1 Lmufid zi marra man aya, aqa ɣarneɣ Arrays n ikehhanen, wenni iqqimen ɣar yefus n řɛarc n Lɛaḍim deg ijenwan. ◘8:1 Afa. 1:20; Kul. 3:1; Ɛbr. 3:1; 4:14; 6:20; 9:11; 12:2. 2 Netta d Amseyyar n Zzawect Iqeddsen u n Tzeddiɣt Iqeddsen d tidett nni ibna AREBBI, war iǧi d bnadem.

3 Minzi kuř arrays n ikehhanen ittwassgeɛɛed ḥima ad iwc tiwhibin d tɣarṣin. S uyenni tuɣa ittxeṣṣa as i Wanita ɛawed ad ɣares yiři ca ḥima ad t iwc. ◘8:3 Afa. 5:2. 4 Meɛlik iǧa di temmurt, Netta war ittiři d akehhan, minzi aqa din ikehhanen ɛad inni ittqeddamen tiwhibin ɛlaḥsab Ccariɛa. 5 Nitni sexxaren i umedya d tiři n min iǧan deg ujenna, am mammec ittwanna i Musa umi tuɣa iřha ak-d Uqiḍun Iqeddsen: “Ḥḍat, ad tegged marra am lmital wenni d ac ssecneɣ x wedrar.” ◘8:5 Uf. 25:40; Řex. 7:44; Kul. 2:17; Ɛbr. 10:1.

6 Maca řexxu Yasuɛ Lmasiḥ iksi tasexxart tecna xas, minzi Řɛahd i zi idweř Netta d Lwasit, aqa ḥsen qaɛ, uca immewc s lwuɛud icnan x yinni i dd-ittasen ak-d Řɛahd aqdim. ◘8:6 2 Kur. 3:6. 7 Minzi mařa tuɣa Řɛahd amezwaru břa řɛib, war ittiři ɛad wemcan i wenni d wiss tnayen. 8 Maɣar Netta yufa daysen řɛib, inna:

“Xzar, ad dd-asen wussan, inna SIDI,

xmi ɣa ggeɣ ijj n Řɛahd n Jdid

di řekmaret,

i řaǧ n taddart n Israil

u i řaǧ n taddart n Yahuda, ◘8:8 Irm. 31:31-34; Mt. 26:28, Mk. 14:24, Lk. 22:20, 1 Kur. 11:25, 2 Kur. 3:6, Ɛbr. 8:6, 8, 13; 9:15; 12:24

9 war iǧi am Řɛahd nni wciɣ i řejdud nsen,

deg wass min di ten ṭṭfeɣ zeg ufus,

gewwdeɣ ten zi temmurt n Miṣra.

Minzi nitni war qqimen ca di Řɛahd inu,

nḍareɣ ten, iqqar SIDI.

10 Maca d wa d Řɛahd i ɣa wceɣ

i řaǧ n taddart n Israil:

‘Awarni wussan nni, inna SIDI,

ad ggeɣ izerfan inu di řeɛqeř nsen,

uca ad ten ariɣ deg wuřawen nsen,

uca Necc ad asen iřiɣ d AREBBI,

nitni ad ayi iřin d řgens.

11 Uřa d ijjen ad isseřmed

mmis n temmurt niɣ umas,

ad yini: Ssen SIDI!,

minzi marra ad ayi ssnen,

am umeẓyan nsen am umeqqran nsen. ◘8:11 Yḥ. 6:45, 65; 1 Yḥ. 2:27.

12 Minzi Necc ad ten sseṣfiɣ

zi řmuɛṣiyyet nsen,

uca ddnub nsen war daysen ttfekkareɣ ɛad.’ ” ◘8:12 Irm. 31:31-34.

13 Řami inna: ‘Jdid!’, aqa igga Řɛahd amezwaru d aqdim, uca min yarcan u idduysar, aqa ad ifna. ◘8:13 Irm. 31:31; Mt. 26:28, Mk. 14:24, Lk. 22:20, 1 Kur. 11:25, 2 Kur. 3:6, Ɛbr. 8:6, 8, 13; 9:15; 12:24