1 Ammu i tᵉttwakemmeř marra řxedmet i igga Suliman i Taddart n SIDI. Uca issidef Suliman marra řeqcuɛ iqeddsen n babas Dawud: nnuqart d wureɣ d marra řeqcuɛ, uca issars man aya marra deg ixxamen n txubay n Taddart n AREBBI. ◘5:1 [1 Ij. 8:1-66] 2 Xenni issmun Suliman imeqqranen n Israil, marra izeǧifen n tqebbař d řḥukkam n tudrin n ibabaten n ayt n Israil. Netta issmun i-ten di Urcalim ḥima ad ssgeɛɛden Ttabut n Řɛahd n SIDI zi tendint n Dawud, tenni d Ṣihyun. 3 Marra iryazen n Israil munen-dd ɣar ujeǧid ɣar řɛid. Tuɣa-tt deg uyur wiss sebɛa.

4 Marra imeqqranen n Israil usin-dd uca ssgeɛɛden Ilawiyyen Ttabut. 5 Ssgeɛɛden Ttabut n SIDI ak-d Uqiḍun n Umsagar uřa d marra řeqcuɛ iqeddsen i tuɣa din iǧan deg Uqiḍun. Ssgeɛɛden aya ikehhanen d Ilawiyyen. 6 Marra tamesmunt n Israil, tenni tuɣa ɣares imunen, tuɣa tbedd ak-d ujeǧid Suliman zzat i Ttabut. Nitni wehhben uǧi d ifunasen d tfunasin nni iǧan břa řeḥsab, war zemmaren ad ten qeddaren di ssibbet n ubarru nsen. 7 Iwyen ikehhanen Ttabut n Řɛahd n SIDI ɣar wemcan nnes, ɣar Wexxam n Daxeř n Zzawect n Taddart, deg Weqdas x Uqeddas, ař sadu wafriwen n ikiruben. ◼5:7 ikiruben - ict n marka n lmalakat. 8 Ikiruben bezzɛen tnayen n wafriwen nsen x wemcan n Ttabut uca ammu i dřin ikiruben Ttabut d iɛumad nnes i tarebbut zi sennej. 9 Awarni aya ssřeḥmen iɛumad n tarebbut, maḥend ad banent texfawin n iɛumad, inni dd-iffɣen zi Ttabut, ɣar uɣezdis n zzat n Wexxam n Daxeř n Zzawect, maca war dd-ttbinint zi barra. Ttabut aqa-tt din ař ass-a. 10 Tuɣa war iǧi ca di Ttabut, mɣir tnayen n teřwiḥin i dayes issars Musa ɣar Hurib, řami igga SIDI Řɛahd ak-d ayt n Israil umi dd-ffɣen zi Miṣra. ◘5:10 1 Ij. 8:9

11 Ařami dd-ffɣen ikehhanen zeg Uqeddas - maɣar marra ikehhanen nni tuɣa zemmaren ad afen, tuɣa ssqeddsen ixef nsen břa ma ad wcen taynit i terbiɛin nsen - 12 am tuɣa Ilawiyyen - ixs ad yini marra imedyazen: inni ɣar Asaf d yinni ɣar Hayman d yinni ɣar Yadutun, d yinni n iḥenjiren nsen d yinni n aytmatsen - yarḍen řeqṭen azdad, uca bedden s taǧunin n wuzzař d lharpat d řgambriyat ɣar uɣezdis n ccarq n uɛalṭar u tuɣa akidsen ɛřaḥař mya u-ɛicrin n ikehhanen i ittsuḍen di řebwaq. ◘5:12 Řex. 1:15 13 Suḍen nitni di řɣayṭa u ɣennjen am yijj n weryaz, ḥima ad ittwaseř řḥess d ijjen am ssemɣaran u ttqadan nitni SIDI. Nitni ssgeɛɛden tmijja nsen ɣar ujenna s řebwaq d taǧunin n wuzzař d dduzanat n ǧɣa nneɣni, ssemɣaran SIDI: ‘Maɣar Netta iṣbeḥ, maɣar tamexsiwt nnes icewwaren tᵉttɣima i řebda!’ Xenni imsar aqa Taddart, Taddart n SIDI, tᵉttwaccur s useynu, 14 uca ikehhanen war zemmaren ad qqimen bedden maḥend ad sexxaren di ssibbet n useynu, minzi aɛuǧi n SIDI tuɣa iccur Taddart n AREBBI. ◘5:14 Asa. 15:8.