57
1 I umeqqran n imeɣnajen. ‘War t ttareddeǧ!’ N Dawud. Tira ineqcen. Umi yarweř zi Cawul deg ifri.◘57:1 1 Ṣm. 22:1; 24:4
2 Ḥinn xafi, a AREBBI, ḥinn xafi,
maɣar řeɛmar inu yarekkwař-dd ɣarek.
Necc ufiɣ adurri
di tiři n wafriwen nnec,
ař ɣa ɛdunt řmuṣibat.
3 Necc ad řaɣiɣ ɣar AREBBI,
Amɛuǧi x kuřci,
ɣar Arebbi wenni d ayi ɣa inedhen
ɣar uneggar iṣebḥen.
4 Netta ad dd-issekk asenjem inu
zeg ujenna,
ad issbehdeř wenni ixsen
ad ayi isarḍ. Silah.
AREBBI ad issekk
tamexsiwt nnes icewwaren
d řaman nnes.
5 Řeɛmar inu aqa-t jar iyraden,
zzřeɣ jar iṣefḍawen yareqqen,
tarwa n bnadem, inni tiɣmas nsen
am lansat d fřitcat n řqews,
iřes nsen am yijj n ssif iqḍeɛ.
6 A AREBBI, sgeɛɛed Ixef nnec
tiwa i ijenwan,
arr aɛuǧi nnec
sennej i marra tammurt. ◘57:6 Izhd. 108:6
7 Nitni ggin tracca i iṣuraf inu,
řeɛmar inu tuɣa iɣnes.
Nitni ɣzin ayi aḥfur,
maca wḍan dayes simant nsen.
Silah. ◘57:7 Izhd. 7:16; 9:16
8 A AREBBI, uř inu yarekken,
uř inu yarekken.
Aqa necc ad ɣennjeɣ ad zehhdeɣ. ◘57:8 Izhd. 108:2-6
9 Faq, aɛuǧi inu! Faq,
lharpa d řgambri!
Necc ttexseɣ ad ssfaqeɣ
tafawt n řefjar.
10 Necc ad Cek qadiɣ jar řegnus,
a Sidi inu,
ad zehhdeɣ jar ccuɛub i Cek. ◘57:10 Izhd. 108:4
11 Maɣar tamexsiwt nnec icewwaren
tᵉttakkwaḍ ař ijenwan,
řaman nnec ař iseynuten. ◘57:11 Izhd. 36:6; 108:5
12 A AREBBI, sgeɛɛed Ixef nnec
tiwa i ijenwan,
arr aɛuǧi nnec
sennej i marra tammurt.
◘57:1 57:1 1 Ṣm. 22:1; 24:4
◘57:6 57:6 Izhd. 108:6
◘57:7 57:7 Izhd. 7:16; 9:16
◘57:8 57:8 Izhd. 108:2-6
◘57:10 57:10 Izhd. 108:4
◘57:11 57:11 Izhd. 36:6; 108:5