1 A iḥenjiren inu, uriɣ aya i kenniw, ḥima war txeṭṭim ca. Uca mařa ixḍa ca n ijjen, aqa ɣarneɣ Umseṣřaḥ, d Wenni iǧan ɣar Babatneɣ, Yasuɛ Lmasiḥ, Amseggad. ◘2:1 1 Tim. 2:5; Ɛbr. 7:25. 2 Maɣar Netta d aṣřaḥ i ddnub nneɣ, war iǧi x ddnub nneɣ waha, maca ɛawed i yinni n ddunect marra. ◘2:2 Yḥ. 4:42; Rum. 3:25; 2 Kur. 5:18; Kul. 1:20; 1 Yḥ. 4:10, 14.

3 S man aya i nettwařa belli aqa nessen i-t, mařa neṭṭef di tweṣṣa nnes. 4 Wenni iqqaren: “Necc ssneɣ t!”, maca war iṭṭif ca di tweṣṣa nnes, netta d bu-ixarriqen uca tidett war dayes teǧi. ◘2:4 1 Yḥ. 4:20. 5 Maca wenni ittᵉṭṭfen deg wawař nnes, ad dayes tkemmeř tayri n AREBBI s tidett. S man aya nessen, belli aqa neccin dayes. ◘2:5 Yḥ. 13:35. 6 Wenni iqqaren: ‘Necc dayes!’, ittxeṣṣa ad yuyur am mammec tuɣa iggur Netta. ◘2:6 Yḥ. 13:15; 1 Bṭ. 2:21.

7 A imɛizzen inu, war d awem ttariɣ ca tawṣeyyet n jdid, maca tawṣeyyet taqdimt i tuɣa ɣarwem zeg umezwaru. Tawṣeyyet-a taqdimt d awař i tuɣa tesřim. ◘2:7 1 Yḥ. 3:23; 2 Yḥ. 5. 8 Waxxa amenni ad awem dd-ariɣ tawṣeyyet n jdid, tenni iǧan d tidett dayes u daywem, minzi taǧest teɛdu uca Tafawt n tidett aqa tᵉtteḍhar-dd řexxu. ◘2:8 Yḥ. 13:34; 15:12.

9 Wenni iqqaren belli aqa-t di Tfawt, maca icarreh umas, netta aqa-t di taǧest ař iḍa. 10 Wenni ittexsen umas, ad iqqim di Tfawt uca war dayes bu řefḍiḥet i zi ɣa inqard umas. ◘2:10 Yḥ. 12:35; 1 Yḥ. 3:14. 11 Maca wenni icarrhen umas, aqa-t di taǧest uca iggur di taǧest, war issin mani ɣa iraḥ, minzi taǧest tessdarɣeř tiṭṭawin nnes.

12 Ad awem dd-ariɣ, a iḥenjiren, minzi ddnub nwem ttwaɣfaren awem di ṭṭweɛ n Yisem nnes. ◘2:12 Lk. 24:47; Řex. 4:12; 13:38.

13 Ad awem dd-ariɣ, a ibabaten, minzi aqa tessnem Wenni iǧan zeg umezwaru.

Ad awem dd-ariɣ, a ibřiɣen, minzi aqa tɣellbem x umɛeffan.

Aqa uriɣ awem-dd, a iḥudriyyen, minzi tessnem Babatneɣ.

14 Aqa uriɣ awem-dd, a ibabaten, minzi tessnem Wenni iǧan zeg umezwaru.

Aqa uriɣ awem-dd, a ibřiɣen, minzi aqa kenniw tjehdem uca Awař n AREBBI izeddeɣ daywem uca tɣellbem x umɛeffan.

15 War ttexsem ca ddunect uřa d min iǧan di ddunect, minzi mařa ca n ijjen ittexs ddunect, tayri n Babatneɣ war dayes teǧi. ◘2:15 Gal. 1:10; Yaɛ. 4:4. 16 Minzi marra min iǧan di ddunect - aqa-t d nnecwet n ddat d nnecwet n tiṭṭawin d tuffet n ddunect-a - war dd-ittis ca zi Babatneɣ, maca zi ddunect. 17 Uca ddunect tɛeddu uřa d nnecwat nnes, maca wenni itteggen min ixs AREBBI, ad iqqim i řebda. ◘2:17 Izhd. 90:10; Ica. 40:6; 1 Kur. 7:31; Yaɛ. 1:10; 4:14; 1 Bṭ. 1:24.

18 A iḥenjiren inu, aqa řweqt taneggarut tiweḍ-dd, uca am tesřim belli ad dd-yas lmasiḥ afalsu, amenni řexxu ḍharen-dd aṭṭas n imasiḥen ifalsuten. S uyenni nessen belli řweqt taneggarut aqa tiweḍ-dd. ◼2:18 lmasiḥ afalsu - xzar 1 Yḥ. 2:18, 22; 4:3. Aqa din aṭṭas n iwdan inni iqqaren: ‘Lmasiḥ war iǧi d AREBBI! Netta d anabi!’ Man aya ixs ad yini belli nitni war ssteɛtarifen u war neɛɛmen ca, aqa AREBBI yusa-dd di arrimet n Yasuɛ Lmasiḥ am mammec i d aneɣ isseřmed Wedlis Iqeddsen. S uyenni tteggen nitni am mammec ittegg lmasiḥ afalsu, war cehhden ca aqa Yasuɛ Lmasiḥ yusa-dd di arrimet. S uyenni ḍeffaren t deg ixarriqen nnes, nitni d iḥenjiren n ddejjař.  ◘2:18 Mt. 24:5; 2 Ts. 2:3. 19 Ffɣen-dd zzayneɣ, maca war ten tuɣi zzayneɣ. Meɛlik nitni tuɣa zzayneɣ, ad iři qqimen akidneɣ. Maca nitni ffɣen-dd zzayneɣ, ḥima ad iban belli nitni marra war ǧin ca zzayneɣ. ◘2:19 Izhd. 41:10; Řex. 20:30; 1 Kur. 11:19. 20 Aqa ɣarwem adhan n Umqeddas uca tessnem ad tfarzem kuř ijj n bnadem. ◘2:20 Izhd. 45:8; 133:2; 2 Kur. 1:21; Ɛbr. 1:9. 21 War d awem uriɣ minzi war tessinem ca tidett, maca minzi aqa tᵉttessnem tt, u tessnem ɛawed uřa d ijj n uxarriq war dd-itteffeɣ ca zi tidett. 22 Wi iǧan d bu-ixarriqen mɣir wenni inkaren belli Yasuɛ d Lmasiḥ! D wa d lmasiḥ afalsu, wenni inkaren Babas d Mmis. ◼2:22 lmasiḥ afalsu - xzar 1 Yḥ. 2:18 d 1 Yḥ. 4:3. 23 Marra wenni inkaren Mmis war yumin ɛawed di Babas. Wenni icehhden i Mmis, icehhed ɛawed i Babas. ◘2:23 Lk. 12:9; 2 Tim. 2:12. 24 Ejj ad daywem iqqim min tesřim zeg umezwaru. Mařa iqqim daywem min tesřim zeg umezwaru, ad teqqimem kenniw ɛawed di Babas u di Mmis. 25 Ta d tikkest n wawař i d aneɣ iwca: Tudart ittduman.

26 Man aya uriɣ awem-t-i-dd x yinni kenniw ixeddɛen. 27 Mařa adhan i zzayes tᵉṭṭfem ad iqqim daywem, war teḥdajem ad kenniw isseřmed ḥed. Minzi adhan n AREBBI, ad kenniw isseřmad di marra, uca Netta d tidett war dayes ǧin ixarriqen. Xenni qqimem dayes, di Lmasiḥ, am mammec i d awem isseřmed Netta. ◘2:27 Irm. 31:34; Ɛbr. 8:11.

28 Xenni řexxu, a iḥenjiren inu, qqimem dayes, ḥima war nettseḍḥi ca qibač nnes x minni dd ɣa iḍhar, maca ad ɣarneɣ tiři ttiqqet ɣar twasit nnes. ◘2:28 Mk. 8:38; 1 Yḥ. 3:2. 29 Mařa tessnem, belli Netta d amseggad, snem ɛawed belli marra wi itteggen tasegda, aqa ittwaxřeq-dd zzayes.