1 Yuyur Dawud ssenni uca iqqim di lqelɛat deg idurar n Ɛayn-Jadi. 2 Uca imsar, umi dd-iɛqeb Cawul zeg weḍfar n Ifilisṭiniyyen, ɛawden as, nnan: “Dawud aqa-t di řexřa n Ɛayn-Jadi.” 3 Xenni iksi Cawul teřt-ařaf n yeryazen ittwafarzen zi marra Israil, iffeɣ ḥima ad yarzu x Dawud d yeryazen nnes arendad n tṣuḍar n Iɣayḍen n Řejruf. 4 Netta yusa-dd ɣar řkuriyyat n wuǧi i iǧan ɣar webrid mani tuɣa iǧa ijj n yefri. Cawul yudef ɣares, ḥima ad ideř iḍaren nnes. Tuɣa Dawud d yeryazen nnes qqimen ɣar ḍeffar deg ifri. ◼24:4 ḥima ad ideř iḍaren nnes - awař-a ixs ad yini ‘ḥima ad ibarḍ’. 5 Xenni nnan as yeryazen n Dawud: “Xzar, wa d ass i x d ac inna SIDI: ‘Xzar, Necc ad ac ggeɣ řeɛdu nnec deg ufus nnec u cek tzemmared akides tegged min tᵉttwařid nican di tiṭṭawin nnec.” Uca ikkar Dawud, iqess s tnuffra ijj n ṭṭarf zeg useřham n Cawul. 6 Awarni as maca issdewdiw uř n Dawud dayes, minzi netta tuɣa icarreg ijj n ṭṭarf zeg useřham n Cawul. 7 Netta inna i yeryazen nnes: “SIDI ad ayi iḥḍa aqa necc ad ggeɣ aya i sidi inu, i umedhun n SIDI, aqa ad sswiẓẓḍeɣ afus inu ḍidd nnes, maɣar netta d amedhun n SIDI!” ◼24:7 amedhun n SIDI - awař-a ixs ad yini ‘wenni ittwafarzen zi SIDI umi t dehnen s zzect’. 8 Issiweř Dawud ak-d yeryazen nnes s wawařen iqesḥen u war ten ijji ad hejmen x Cawul. U Cawul ikkar, iffeɣ-dd zeg ifri, iṭṭef abrid.

9 Xas uca ikkar uřa d Dawud, iffeɣ-dd zeg ifri, iřaɣa-dd x Cawul, inna: “Sidi inu, ajeǧid!” U Cawul ixzar ɣar ḍeffar uca yuḍar Dawud s uɣembub nnes ɣar temmurt, ibendeq. ◼24:9 s uɣembub ‘nnes’ - s Tɛibranit ‘s tinzar nnes’. 10 Inna Dawud i Cawul: “Mayemmi tesřid ɣar wawařen n iwdan, inni iqqaren: ‘Xẓar, Dawud ixs ad ac igg řɣar?’ 11 Xzar ass-a teẓrid s tiṭṭawin nnec, aqa SIDI igga cek ass-a deg ifri deg ufus inu. Nnan ayi ḥima ad cek nɣeɣ, maca necc ḥawřeɣ xak, minzi nniɣ ak-d yixef inu: ‘Necc war sswiẓẓaḍeɣ afus inu ḍidd i sidi inu, maɣar netta d amedhun n SIDI.’ 12 Xzar baba, ṭṭarf n useřham nnec aqa-t deg ufus inu. Umi necc carrgeɣ ijj n ṭṭarf n upartessu nnec, war cek nɣiɣ. Xenni ssen u xzar, aqa war ɣari deg ufus inu řa d tuɛeffna uřa d axeṭṭu u necc war kik xḍiɣ ca. Maca cek tarezzud ḥima ad ayi tekksed tudart inu. ◼24:12 tudart inu - s Tɛibranit ‘řeɛmar inu’. 13 SIDI ad iḥkem jar ayi d cek uca SIDI ad intaqem i necc zzayek, maca afus inu war ittiři xak. 14 Am mammec iqqar wawař iweznen n řejdud: ‘Zeg iɛeffanen ittas-dd tuɛeffna!’, maca afus inu war ittiři ḍidd i cek. 15 Awarni man wen iḍeffar ujeǧid n Israil? Man wen i tyemmared? Awarni yijj n weqzin immuten, awarni i yijj n uyenni n ucurdu! 16 SIDI ad yiři d řqaḍi nneɣ u netta ad iḥkem jar ayi d cek. Netta ad ixzar di man aya uca ad iḥkem x ddeɛwet inu u Netta ad ayi yaɣ tasɣart zeg ufus nnec.” ◼24:16 řqaḍi - niɣ ‘amezruf’.

17 Umi ikemmeř Dawud x řhard n wawařen-a i Cawul, imsar, aqa Cawul inna: “Ma ta d tmijja nnec, mmi Dawud?” Xenni issgeɛɛed Cawul tmijja nnes, iru. 18 Inna netta i Dawud: “Cek d amsegged xafi necc, maɣar cek teggid akidi mliḥ, maca necc ggiɣ akidek tuɛeffna. 19 Cek, wah cek tessecned ayi ass-a, mammec d ayi teggid mliḥ, maɣar SIDI tuɣa igga ayi deg ufus nnec u cek war d ayi tenɣid ca. 20 Maɣar mařa ijj n weryaz yufa řeɛdu nnes, ma xenni ad t yejj ad yuyur abrid nnes di řxar? SIDI ad cek ixeǧeṣ s řxar di ssibbet n min d ayi teggid ass-a. 21 Řexxu ssneɣ, aqa cek ad tdewřed d ajeǧid u tageldit n Israil ad temten s ufus nnec. 22 X uyenni jjaǧ ayi řexxu ɣar SIDI, aqa cek war tqeṭṭɛeḍ zzariɛet inu awarni ayi u war tᵉttekksed isem inu zi taddart n baba!” 23 Dawud ijjuǧ i Cawul u Cawul yareggʷeḥ ɣar taddart nnes u Dawud d yeryazen nnes geɛɛden ɣar lburj deg idurar.