4
1 Sřem, kenniw iḥenjiren,
ɣar ttarbiyyet n babatwem,
ḥekkarem mliḥ
maḥend ad teksim tussna s řefhamet,
2 maɣar necc ad awem wceɣ
taɣuri iṣebḥen,
war semmḥem di tɣuri inu.
3 Maɣar necc tuɣa ayi d mmis i baba,
areqqaɣ d ayenni n mmis
zzat i wudem n yemma. ◘4:3 1 Im. 29:1
4 Netta isseřmed ayi, inna ayi:
“Ejj uř nnec ad iṭṭef deg wawařen inu,
ḥḍa tiweṣṣa inu, xenni ad teddared!” ◘4:4 1 Im. 28:9
5 Jbed-dd ɣarek tiɣit,
jbed-dd ɣarek řeɛqeř,
war tᵉttu u war tḥeyyid
x wawařen n uqemmum inu.
6 War semmeḥ di tiɣit,
xenni nettat ad cek teḥḍa,
sɛizz i-tt u nettat ad cek tessar. ◼4:6 War semmeḥ di tiɣit - s Tɛibranit ‘war semmeḥ dayes’.
7 Beddu n tiɣit d uḍuf n tiɣit,
ṭṭef řefhamet s marra min ɣarek. ◘4:7 Awřn. 23:23
8 Sgeɛɛed i-tt-i-dd,
xenni nettat ad cek tessgeɛɛed,
nettat ad ac tegg ccan mařa tdarrɛed as.
9 Nettat ad ac tewc ijj n ttaj tecna
x uzeǧif nnec,
ad ac tewc ijj n ttaj izewwqen. ◘4:9 Awřn. 1:19
10 Seř, a mmi, u ksi awařen inu,
xenni ad mmarnin
iseggʷusa n tudart nnec.
11 Ssřemdeɣ ac abrid n tiɣit,
nedheɣ cek di řatarat iseggmen.
12 Mařa tuyured, aṣurif nnec
war ittneḥṣṣar,
mařa tazzřed, war ttneqriḍed.◘4:12 Izhd. 91:11
13 Cebbar di ttarbiyyet,
war xas temmsebḍa,
ḥḍa tt, maɣar nettat d tudart nnec.
14 War ggur x umesruq n iɛeffanen,
war ttidif abrid n yinni itteggen řɣar, ◘4:14 Izhd. 1:1; Awřn. 1:10, 15
15 ḥeyyed xas, war xas ggur,
ffeɣ zzayes u ad tekked xas.
16 Maɣar nitni war ttᵉṭṭṣen
am war zemmaren ad ggen tuɛeffna,
ittraḥ asen iḍeṣ nsen
mařa war ssneqriḍen ḥed ɛad,
17 maɣar nitni ttᵉtten aɣrum n řɣecc,
u nitni sessen binu zi tmegga n řexcunet.
18 Amesruq n imseggaden
am tfawt ittissiqen n teffut,
tenni tarenni deg useqseq
ař imɣar wass qaɛ.
19 Abrid n iɛeffanen am taǧest,
nitni war ssinen min di i ɣa nqarḍen.
20 Mmi inu, ewc taynit i wawařen inu,
ewc amezzuɣ nnec i wawařen inu,
21 war ten ttejji ad ɣefřen
zi tiṭṭawin nnec,
xemmeř i-ten daxeř deg wuř nnec,
22 maɣar nitni d tudart
i yinni ten i ɣa yafen,
uřa d agenfu i arrimet nsen marra. ◘4:22 Awřn. 4:13
23 Ḥḍa uř nnec x marra
min izemmar ad ittwaḥḍa,
maɣar zzayes ffɣen iẓewran n tudart.
24 Kkes ixarriqen n uqemmum nnec,
sbeɛɛed xak afaryeḍ n iyencicen nnec.
25 Ejj tiṭṭawin nnec ad xzarent ɣar zzat,
ejj abřiwen nnec ad xzaren
ɣar min iǧan arendad nnec.
26 Waṭa řatar n uḍar nnec,
ejj ad iřin marra ibriden nnec sarrḥen.
27 War farreɣ ɣar yefus uřa ɣar uzeřmaḍ,
sbeɛɛed aḍar nnec zi tuɛeffna. ◘4:27 Aɛwd. 5:32; 28:14
◘4:3 4:3 1 Im. 29:1
◘4:4 4:4 1 Im. 28:9
◼4:6 4:6 War semmeḥ di tiɣit - s Tɛibranit ‘war semmeḥ dayes’.
◘4:7 4:7 Awřn. 23:23
◘4:9 4:9 Awřn. 1:19
◘4:12 4:12 Izhd. 91:11
◘4:14 4:14 Izhd. 1:1; Awřn. 1:10, 15
◘4:22 4:22 Awřn. 4:13
◘4:27 4:27 Aɛwd. 5:32; 28:14