1 Iřaɣa Yaɛqub x iḥenjiren nnes, inna: “Smunem-dd ixef nwem, ad awem iniɣ min d awem ɣa imsaren deg uneggar n wussan. 2 Smunem-dd ixef nwem uca sřem, a tarwa n Yaɛqub, sřem i Israil, babatwem.

3 Rubin, cek d amenzu inu, jjehd inu, d amezwar n teryast inu, aqa cek d amseḍfar inu di řuɛřa, d amseḍfar inu di řɛezz. ◘49:3 Amz. 29:32; Deu. 21:17; Izhd. 78:51. 4 Cek amecnaw aman ittneqřaben, war dd ayi tḍeffared, aqa cek tgeɛɛded ɣar řectu n řemřac n babac, řexdenni tessfeḍḥed t, aqa ɣar řectu inu igeɛɛed. ◘49:4 Amz. 35:22; 1 Im. 5:1.

5 Cimɛun d Lawi d awmaten! Řemwas nsen d řesnaḥ n lɛunf. 6 Di tmeɛmuč nsen war ittidef řeɛmar inu deg wegraw nsen war icarrec wuř inu. Aqa deg uxeyyeq nsen nɣin ijj n weryaz uca iɛjeb asen ad qessen iẓewran n iḍaren n ufunas. ◘49:6 Amz. 34:25. 7 D amenɛuř axeyyeq nsen, minzi wanita ijhed aṭṭas, uřa d aduqqez n ufugem nsen, minzi iqseḥ. Necc ad ten bḍiɣ x Yaɛqub, ad ten ssuyuseɣ di Israil. ◘49:7 Yac. 19:1; 21:3-45.

8 Yahuda, aytmac ad cek ssemɣaren. Afus nnec ad yiři x yiri n řɛedyan nnec u iḥenjiren n babac ad ac bendqen. 9 Yahuda d ijj n mmis n wayrad. Zi zzardet i tuřyed, a mmi. Iqwes amecnaw ayrad u amecmaw tayradt. Wi izeɛɛemen ad t-dd-issfaq? ◘49:9 Řxř. 24:9; Mixa 5:7. 10 Taɣɣarct n řḥakem war ittwakkes x Yahuda uřa d azeǧaḍ n ṣṣulṭa zi jar iḍaren nnes, ař dd ɣa yas wenni i ɣa iwcen arraḥet uca ad as ṭaɛen řegnus. ◘49:10 Mt. 2:6. 11 Iqqen ɣar tzayart asnus nnes d mmis nnes n teɣyuč ɣar tzayart icennɛen aṭṭas, issird arruḍ nnes di binu u arruḍ nnes deg idammen n uḍiř. 12 Tiṭṭawin nnes d tibarcanin s binu u tiɣmas nnes d ticemřařin s uɣi.

13 Zabulun ad izdeɣ ɣar tma n řebḥar, ad yiři d řmuyyi i iɣarruba. Aɣezdis nnes ad yareyyeḥ x Ṣidun. ◘49:13 Yac. 19:10, 11.

14 Issakar d ijj n weɣyuř iqseḥ, izzeř jar tnayen n řmedwat. 15 Umi iẓra arraḥet d lemliḥ u tammurt aqa tarecceq, iqwes, igga tiɣarḍin nnes maḥend ad yarbu arrmeḥ uca ammu i idweř sadu azayřu n ismeɣ.

16 Dan ad iḥkem řgens nnes am yict zi tqebbař n Israil. 17 Ad yiři Dan d afiɣar deg webrid, tařefsa deg umesruq, wenni izeɛɛfen deg inirzawen n uyis, ař ɣa iwḍa wenni xas inyin ɣar ḍeffar. 18 Asenjem nnec i ttrajiɣ, a SIDI!

19 Jad, ad xas ḥejment bandiyyat, maca ad xasen idarrec.

20 Acir, aɣrum nnes ad yiři d aɣrum ismen, netta ad iqeddem macca yiziden igellden.

21 Naftali d ict n tudadt ittwaḍeřqen, issuffuɣ awařen cnan.

22 Yusuf d mmis n tcejjart itticen řɣiǧet, mmis n tcejjart itticen řɣiǧet ɣar tařa. Yessis ggurent x weɣbar. ◘49:22 1 Im. 5:1. 23 Nitni ssarezgen xas tudart, neyycen xas, wah imjebbaden n řqews ḍfaren t, ◘49:23 Amz. 50:20. 24 maca řqews nnes iqqim imḥeḍ u iɣaǧen n ifassen nnes qqimen arxun s ifassen n Umzemmar n Yaɛqub - x uya Netta d Ameksaw d taṣḍart n Israil - 25 s Arebbi n babac wenni cek i ɣa iɛawnen, Amzemmar x kuřci, wenni cek i ɣa ibarken s lbarakat n ujenna sennej, s lbarakat n waman ihewřen i din iǧan swadday, s lbarakat n tubbect d řemřawet. 26 Lbarakat n babac d timeqqranin uɛřant x lbarakat n yinni d ayi dd-yejjin uca ttakkwaḍent ɣar tqiccatin n tewririn n řebda. Ad iřint x uzeǧif n Yusuf, x tuccent n ucuwwaf n wenni yarebbu ttaj n weɛzar jar aytmas . ◘49:26 Aɛwd. 33:16

27 Binyamin d ijj n wuccen ittmezzaq. Ɣar ṣṣbeḥ ad isarḍ zzardet u s ǧiřet ibeṭṭa takeccaḍt.”

28 Marra ina d tenɛac n tqebbař n Israil. D man aya min d asen inna babatsen uca ibark i-ten, wah, ibark i-ten, kuř ijj s lbaraka nnes. 29 Yumur i-ten, inna asen: “Ad mmarenyeɣ ɣar řgens inu. Neḍřem ayi ak-d řejdud inu deg ifri wenni iǧan deg iyyar n Ifrun, Aḥitti, 30 deg ifri wenni iǧan deg iyyar n Makfila i iǧan zzat i Mamri di temmurt n Kenɛan, tenni isɣa Ibrahim ak-d yeyyar zi Ifrun, Aḥitti, ḥima ad yiři d anḍeř nnes. ◘49:30 Amz. 23:9, 16. 31 Dinni i neḍřen Ibrahim d Sara tamɣart nnes. Dinni i neḍřen Isḥaq d temɣart nnes Rifqa. U necc neḍřeɣ din Liya. ◘49:31 Amz. 25:9; 35:29; Řex. 7:16. 32 Iyyar s ifri i tuɣa dayes iǧan immseɣ x tarwa n Ḥit.”

33 Umi ikemmeř Yaɛqub ad iweṣṣa iḥenjiren nnes, ikemmec iḍaren nnes di qama, iffeɣ i-t buḥbeř uca immarni ɣar řgens nnes. ◘49:33 Řex. 7:15.