazen ɣar Yaffa, tɛarḍed x Cimɛun, wenni umi qqaren ɛawed Buṭrus. 6 Xzar, netta yarzef ɣar Cimɛun, wenni iɛeddřen iřmawen, wenni ɣar iǧa taddart ɣar tma n řebḥar.” 7 Umi iruḥ lmalak wenni tuɣa akides issawařen, iřaɣa netta x tnayen n imsexxaren zi taddart nnes u x ijj n uɛeskari itteggʷeden AREBBI, wenni tuɣa iṭaɛ as. 8 Ihaja asen marra min iẓra uca issekk i-ten ɣar Yaffa.

9 Tiwecca nnes, am tuɣa aten deg webrid ttqarraben ɣar tendint, igeɛɛed Cimɛun x tzeqqa ɣar tsaɛɛet wiss setta, aqa-tt d ḍḍhur, ḥima ad iẓẓaǧ. ◘10:9 2 Ij. 4:33; Mt. 6:6. 10 Iǧuẓ aṭṭas uca tuɣa immeẓri ad icc, uca, am tuɣa d as ssewjaden, iwyi t řewḥiy. 11 Iẓra ajenna yarzem uca ict n řqecɛet am yict n tcuqqet tameqqrant zi řeqṭen azdad ittwaṭṭfen zi arebɛa n tɣemmura nnes, tehwa-dd zeg ujenna ɣar temmurt. 12 Tuɣa dayes marra imuddaren n temmurt s arebɛa n iḍaren uřa d imuddaren nni ittbuɛen x temmurt d ijḍaḍ n ujenna. ◼10:12 imuddaren - ixs ad yini ‘iwdan’ d ‘lḥayawanat’ d marra min iddaren nni izemmar ad yuyur. 13 Tusa-dd ɣares ict n tmijja, teqqar as-dd: “A Cimɛun, kkar, ɣarṣ, tecced!” 14 Maca Cimɛun inna: “Lla, a Sidi, war cciɣ ɛemmarṣ min iǧan d řeḥram uřa min war izdigen.” ◘10:14 Lawi 11:4; Aɛwd. 14:7. 15 Tmijja tessiweř ɣares ɛawed i twařa wiss tnayen, teqqar: “Min issizdeg AREBBI, war dd t tᵉttarrid ca cek d řeḥram.” ◘10:15 Mt. 15:11; Rum. 14:17, 20; 1 Tim. 4:4; Tit. 1:15. 16 Man aya imsar třata n imuřen, uca deɣya tᵉttwassgeɛɛed tajartiřt ɛawed ɣar ujenna.

17 Am tuɣa Cimɛun ɛad ittxarraṣ deg ixef nnes min ixs ad yini řewḥiy i iẓra, xzar, usin-dd tnayen n yeryazen inni dd-ittwassekken zi Kurniliyus, sseqsan x taddart mani tuɣa iqqim Cimɛun. Nitni bedden-dd ɣar tewwart n řemraḥ. 18 Řaɣan, sseqsan: “Ma Cimɛun, umi ttkennan Buṭrus, aqa-t danita?”

19 Umi tuɣa Cimɛun ɛad ittxarraṣ di řewḥiy i iẓra, inna as Arruḥ: “Xzar, aqa da třata n yeryazen arezzun xak! 20 Kkar, tehwid-dd, ruḥ akidsen břa ma ad tcekked di ca, minzi d Necc i-ten-dd-issekken.” 21 Řexdenni ihwa Cimɛun ɣar yeryazen nni, inna asen: “Xzar, aqa d necc wenni xef tarezzum. Min ɣar dd-tusim da?” 22 Nnan as: “Kurniliyus, ijj n řqebṭan x mya d ijj n weryaz isegged itteggʷed AREBBI, wenni xef icehhed mliḥ marra řgens n Wudayen, aqa ijj n lmalak iqeddsen tuɣa iɛřem as deg ijj n řewḥiy, maḥend ad dd-issekk ɣarek, ḥima ad cek dd-aywyen ɣar taddart nnes, maḥend ad zzayek iseř ict n tebrat.” 23 Cimɛun issidef i-ten ɣar daxeř, igga ten d inewjiwen mani iqqim. Tiwecca nnes ikkar, iruḥ akidsen u ca n wawmaten inni iǧan zi Yaffa ruḥen akides.

24 Tiwecca nnes awarni as iwḍen ɣar Qayṣariya. Kurniliyus tuɣa ittraja ten am ssmunan ɣares marra aytbab n řaǧ nnes uřa d imeddukkař i-t-i-dd-yudsen aṭṭas. 25 Umi yudef Cimɛun, iřqa t-i-dd Kurniliyus, iwḍa as ɣar iḍaren uca isjed as. 26 Maca issnekkar i-t-i-dd Cimɛun, inna as: “Kkar, aqa uřa d necc d bnadem am cek!” ◘10:26 Řex. 14:14; Asa. 19:10; 22:9. 27 Am kides issawař, yudef uca yufa din aṭṭas inni dd-yusin ttmunan dinni. 28 Inna asen: “Kenniw tessnem aqa war iḥeǧer x weryaz d Uday ad imun ak-d ijj n ubarrani i war dd-iqqarṣen zi teqbič n řgens nnes. Maca AREBBI isscen ayi belli war icuwwar ad řaɣiɣ uřa x ijj n bnadem ixmej niɣ d řeḥram. ◘10:28 Uf. 23:32; 34:15; Aɛwd. 7:2; Yḥ. 4:9; 18:28; Řex. 11:3; 15:8; Afa. 3:6. 29 S uyenni usiɣ-dd ɛawed da břa ma ad cekkeɣ di ca umi xafi tɛarḍed. Maca xseɣ ad kenniw sseqsiɣ, mayemmi d ayi tejjim ad dd-aseɣ?” 30 Inna as Kurniliyus: “Arebɛa n wussan zeg wami tuɣa ttẓummeɣ, uca xzar, ɣar tsaɛɛet wiss tesɛa umi tuɣa ttẓaǧiɣ di taddart inu, aqa din ijj n weryaz ibedd-dd qibač inu s warruḍ d acemřař! 31 Inna ayi: ‘A Kurniliyus, taẓaǧit nnec tᵉttwaseř u ṣṣdaqi nnec iwḍent ɣar řidaret n AREBBI.” ◘10:31 Mt. 28:3; Mk. 16:5; Lk. 24:4. 32 Sekk ijjen ɣar Yaffa, tɛarḍed x Cimɛun wenni umi ttkennan Buṭrus. Xzar, aqa netta d anewjiw di taddart n Cimɛun, wenni iɛeddřen iřmawen, tenni ɣar tma n řebḥar. Netta ad dd-yas uca ad kidek issiweř. 33 S uyenni ssekkeɣ-dd ɣarek řexdenni u cek aqa teggid mliḥ umi dd-tusid da. Neccin marra i da neǧa qibač i cek, nᵉttexs ad nseř marra min zi cek yumur AREBBI.”

34 Yarzem Cimɛun aqemmum nnes, inna: “S tidett, ufiɣ belli AREBBI war ittegg ca s wudmawen. ◘10:34 Aɛwd. 10:17; 2 Im. 19:7; Ayub 34:19; Rum. 2:11; Gal. 2:6; Afa. 6:9; Kul. 3:25; 1 Bṭ. 1:17. 35 Maca wenni t itteggʷeden d wenni itteggen tasegda zi kuř řgens, yusa-dd as x řxaḍar nnes. 36 Maɣar wa d Awař i issekk ɣar ayt n Israil d wenni zi i d asen ibarreḥ: řehna d řhudnet s Yasuɛ Lmasiḥ, wenni d SIDI n marra. ◘10:36 Ica. 9:5; 52:7; Yḥ. 16:33; Rum. 5:1; Kul. 1:20. 37 Kenniw tessnem aqa Awař yiweḍ-dd ɣar marra Yahudiyya, awarni řami ibda zi Ljalil awarni i useɣḍaṣ i zi tuɣa ittbarreḥ Yuḥanna, ◘10:37 Ica. 8:23; 9:1; Mt. 4:12; Mk. 1:14,38, 39; Lk. 4:14. 38 řexbar zi jjihet n Yasuɛ zi Nnaṣira, mammec t idhen AREBBI s Arruḥ Iqeddsen u s jjehd. Netta issara tammurt, igga řxar, issgenfa inni ittwaɣezzan zeg umɛeffan minzi AREBBI tuɣa-t akides. ◘10:38 Izhd. 45:8; Ica. 61:1; Lk. 4:18. 39 Neccin d řechud xas u x marra min igga di temmurt n Yahudiyya u di Urcalim. Aqa uyřen t Wudayen x teḥnact, nɣin t. 40 Wa issnekkar i-t-i-dd AREBBI deg wass wiss třata uca isseḍhar i-t s bṭayṭay, ◘10:40 Mk. 16:14; Lk. 24:34; Yḥ. 20:19; Řex. 2:24; 1 Kur. 15:5. 41 maca war iǧi i marra řgens, maca i řechud inni izwar ixḍar i-ten AREBBI, i neccin inni akides iccin iswin awarni tanukra nnes zi taddart n imettinen. 42 Yumur aneɣ ad nbarreḥ u ad neched i řgens, aqa d Netta d Wenni igga AREBBI d Řqaḍi x yinni iddaren u x yinni immuten. ◘10:42 Mt. 28:19; Mk. 16:15; Yḥ. 15:16; Řex. 17:31. 43 Cehhden xas marra inabiyyen, belli kuř ijjen wenni i ɣa yamnen deg Yisem nnes, ad as ttwaɣfaren ddnub nnes.” ◘10:43 Amz. 3:15; 22:18; 26:4; 49:10; Aɛwd. 18:15; Izhd. 132:11; Ica. 4:2; 7:14; 9:5; 40:10; Irm. 23:5; 33:14; Ḥiz. 34:23; 37:24; Dan. 9:24; Mixa 7:20; Řex. 15:9.

44 Am tuɣa Cimɛun issawař ɛad, ihwa-dd Arruḥ Iqeddsen x marra inni tuɣa ittesřan i wawař. ◘10:44 Řex. 8:17. 45 Tawmat nni ittwaxetnen, inni dd-yusin akides, tbehten, umi tamewci n Arruḥ Iqeddsen ittwafarreɣ ɛawed x yenni iǧan zi řegnus. 46 Minzi tuɣa ten ttesřan ssawařen s ijj n yiřes nneɣni, ssmeɣɣaran di AREBBI. Řexdenni iqqar Cimɛun: ◘10:46 Mk. 16:17; Řex. 2:4. 47 “Ma izemmar ḥed ad iqḍeɛ aman maḥend war ttwasseɣḍiṣen ina? Maɣar, xzar, aqa qebřen Arruḥ Iqeddsen am neccin!” ◘10:47 Řex. 8:36; 11:17. 48 Xenni yumur ad ten ssɣeḍṣen s Yisem n Siditneɣ Yasuɛ Lmasiḥ, uca nitni ttaren zzayes ad iqqim akidsen ɛad ca n wussan.