1 Camwil immut u marra Israil imun. Nitni wtin xas agejdur u neḍřen t di taddart nnes di Rama. Xas uca ikkar Dawud, ihwa ɣar řexřa n Faran. ◘25:1 1 Ṣm. 28:3 2 Tuɣa di Maɛun ijj n weryaz wenni tuɣa ɣar iǧa wagřa di Karmil. Aryaz tuɣa d bu-wagřa ař ṭṭarf, iǧa ɣares teřt-ařaf n wuǧi d ařef n iɣayḍen. Netta tuɣa iǧas uǧi nnes di Karmil. 3 Aryaz ttřaɣan as Nabal u tamɣart nnes ttřaɣan as Abijayil. Tamɣart tuɣa ɣares řeɛqeř mliḥ u tuɣa-tt d muṣbiḥ i řxezrat, maca aryaz tuɣa iqseḥ u timegga nnes d tiɛeffanin i ǧant. Netta tuɣa-t am wuř nnes. ◼25:3 Nabal - isem wanita ixs ad yini ‘abuhaři’. Abijayil - isem wanita ixs ad yini ‘baba d řefraḥet inu’.

4 Umi isřa Dawud di řexřa, aqa Nabal tuɣa iǧas uǧi nnes, 5 issekk Dawud ɛecra n imsexxaren din. Inna Dawud i iḥudriyyen: “Gaɛɛdem ɣar Karmil u xmi ɣa tawḍem ɣar Nabal, ittxeṣṣa awem ad tesseqsam x umeddur nnes deg yisem inu. 6 Ittxeṣṣa ad tinim ammu: ‘Iři ad xak yiři řehna uca ad yiři řehna x taddart nnec d řehna ɣar marra min iǧan nnec! 7 Aqa necc sřiɣ belli cek ɣarek irewwan. Iwa xenni, imeksawen nni ɣarek tuɣa aten akidneɣ uca neccin war ten nxewwej ca uca war ten inqiṣ walu zi min ɣarsen marra ussan i ikkin nitni akidneɣ di Karmil. 8 Seqsa imsexxaren nnec u nitni ad ac inin. Ejj ad afen imsexxaren arḍa di tiṭṭawin nnec, maɣar nusa-dd ɣar ijj n wass n wurar. Ttzawgeɣ, ewc i imsexxaren nnec u i mmic Dawud min ɣa yaf ufus nnec.’ ”

9 Umi iwḍen imsexxaren n Dawud din, ssiwřen ak-d Nabal marra awařen-a deg yisem n Dawud, uca qqimen ttrajan. 10 Maca Nabal yarra-dd x imsexxaren n Dawud, inna: “Man wen i iǧan Dawud u man wen i iǧan d mmis n Yassa? Ass-a aqa din aṭṭas n imsexxaren nni yarewřen. Kuř ijj yarweř zi zzat n wudem n bab nnes. 11 Ma ad ksiɣ xenni aɣrum inu d waman inu d tɣarṣt i ɣarṣeɣ i irewwan inu uca ad t wceɣ i yeryazen x yinni war ssineɣ uřa d manis dd-usin nitni?” 12 Xenni nnqeřben imsexxaren n Dawud ɣar webrid i zi dd-usin, ɛeqben uca usin-dd ɣar Dawud u ḥajan as marra awařen-a. ◼25:12 ɣar webrid i zi dd-usin - s Tɛibranit ‘ɣar webrid nsen’. 13 Xas uca inna Dawud i yeryazen nnes: “Kur aryaz ad ibyes ssif nnes!” Uca kuř aryaz ibyes ssif nnes, uřa d Dawud ibyes ssif nnes. Nitni geɛɛden awarni i Dawud, amenni arebɛa-mya n yeryazen, u qqimen mitayen ɣar řeḥwayej.

14 Ijjen zeg imsexxaren tuɣa iḥaja aya i Abijayil, tamɣart n Nabal, inna as: “Xzar, Dawud issekk-dd ireqqasen zi řexřa ḥima ad ssiwḍen lbaraka i siditneɣ, maca wanita iqřeɛ xasen s tzawart. 15 Iryazen tuɣa aten cnan i neccin u nitni war d aneɣ seddɛen ca. War nefqid walu marra ussan i dinni nesseɛdu akidsen deg iyyar n tarewsa. 16 Nitni tuɣa aten am yijj n řḥiḍ i neccin, ǧiřet d wass, di marra ussan i kidsen neǧa u tuɣa neccin narwes uǧi. 17 Řexxu aqa tessned tt. Xzar mliḥ, min ittxeṣṣa ad t tegged, maɣar řɣar x siditneɣ d marra taddart nnes imten. Netta d ijj n weryaz war isekkwi wawař akides.” 18 Tqeǧeq Abijayil, teksi mitayen n tecnifin d tnayen n txuncay n yiřem i binu d xemsa n texsiwin wejdent d xemsa n řeqyas n teɣwawin d mya n tɣayiṭatin n zzbib d mitayen n iɣrumen n tazart, u nettat tessars manawenni marra x yeɣyař. ◼25:18 řeqyas - ɛřayen 7-8 litru. 19 Tenna i imsexxaren nnes: “Uyurem zzat i wudem inu. Xzar necc ad kenniw aredfeɣ.” Maca nettat war d as tenni aya i weryaz nnes Nabal. ◼25:19 Uyurum - s Tɛibranit ‘Ẓwam’.

20 Umi tenya nettat x weɣyuř, tehwa x udurri n wedrar, xzar, imsar aqa Dawud d yeryazen nnes hwan-dd i umsagar akides u nettat temmeřqa akidsen. 21 Dawud tuɣa inna: “S tidett, baṭeř i ḥḍiɣ x marra min ɣares iǧan di řexřa, ařami war iweddar walu zi min ɣares. Netta ixeǧeṣ ayi min iṣebḥen s min war iḥřin. 22 Ejj ad igg AREBBI ta d ta ak-d řɛedyan n Dawud u ad dayes yarni ɛad, mařa necc ad jjeɣ ař tiwecca uřa d ijj wenni t itteggen x řḥiḍ zi marra min ɣares!”

23 Umi teẓra Abijayil Dawud, teḍra deɣya x weɣyuř nnes, tewḍa x temmurt zzat i Dawud, tuḍar as s uɣembub nnes ɣar temmurt. 24 Nettat tewḍa as ɣar iḍaren, tenna: “Necc, waha, i di iǧa řɛib, a Sidi inu. Ejj ad tessiweř tayya nnec akidek u seř i wawařen n tayya nnec. 25 Ejj sidi inu war ixezzar ɣar weryaz-a i war isekkwin, ɣar Nabal, maɣar am mammec d as qqaren, ammu i yeǧa netta. Nabal d isem nnes u tubbuheřya aqa-tt dayes. Necc, tayya nnec, war ẓriɣ ca imsexxaren n sidi inu i dd-tessekked. 26 Xenni řexxu, a sidi, s tidett am iddar SIDI u iddar řeɛmar nnec, aqa SIDI d wenni cek immenɛen maḥend ad tessizzřed idammen u ad tfekked ixef nnec s ufus nnec. Ad dewřen řexxu řɛedyan nnec d yinni yarezzun ad ggen řɣar di sidi inu am Nabal. 27 Iwa řexxu, man aya d lbaraka i dd-tiwi tayya nnec i sidi inu, maḥend ad tt wcen i imsexxaren nni yuyuren deg iṣuraf n sidi inu. 28 Ttzawgeɣ, ɣfar axeṭṭu i tayya nnec, maɣar SIDI Arebbi ad issbedd i sidi inu ict n taddart temten, minzi sidi inu ittegg garrat n SIDI u war dayek ittwaff řɣar zeg wussan imezwura nnec. 29 Mařa ijj n bnadem ikkar xak ḥima ad cek iḍfar, ḥima ad yarzu x řeɛmar nnec, xenni ad yiři řeɛmar n sidi inu di řaman, iqqen di tecyart n yinni iddaren ɣar SIDI AREBBI nnec, maca řeɛmar n řɛedyan nnec ad zzayes iḥejjar netta ɣar řaggʷaj zeg ukemmic n iǧiy. 30 Ad imsar, mařa SIDI ad igg ak-d sidi inu ɛlaḥsab marra taṣebḥant i xak issiweř u ad cek yegg d řḥakem x Israil, 31 xenni war ittiři aya i cek, a sidi inu, d ssibbet i zi ɣa tenqarḍed uřa d taɛenkrift i wuř, aqa cek tessizzřed idammen baṭeř u aqa sidi inu igga ad ifekk ixef nnes. Mařa SIDI AREBBI ad igg řxar di sidi inu, ɛqeř xenni x tayya nnec.”

32 Xenni inna Dawud i Abijayil: “Ad ittwabarek SIDI, AREBBI n Israil, wenni cem dd-issekken ass-a i umsagar akidi! 33 Aqa tᵉttwabarek řefhamet nnem uca tᵉttwabarked uřa d cem, řami d ayi tessbedded ass-a zeg usizzeř n idammen u zi nneqmet i yixef inu s ifassen inu! 34 Maɣar s tidett, am iddar SIDI, AREBBI n Israil, wenni d ayi issbedden ad am ggeɣ řɣar, mařa cem war ɣari dd-teffiɣed deɣya, xenni war ittɣimi ɣar tfawt n tuffut uřa d ijjen zeg iwdan n Nabal, wenni t itteggen x řḥiḍ!” 35 Uca iksi Dawud zeg ufus nnes min tuɣa i d as dd-tiwi, inna as: “Uyur di řehna ɣar taddart nnem! Xzar, necc sřiɣ-dd ɣarem u ad ssgeɛɛdeɣ udem nnem iḥeznen.” ◼25:35 sřiɣ-dd ɣarem - s Tɛibranit ‘sřiɣ i tmijja nnem’.

36 Umi dd-tusa Abijayil ɣar Nabal, ittegg netta ict n zzardet n tissit di taddart nnes am yict n zzardet n ujeǧid. Uř n Nabal tuɣa-t x řxaḍar nnes, iscar ař ṭṭarf. S uyenni nettat war d as tenni uřa d ijj n wawař, ameẓyan niɣ ameqqran, x min imsaren ař tafawt n tuffut. 37 Ɣar tuffut, řami iffeɣ binu x Nabal, imsar, aqa tamɣart nnes tenna as man aya. Uca ijmed wuř nnes, idweř am yijj n weẓru. 38 Awarni ɛecra n wussan, imsar, aqa SIDI iwta Nabal ařami immut.

39 Umi isřa Dawud belli Nabal immut, inna netta: “Ad ittwabarek SIDI wenni iggin řḥukm x řḥegra i d ayi ittwaggen, ittar i-t zeg ufus n Nabal, uca issbedd amsexxar nnes ḥima ad igg řɣar. SIDI yarra řɣar n Nabal ad dd-idweř x uzeǧif nnes!” Uca Dawud issekk ijj u wanita issiweř ak-d Abijayil, ḥima ad tt yawi d tamɣart i netta.

40 Umi dd-usin imsexxaren n Dawud ɣar Abijayil ɣar Karmil, ssiwřen akides, nnan: “Dawud issekk aneɣ-dd ɣarem, ḥima ad cem nawi d tamɣart i netta.” 41 Řexdenni tekkar, tbendeq s uɣembub nnes ɣar temmurt, tenna: “Xzar, tamsexxart nnec am yict n tayya, ḥima ad tessird iḍaren i imsexxaren n sidi inu.” 42 Tqeǧeq Abijayil, tekkar. Nettat tenya x weɣyuř nnes ak-d xemsa n temsexxarin nnes timeẓaynin tinni tt yareddfen x iḍaren. Nettat teḍfar ireqqasen n Dawud uca tedweř d tamɣart nnes.

43 Yiwi Dawud ɛawed Axinuɛam zi Yazraɛil d tamɣart. Nitenti s tnayen idsent dewřent d tamɣart i netta. 44 Cawul maca tuɣa iwca yeǧis Mixal, tamɣart n Dawud, i Palti, mmis n Layic wenni iǧan zi Jallim. ◘25:44 2 Ṣm. 3:15