12
1 Wenni ittexsen ttarbiyyet,
ittexs tussna,
maca wenni icarrhen awebbex
aqa netta d aqeffuḥ.
2 Bnadem d aṣebḥan ittaf arḍa n SIDI,
maca aryaz inekkwan taḥraymect
ad t ibarreḥ d bu-umarwas.
3 Bnadem war izemmar
ad iqqim ibedd umi ittegg řɣar,
maca aẓwar n imseggaden
war izemmar ad inhezz. ◘12:3 Awřn. 10:25
4 Tamɣart imeḥḍen
d ttaj n weryaz nnes,
maca tenni t yarrin ittseḍḥa,
d tenni am wareṣṣuḍ deg iɣsan nnes. ◘12:4 1 Kur. 11:7
5 Ixemmimen n imseggaden d řḥeqq,
ixarriṣen n iɛeffanen d řɣecc marra.
6 Awařen n iɛeffanen
řebten deg idammen,
maca aqemmum n yinni igguren nican
ad ten issenjem.◘12:6 Awřn. 1:11, 18; 11:9
7 Iɛeffanen ttneqřaben u war ǧin ɛad,
maca taddart n imseggaden
ad teqqim tbedd. ◘12:7 Izhd. 37:36-40; Awřn. 11:21
8 Ittwassemɣar bnadem
ɛlaḥsab řqedd n řeɛqeř nnes,
maca wenni di iǧa wuř ifarɣen,
ad ittwasseḥqar.
9 Iḥřa wenni war iḥessben
x ixef nnes aṭṭas,
maca ɣares ijj n umsexxar,
x wenni ittcennɛen s ixef nnes,
maca aɣrum war ɣares yeǧi. ◘12:9 Awřn. 13:7
10 Amsegged issen
řeɛmar n řebhimet nnes,
maca arreḥmat n uɛeffan qesḥent. ◘12:10 Aɛwd. 25:4
11 Wenni icarrzen tammurt nnes,
ad ijjawen s weɣrum,
maca wenni yareddfen min iǧan ixwan,
war ɣares ca wuř imten. ◘12:11 Awřn. 28:19
12 Aɛeffan ittexs min iǧan di tracca
n yinni itteggen řɣar,
maca aẓwar n imseggaden
ittɣima ittic.
13 Deg uxeṭṭu n iyencicen
dayes ijj n řfex d aɛeffan,
maca amsegged ad injem zi řeḥṣaret. ◘12:13 Awřn. 10:14; 18:7
14 Zi řɣiǧet n uqemmum nnes
ittwassjiwen bnadem s řxir,
min dd-ttawyen ifassen n bnadem
ad ɣares dd-idweř. ◘12:14 Awřn. 13:2
15 Abrid n ubuhaři nican di tiṭṭawin nnes,
maca wenni ittesřan i ccwar,
aqa netta d amiɣis. ◘12:15 Awřn. 3:7
16 Abuhaři isscana řhemm nnes
deg wass d ijj,
maca wenni ifettnen,
ittdařa řeḥya nnes.
17 Wenni dd-ineṭṭqen tidett,
isscana tasegda,
maca acehhad issxarriqen
isscana acmat. ◘12:17 Awřn. 14:5
18 Aqa din wenni ittharwaḍen
am tejjut n ssif,
maca iřes n imiɣisen
ittawi-dd agenfu. ◘12:18 Izhd. 57:5; 59:8; Awřn. 16:27
19 Iyencicen iccuren s tidett
ad ttwaḍmen i řebda,
maca iřes issxarriqen mɣir
i yijj n umur waha.
20 Acmat aqa-t deg wuř
n yinni inekkwan tuɛeffna,
maca i yinni inessḥen řehna,
aqa din řefraḥet.
21 Amsegged war t iřeqqef řɣecc,
maca iɛeffanen ad ttwaccuren s řɣar.
22 Iyencicen isxarriqen d nnɛi i SIDI,
maca inni ittemṣurrufen s řaman
yarḍan as.
23 Bnadem ifetnen issdurruy tussna nnes,
maca uř n ibuhařiyyen
isɣuyyu s tubbuheřya di řexřa. ◘12:23 Awřn. 13:16; 15:2
24 Afus n wenni imeḥḍen ad iḥkem,
maca řeɛgez ineddeh ɣar tesmuɣi. ◘12:24 Awřn. 10:4
25 Amnus deg wuř n bnadem
isshekkwa i-t,
maca awař iṣebḥen issfarraḥ i-t. ◘12:25 Awřn. 15:13
26 Amseggad isscana abrid i jjar nnes,
maca abrid n uɛeffan
yarra i-ten ad weddaren.
27 Ameɛguz war iḍeffar ca aneymar nnes.
maca agřa iɣřan n iwdan aqa d amḥaḍ.
28 Deg umesruq n tsegda teǧa tudart,
abrid n řatar nnes war dayes bu řmewt.
◘12:3 12:3 Awřn. 10:25
◘12:4 12:4 1 Kur. 11:7
◘12:6 12:6 Awřn. 1:11, 18; 11:9
◘12:7 12:7 Izhd. 37:36-40; Awřn. 11:21
◘12:9 12:9 Awřn. 13:7
◘12:10 12:10 Aɛwd. 25:4
◘12:11 12:11 Awřn. 28:19
◘12:13 12:13 Awřn. 10:14; 18:7
◘12:14 12:14 Awřn. 13:2
◘12:17 12:17 Awřn. 14:5
◘12:18 12:18 Izhd. 57:5; 59:8; Awřn. 16:27
◘12:23 12:23 Awřn. 13:16; 15:2
◘12:24 12:24 Awřn. 10:4
◘12:25 12:25 Awřn. 15:13