1 A aytma, necc war zemmareɣ ad kiwem ssiwřeɣ am iwdan inni iddaren ɛlaḥsab Arruḥ, maca am yinni iddaren ɛlaḥsab aysum n bnadem waha, amecnaw iseyman di Lmasiḥ. 2 Aqa wciɣ awem ad teswem aɣi, war iǧi d ařeqqim imten, minzi tuɣa war d as tzemmarem, ař i řexxu u war d as tzemmarem ɛad, ◘3:2 Ɛbr. 5:12; 1 Bṭ. 2:2. 3 s minzi kenniw ɛad deg weysum. Maɣar mařa din ɛad jar awem řeḥsed d imenɣan d umsebḍi, ma war teǧim ɛad n ddat niɣ teggurem ɛad deg weysum? ◘3:3 1 Kur. 1:11; Gal. 5:19; Yaɛ. 3:16. 4 Minzi mařa ijjen zzaywem iqqar: ‘Necc aqa ayi zi Bulus!’ u wenneɣni iqqar: ‘Necc aqa ayi zi Apullus!’, ma xenni kenniw war teǧim ca ddat? ◘3:4 1 Kur. 1:12. 5 Maɣar min iɛna Apullus u min iɛna Bulus? Aqa aten mɣir d imsexxaren i zi tdewřem tumnem, uca kuř ijjen am mammec d as iwca SIDI. ◘3:5 Řex. 18:24; 1 Kur. 1:12; 16:12. 6 Aqa necc ẓẓuɣ, Apullus issu, maca AREBBI isseɣmi. ◘3:6 Řex. 18:26; 19:1. 7 Xenni wenni itteẓẓun war iǧi d ca uřa d wenni ittessun, maca AREBBI wenni issɣemmayen. 8 Maca wenni itteẓẓun d wenni ittessun d ijjen, waxxa kuř ijj tekkar as-dd řmunet nnes am mammec řxedmet nnes. ◘3:8 Izhd. 62:13; Irm. 17:10; 32:19; Mt. 16:27; Rum. 2:6; 14:12; 2 Kur. 5:10; Gal. 6:5; Asa. 2:23; 22:12. 9 Minzi neccin d imsexxaren ak-d AREBBI uca kenniw d tafeǧaḥt d řebni n AREBBI i teǧam. ◘3:9 2 Kur. 6:1; Afa. 2:20; Kul. 2:7; 1 Bṭ. 2:5.

10 Ɛlaḥsab arḍa n AREBBI i d ayi immewcen, necc, am řemɛeǧem abennay amiɣis, ggiɣ dsas u wenneɣni ad xas ibna. Ejj kuř ijj ad iḥḍa mammec xas i ɣa ibna. 11 Minzi uřa d ijjen war izemmar ad igg dsas nneɣni x wenni immarsen, aqa-t d Yasuɛ Lmasiḥ. ◘3:11 Ica. 28:16; Mt. 16:18. 12 Uca mařa ibna ḥed x dsas nni s wureɣ, nnuqart, iẓra iɣřan, tefřawt. řum niɣ s uxecxuc, 13 řxedmet n kuř ijjen ad tban, minzi ass ad tt isscen. Minzi s timessi ad ittwasseḍhar mammec teǧa řxedmet n kuř ijj, timessi ad tt tfarz. ◘3:13 Ica. 8:20; 48:10; Irm. 23:29; 1 Bṭ. 1:7; 4:12. 14 Mařa teqqim řxedmet n řebni i xas tuɣa ibna ca n ijjen, aqa netta ad iṭṭef řmunet nnes, 15 u mařa tecmeḍ řxedmet n ca n ijjen, aqa netta ad yarbu taxessart nnes, maca netta simant nnes ad injem axmi ikka timessi.

16 Ma war tessinem ca belli teǧam d zzawect n AREBBI uca belli Arruḥ n AREBBI izeddeɣ daywem? ◘3:16 1 Kur. 6:19; 2 Kur. 6:16; Ɛbr. 3:6; 1 Bṭ. 2:5. 17 Mařa yareyyeb ḥed zzawect n AREBBI, AREBBI ad t yareyyeb, minzi zzawect n AREBBI, tenni teǧam kenniw, tqeddes i teǧa.

18 War ttejji ḥed ad ixeddeɛ ixef nnes! Mařa din ḥed jar awem ittɣiř as ixef nnes d amiɣis di ddunect-a, ejj i-t ad idweř d abuhaři maḥend ad yiři d amiɣis. ◘3:18 Awřn. 3:7; Ica. 5:21. 19 Minzi tiɣit n ddunect-a teǧa d tubbuheřya ɣar AREBBI, minzi tura:

“Iṭṭef imiɣisen s teḥraymect nsen!”, ◘3:19 Ayub 5:13.

20 uca ɛawed:

“SIDI issnen aqa ixarriṣen n imiɣisen d řbaṭeř.” ◘3:20 Izhd. 94:11.

21 S uya, uřa d ijjen war issemɣari ca zeg iwdan, minzi marra nwem, 22 ma d Bulus, niɣ d Apullus, niɣ d Kifa, niɣ d ddunect, niɣ d tudart, niɣ d řmewt, niɣ d iḍa niɣ d tiwecca, aqa marra nwem, 23 maca kenniw n Lmasiḥ uca Lmasiḥ n AREBBI.