1 Uca ẓriɣ ɣar ufus afusi n wenni iqqimen x řɛarc ijj n Wedlis ittwanḍen, tuɣa xas tira ɣar daxeř d barra, uca Adlis tuɣa ittwacemmeɛ s sebɛa n icemmiɛen. ◘5:1 Ḥiz. 2:10. 2 Uca ẓriɣ ijj n lmalak ijhed nneɣni, ittřaɣa s jjehd:

“Man wen isdaheǧen ad yarzem

Adlis-a ittwannḍen,

uca ad ikkes icemmiɛen nnes?”

3 Uca uřa d ijj deg ujenna niɣ di temmurt niɣ sadu temmurt izemmar ad yarzem Adlis-a ittwannḍen u ad ikkes icemmiɛen nnes, ad dayes ixzar. ◘5:3 Fil. 2:10; Asa. 5:13. 4 Necc ruɣ aṭṭas umi war ufin wi isdaheǧen ad yarzem Adlis-a ittwannḍen u ad yarzem icemmiɛen nnes. 5 Ijjen zeg imɣaren inna ayi: “War ttru ca! Xzar, Ayrad zi teqbič n Yahuda, Aẓwar n Dawud, aqa iɣelleb, ḥima ad yarzem Adlis-a ittwannḍen d icemmiɛen nnes.” ◘5:5 Amz. 49:9, 10; Ica. 11:10; Rum. 15:12; Asa. 22:16.

6 Uca ẓriɣ di řwesṭ n řɛarc d arebɛa n imuddaren uca di řwesṭ n imɣaren, ijj n Izmar ibedd, igga axmi d taɣarṣt. Netta ɣares sebɛa n waccawen d sebɛa n tiṭṭawin, nitni d sebɛa n Arruḥat n AREBBI inni dd-ittwassekken ɣar ddunect tmun. ◼5:6 ddunect - s Tɛibranit ‘temmurt’.  ◘5:6 Zak. 3:9; 4:10; Asa. 4:5. 7 Aqa Netta yusa-dd uca iksi Adlis ittwannḍen zeg ufus n wenni iqqimen x řɛarc.

8 Ařami iṭṭef Adlis ittwannḍen, wḍan-dd arebɛa n imuddaren d arebɛa u-ɛicrin n imɣaren ɣar temmurt zzat i Yezmar. Nitni marra idsen ɣarsen ict n lharpa d ijj n ṭṭebṣi n wureɣ iccur s řebxur: man aya d tiẓaǧitin n imqeddasen. ◘5:8 Izhd. 141:2; Asa. 14:2. 9 Uca ttɣennajen ijj n izři n jdid, qqaren:

“Cek tesdaheǧed

ad teksid Adlis ittwannḍen,

ad tekksed icemmiɛen nnes,

minzi Cek tᵉttwaɣarṣed

uca s Idammen nnec

tesɣid aneɣ i AREBBI,

zi kuř taqbič d řgens d cceɛb.” ◘5:9 Řex. 20:28; Afa. 1:7; Kul. 1:14; Ɛbr. 9:12; 10:10; 1 Bṭ. 1:19; 1 Yḥ. 1:7; Asa. 4:11.

10 ”Cek tarrid ten d ict n tgelda

n ikehhanen d ijeǧiden

i AREBBI nneɣ,

u nitni ad ḥekmen

am ijeǧiden x temmurt.” ◘5:10 Uf. 19:6; 1 Bṭ. 2:5, 9; Asa. 1:6.

11 Xenni ẓriɣ, uca sřiɣ tmijja n waṭṭas n lmalakat nnḍent i řɛarc uřa n imuddaren d imɣaren, uca tuɣa atent ɛecra-ařaf di ɛecra n řuřuf u ařaf di řuřuf, ◘5:11 Dan. 7:10; Ɛbr. 12:22. 12 qqaren s tmijja ijehden:

“Izmar nni ittwaɣarṣen

isdaheǧ ad iṭṭef

ṣṣulṭa d wagřa d tiɣit,

d jjehd d ccan d uɛuǧi,

d lbaraka!” ◘5:12 Asa. 4:11.

13 Uca kuř ijj i dd-ixeřqen deg ujenna u x temmurt d sadu temmurt u x řebḥar, wah, qaɛ min iǧan daysen, sřiɣ asen, qqaren:

“Lbaraka d ccan d uɛuǧi d ṣṣulṭa

ad iřin i wenni iqqimen x řɛarc

u i Yezmar i řebda qaɛ!”

14 Uca umi arebɛa n imuddaren nnan: “Amin!”, wḍan imɣaren ɣar temmurt, sejden.