3
1 Mmi inu, war ttᵉttu
taɣuri inu n Ccariɛa,
ejj uř nnec ad iḥḍa tiweṣṣa inu,
2 maɣar nitenti ad ac dd-iwyent
aṭṭas n wussan,
uřa d iseggʷusa n tudart d řehna. ◘3:2 Aɛwd. 8:1; 30:20
3 Tamexsiwt icewwaren d řaman
war ten tejjid ad zzayek ffɣen,
qqen i-ten ɣar yiri nnec,
ari ten x teřwiḥt n wuř nnec, ◘3:3 Uf. 13:9; Aɛwd. 6:8
4 xenni ad tafed arḍa
d řefhamet iṣebḥen
di tiṭṭawin n AREBBI u n bnadem.
5 Tiqq di SIDI s wuř nnec kuřci,
war ttcařa x řefhamet n yixef nnec.
6 Ssen i-t di marra ibriden nnec,
xenni Netta ad iseggem imesraq nnec. ◘3:6 1 Im. 28:9
7 War ttegg ixef nnec d amiɣis.
Ggʷed SIDI u beɛɛed
x min iǧan d aɛeffan. ◘3:7 Rum. 12:16
8 Aya ad yiři d agenfu
i iẓewran n tudart nnec,
d wenɛac i iɣsan nnec.
9 Weqqar SIDI s wagřa nnec,
s tmezwarut n marra ṣṣabet nnec. ◘3:9 Uf. 23:19; 34:26; Aɛwd. 26:2-11; Mal. 3:10; Lk. 14:13
10 Xenni ad ttwaccuren
řehrit nnec s ufeyyeḍ,
u tisirin nnec n uḍiř
ad dduqqzen s binu n jdid. ◘3:10 Aɛwd. 28:8
11 Mmi inu, war neṭṭar ttarbiyyet n SIDI,
war ttarra aɛrur x uwebbex nnes, ◘3:11 Ayub 5:17; Ɛbr. 12:5
12 maɣar wenni issɛizza SIDI,
ad t iɛaqeb ɛawed,
am ittegg babas ak-d mmis
wenni x yarḍa. ◘3:12 Asa. 3:19
13 Sseɛd n bnadem nni ittafen tiɣit,
uřa d bnadem nni ittkessaben řefhamet,
14 maɣar min tᵉttawi nettat,
teḥřa x tsebbabt di nnuqart,
u řɣiǧet nnes teḥřa x wureɣ ittissiqen. ◘3:14 Ayub 28:15; Izhd. 19:11; Awřn. 8:11, 19; 16:16
15 Nettat tiɣřa x řmarjan,
u marra min di tzemmared
ad temmeẓred,
war izemmar akides ittemqudda. ◘3:15 Awřn. 8:11
16 Tuzzeggart n wussan ɣares
deg ufus nnes,
agřa d ccan aqa aten x uzeřmaḍ nnes.
17 Ibriden nnes d ibriden n řeḍrafet,
u marra imesraq nnes aqa aten d řehna.
18 Nettat d tacejjart n tudart
i yinni ɣares iřesqen,
kuř ijjen wenni dayes itteṭṭfen,
ad yiři d amesɛud. ◼3:18 tacejjart - niɣ ‘addag’ (‘iddagen’).
19 SIDI igga dsas n temmurt s tiɣit nnes,
s řefhamet nnes igga ijenwan.
20 Zi tussna nnes dduqqzen-dd
waman ihewřen,
ttnecnicen-dd iseynuten nnda. ◘3:20 Amz. 1:9, 10
21 Mmi inu, war tent tejjid
ad ffɣent zi tiṭṭawin nnec,
ḥḍa aftan d uḥaḍur, ◼3:21 ’tent‘ - awař-a iceyyar ɣar tiɣit d řefhamet i x issawař umseřmad n tiɣit di ayet 13 n wudem-a.
22 maɣar ad iřin d tudart i řeɛmar nnec
uřa d arḍa i yiri nnec.
23 Xenni ad tuyured abrid nnec di řaman,
war tᵉttneqriḍed deg uḍar nnec. ◘3:23 Izhd. 37:24; 91:11, 12
24 Mařa truḥed ad tezzřed,
war tennxeřɛid,
u xmi i ɣa tezzřed, ad yiẓid yiḍeṣ nnec. ◘3:24 Lawi 6:19; Ayub 11:19; Izhd. 3:6; 4:9; 91:5, 6
25 War tteggʷed zeg unexřiɛ n deɣya
uřa zeg wareyyeb s ufus n iɛeffanen
xmi dd ɣa yas. ◘3:25 Ayub 5:21
26 Maɣar SIDI ad ac yiři d asenned nnec,
Netta ad iḥḍa afus nnec zi tsarrift.
27 War qeṭṭeɛ řxar x bab nnes,
mařa aqa-t deg ufus nnec
maḥend ad tegged řxar.
28 War qqar i jjar nnec:
‘Ruḥ uca ɛqeb-dd,
tiwecca ad ac tt wceɣ!’,
mařa tamesřact aqa-tt akidek.
29 War nekkwi řɣar ak-d jjar nnec,
umi akidek izeddeɣ di řaman.
30 War temcubbuc
ak-d ijj n bnadem břa ssibbet,
mařa netta war d ac iggi řɣar.
31 War ttasem zeg ijj n bu-řexcunet,
ḥḍa maḥend war tᵉttixḍared
uřa d ijj zi marra ibriden nnes. ◘3:31 Izhd. 37:1; 73:3; Awřn. 23:17
32 maɣar wenni itteffɣen zeg webrid,
aqa-t d nnɛi i SIDI,
maca Netta ittegg řaman nnes
deg inni igguren nican. ◘3:32 Izhd. 25:14
33 Nneɛřet n SIDI
aqa-tt x taddart n uɛeffan,
maca tazeddiɣt n imseggaden
ad tt ibarek. ◘3:33 Lawi 26:14-45; Aɛwd. 28:15-68; Mal. 2:2
34 Mařa d imestehzayen,
ad zzaysen isstehza Netta,
maca mařa d inni ittwaḥṣaren,
ad asen iscen arḍa nnes. ◘3:34 Yaɛ. 4:6; 1 Bṭ. 5:5
35 Imiɣisen ad warten ccan,
maca ibuhařiyyen
ad ssarbun řefḍiḥet x yixef nsen.
◘3:6 3:6 1 Im. 28:9
◘3:7 3:7 Rum. 12:16
◘3:9 3:9 Uf. 23:19; 34:26; Aɛwd. 26:2-11; Mal. 3:10; Lk. 14:13
◘3:10 3:10 Aɛwd. 28:8
◘3:11 3:11 Ayub 5:17; Ɛbr. 12:5
◘3:14 3:14 Ayub 28:15; Izhd. 19:11; Awřn. 8:11, 19; 16:16
◘3:15 3:15 Awřn. 8:11
◼3:18 3:18 tacejjart - niɣ ‘addag’ (‘iddagen’).
◼3:21 3:21 ’tent‘ - awař-a iceyyar ɣar tiɣit d řefhamet i x issawař umseřmad n tiɣit di ayet 13 n wudem-a.
◘3:23 3:23 Izhd. 37:24; 91:11, 12
◘3:24 3:24 Lawi 6:19; Ayub 11:19; Izhd. 3:6; 4:9; 91:5, 6
◘3:31 3:31 Izhd. 37:1; 73:3; Awřn. 23:17
◘3:32 3:32 Izhd. 25:14
◘3:33 3:33 Lawi 26:14-45; Aɛwd. 28:15-68; Mal. 2:2
◘3:34 3:34 Yaɛ. 4:6; 1 Bṭ. 5:5