1 Ḥajan i Dawud, nnan: “Aqa Ifilisṭiniyyen ttmenɣan ak-d Qaɛila uca ttkeccaḍen inedrar.” 2 Isseqsa Dawud SIDI, inna: “Ma ad ffɣeɣ din, ad wteɣ Ifilisṭiniyyen?” SIDI yarra-dd x Dawud: “Ffeɣ, wwet Ifilisṭiniyyen uca fekk Qaɛila!” 3 Nnan as yeryazen n Dawud: “Xzar, neccin nᵉtteggʷed deɣya da di Yahuda, mammec ɛad mařa neccin neffeɣ ɣar Qaɛila ɣar iseddiyyen n řɛeskar n Ifilisṭiniyyen.” 4 Uca Dawud isseqsa SIDI twařa nneɣnit u SIDI yarra-dd xas, inna: “Kkar, hwa ɣar Qaɛila, minzi Necc ad ac wceɣ Ifilisṭiniyyen deg ifassen nnec.” 5 Xas uca iffeɣ Dawud ak-d yeryazen nnes ɣar Qaɛila, immneɣ ak-d Ifilisṭiniyyen. Netta yuẓẓeř x tḥimarin nsen uca iwta ten s ict n tecti d tameqqrant. Ammu i ifekk Dawud imezdaɣ n Qaɛila.

6 Umi Abyatar, mmis n Aximalik, yarweř ɣar Dawud ɣar Qaɛila, imsar, netta aqa ihwa ak-d upalṭu n ukehhan deg ifassen nnes. ◘23:6 1 Ṣm. 22:20

7 Ḥajan as i Cawul, aqa Dawud yiweḍ ɣar Qaɛila. Xenni inna Cawul: “AREBBI igga ayi i-t deg ufus inu, minzi netta ittwaḥebbes ařami yudef ɣar ict n tendint s tewwura d iɛumad i ubelleɛ.” 8 Ijja Cawul ad řaɣan x marra řgens ɣar umenɣi, ḥima ad hwan ɣar Qaɛila maḥend ad nnḍen i Dawud d yeryazen nnes.

9 Řami yargeb Dawud belli Cawul issewjed as tuɛeffna-ya s tnuffra, inna netta i ukehhan Abyatar: “Awi-dd apalṭu n ukehhan da!” 10 Inna Dawud: “A SIDI, AREBBI n Israil, amsexxar nnec isřa nican, aqa Cawul iɛemmed ad dd-yas ɣar Qaɛila, ḥima ad ixarreb tandint di ssibbet inu. 11 Ma ad ayi sseɛdun imezdaɣ n Qaɛila deg ufus nnes? Ma ad ihwa Cawul am mammec isřa umsexxar nnec? A SIDI, AREBBI n Israil, ini t i umsexxar nnec!” SIDI yarra-dd: “Netta ad ihwa.” 12 Xas uca inna Dawud: “Ma imezdaɣ n Qaɛila ad sseɛdun necc d yeryazen inu i Cawul?” Inna SIDI “Nitni ad cek sseɛdun.” 13 Xas uca ikkar Dawud ak-d yeryazen nnes, amenni setta mya n yeryazen, uca ffɣen nitni zi Qaɛila, dewřen gguren mani ma zemmaren ad uyuren. Umi ittwanna i Cawul, aqa injem-dd Dawud zi Qaɛila, ijja zeg webrid nnes, war iffiɣ ca.

14 Dawud iqqim di řexřa di lqelɛat n idurar uca iqqim x idurar di řexřa n Zif. Cawul yarzu xas marra ussan, maca AREBBI war t iggi deg ufus nnes. 15 Umi iẓra Dawud, aqa Cawul tuɣa iffeɣ ḥima ad xas yarzu, tuɣa Dawud di řexřa n Zif di Xurisa. ◼23:15 ḥima ad xas yarzu - s Tɛibranit ‘ḥima ad yarzu x řeɛmar nnes’. 16 Xenni ikkar Yunatan, mmis n Cawul, uca yuyur ɣar Dawud di Xurisa, issejhed afus nnes di AREBBI. 17 Netta inna as: “War tteggʷed ca, minzi afus n baba Cawul war cek dd-ittikkʷiḍ u cek ad tdewřed d ajeǧid x Israil u necc ad dewřeɣ d wiss tnayen ɣarek. Uřa d baba Cawul issen aya.” 18 U nitni s tnayen idsen ggin ijj n řɛahd zzat i wudem n SIDI. Dawud iqqim di Xurisa u Yunatan yareggʷeḥ ɣar taddart nnes.

19 Xas uca geɛɛden yeryazen zi Zif ɣar Cawul di Jibɛa, nnan: “Ma war innuffar Dawud ɣarneɣ di lqelɛat deg idurar di Xurisa, x tewrirt n Ḥaxila, ɣar ljanub n tnezruft? ◼23:19 ɣar ljanub n tnezruft - niɣ ‘ɣar yefusi n tnezruft’. 20 Xenni řexxu, a ajeǧid, hwa-dd ɛlaḥsab marra meẓri n wuř nnec. Ad tiři xenni tmesřact nneɣ, ḥima ad t nesseɛdu ɣar ufus n ujeǧid.” 21 Cawul inna: “Ad tᵉttwabarkem zi SIDI, minzi cqiɣ awem ammu. 22 Uyurem, wejdem ɛad ktar u ḥḍam u snem u xzarem amcan mani iǧa uḍar nnes u man wen i t dinni iẓrin, maɣar qqaren ayi, aqa netta d aḥraymi aṭṭas. 23 Ḥḍam u ssnem marra imucan n tnuffra mani issnuffar ixef nnes u ɛeqbem mařa tkemmřem. Xenni ad kidwem uyureɣ u mařa netta di temmurt, necc ad xas arzuɣ jar marra řuřuf n Yahuda.” 24 Kkaren nitni, izzaren zzat i wudem n Cawul ɣar Zif. Dawud d yeryazen nnes tuɣa aten di řexřa n Maɛun, di Řewḍa ɣar ljanub n tnezruft.

25 Cawul d yeryazen nnes ffɣen ḥima ad xas arzun. Nnan aya i Dawud u netta ihwa-dd zi řejruf di řexřa n Maɛun. Umi t isřa Cawul, řexdenni iḍfar netta Dawud di řexřa n Maɛun. 26 Cawul ikka x ijj n uɣezdis n wedrar u Dawud d yeryazen nnes kken x uɣezdis nneɣni n wedrar. Řami iqeǧeq Dawud maḥend ad yaggʷej x wudem n Cawul, imsar, aqa Cawul d yeryazen nnes nnḍen-dd i Dawud d yeryazen nnes ḥima ad ten ṭṭfen. 27 Maca yusa-dd ijj n ureqqas ɣar Cawul inna: “Deɣya, as-dd, minzi Ifilisṭiniyyen hejmen x temmurt!” 28 Xenni iɛqeb-dd Cawul zeg weḍfar n Dawud uca iffeɣ ɣar umsagar ak-d Ifilisṭiniyyen. X uya qqaren as i wemcan nni Salaɛ-ha-Maxlikut. ◼23:28 Salaɛ-ha-Maxlikut - isem wanita ixs ad yini ‘aseǧaḥ n ubeṭṭu’ niɣ ‘aseǧaḥ n warweř’.