1 Manis dd-ikka umenɣi d imcubbecen jar awem? Ma zeɛma zeg ccehwat i immenɣen deg iɣezdisen nwem? ◘4:1 Rum. 7:23; 1 Bṭ. 2:11. 2 Kenniw temmeẓrem maca kenniw war ɣarwem walu. Kenniw tneqqem u tᵉttasmem uca qaɛ amenni war dd awem ittikkwiḍ walu. Kenniw tᵉttemcubbucem u tᵉttmenɣam, maca war ɣarwem walu, minzi kenniw war tᵉttᵉttaram. 3 Niɣ kenniw tᵉttᵉttaram, maca war teksim ca, minzi tᵉttᵉttarem min war iḥřin, ḥima ad teggem ɣar ccehwat nwem. ◘4:3 Mt. 20:22; Rum. 8:26. 4 A kenniw inni izennan! Ma war tessinem ca belli tamexsiwt n ddunect aqa-tt d řeɛdawet x AREBBI? Aḥeqqa wenni ittexsen ad yiři d ameddukkeř n ddunect, ad yiři d řeɛdu n AREBBI. ◘4:4 Yḥ. 15:9; Gal. 1:10; 1 Yḥ. 2:15. 5 Niɣ ittɣiř awem belli Tira Iqeddsen war ɣarsent lmeɛna:

“Arruḥ i dayneɣ izeddɣen

ittasem s tusmi!”? ◘4:5 Řxř. 11:29.

6 Maca Siditneɣ ittic aneɣ arḍa ktar, maɣar inna:

“AREBBI isswaḍḍeɛ imɛeffaren,

maca i imwaḍɛen ittic asen arḍa.” ◘4:6 Awřn. 3:34; 1 Bṭ. 5:5.

7 S uya marsem ixef nwem zzat i AREBBI, mɛařam ak-d cciṭan uca netta ad zzaywem yarweř. ◘4:7 Afa. 4:27; 1 Bṭ. 5:9. 8 Adsem AREBBI uca Netta ad kenniw dd-yades. Sirdem ifassen nwem, a imednab, qeddsem uřawen nwem, a kenniw, inni ɣar iǧa tnayen n izeǧifen. 9 Marsem ixef nwem, ceḍnem! Jjem taḍeḥḥact nwem ad tedweř d acḍan u řefraḥet nwem ad tedweř d řeḥzen. ◘4:9 Mt. 5:4. 10 Marsem ixef nwem zzat i SIDI uca Netta ad kenniw issɛuǧ. ◘4:10 Ayub 22:29; Awřn. 29:23; Mt. 23:12; Lk. 14:11; 18:14; 1 Bṭ. 5:6.

11 A aytma, war ttceqqafem ca deg wayawya! Wenni iceqqafen deg umas niɣ iḥekkem x umas, aqa wa ittceqqaf di Ccariɛa uca iḥekkem x Ccariɛa. Uca mařa tḥekmed x Ccariɛa, aqa war teǧid ca d wenni itteggen Ccariɛa, maca tarrid ixef nnec d řqaḍi n Ccariɛa. 12 Ijjen waha i iǧan d Bab n Ccariɛa, Netta d wenni ɣar teǧa tzemmar, ḥima ad iwc Tudart niɣ ad tt yareyyeb. Maca min teɛnid cek umi tḥekkmed x jjar nwem?

13 Ma xenni i ɣa nini x yinni iqqaren: “Ass-a niɣ tiwecca ad nraḥ ɣar tendint-a ɣar tendint-in, ad din negg tasebbabt řmijař n ijj n useggʷas, ad nseɣ ad nezzenz ad narbeḥ!”? ◘4:13 Lk. 12:18. 14 Nitni war ssinen mammec ɣa tiři tiwecca. Min teɛna tudart nneɣ? Aqa-tt mɣir d ijj n řefwar i ɣa dd-iḍhar, ad idurreq, ad tefsi řexdenni. ◘4:14 Ica. 40:6; 1 Kur. 7:31; Yaɛ. 1:10; 1 Bṭ. 1:24; 1 Yḥ. 2:17. 15 S uya ittxeṣṣa ad inin: “Mařa ixs SIDI, ad neddar, ad negg ta d tin.” ◘4:15 Řex. 18:21; 1 Kur. 4:19; Ɛbr. 6:3. 16 Iwa nitni ttfeyycen deg uɛeffar nsen, maca qaɛ afeyyec-a d aɛeffan. 17 Wenni issnen mammec i ɣa igg řxar uca war t ittegg, ad as dd-ittwaḥseb d ddenb. ◘4:17 Lk. 12:47.