17
1 Iḥřa ijj n uzeɛɛif n weɣrum
yuẓɣen ak-d řehna,
x ict n taddart teccur s tɣarṣa,
dayes amenɣi. ◘17:1 Awřn. 15:17
2 Ijj n yismeɣ ifetnen ad iḍebbar
x ijj n mmis nni ittawyen ɣar řefḍiḥet,
di řwesṭ n yaytmas ad ibḍa netta řwart.
3 Aṭenjir n usefsi i nnuqart
u afarran i wureɣ,
maca SIDI ittjarrab uřawen. ◘17:3 Awřn. 27:21; Irm. 17:10
4 Aɛeffan ixezzar ɣar iyencicen iɛeffanen,
bu-ixarriqen ittic amezzuɣ
i yiřes iccuren s řɣecc.
5 Wenni ittḥeccen x umezřuḍ,
issfeṭṭeḥ wenni t-i-dd-ixeřqen,
wenni ifarrḥen x arẓiyyet,
war ittwiḥsib d amezdag. ◘17:5 Awřn. 14:31
6 Ttaj n iwessura d ayyawen,
talwizt n iḥenjiren d ibabaten nsen.
7 Ayencic n ccan
war dd-ittis ak-d ubuhaři,
xenni ɛessak ɛad ayencic issxarriqen
ak-d umcenneɛ.
8 Tarzeft n arrecwet
d ijj n weẓru izewwqen
di tiṭṭawin n bab nnes,
mani ma yarra s uzeǧif, ittefřiḥ.
9 Wenni issdurruyen axeṭṭu,
yarezzu tayri,
maca wenni ittɛawaden
ict n řḥajjet zi jdid,
ibeṭṭa imeddukkař icnan.
10 Ittqarra utextex x ufehham
aṭṭas x mya n teyyita x yijj n ubuhaři.
11 Amɣewweɣ yarezzu mɣir x řɣar,
x uya ad ɣares dd-ittwassekk
ijj n umsexxar iqesḥen ḍidd nnes.
12 Ejj ad immeřqa ca n ddub
i umi ttwacaren tarwa ak-d ca n yijjen,
maca war iǧi abuhaři di tubbuheřya nnes.
13 Wenni ittxeǧaṣen min iṣebḥen s řɣar,
war tᵉttḥeyyid arẓiyyet x taddart nnes. ◘17:13 Aɛwd. 32:35; Awřn. 20:22; 24:29; Rum. 12:17; 1 Ts. 5:15; 1 Bṭ. 3:9
14 Beddu n umenɣi
amecnaw arzam n řḥemřet n waman.
Ejj amenɣi ad yars qbeř i ɣa idduqqez. ◘17:14 Awřn. 20:3
15 Wenni ittbarran aɛeffan
u wenni ittbarraḥen
aqa amsegged d aɛeffan,
aqa nitni s tnayen idsen
d nnɛi i SIDI. ◘17:15 Uf. 23:7; Awřn. 24:24; Ica. 5:23
16 Mayemmi din i ɣa iřint tmenyat
deg ufus n ubuhaři
maḥend ad iseɣ tiɣit,
am war ɣares uř i man aya?
17 Ameddukkeř d tidett ittexs řebda,
u tawmat tᵉttwaxřeq-dd i řeḥṣaret.
18 Bnadem nni war ɣar iǧi wuř imten,
iccat afus,
ittegg ixef nnes d aḍman i jjar nnes.
19 Wenni ittexsen axeṭṭu,
ittexs amcubbec,
wenni itteggen tawwart nnes tgeɛɛed,
yarezzu tareẓẓit. ◘17:19 Awřn. 16:18
20 Wenni ɣar iǧa uř ifarɣ,
war ittif min iṣebḥen,
wenni ifarrɣen s iyencicen nnes,
ad iwḍa di arẓiyyet.
21 Wenni dd-yurwen ijj n ubuhaři,
ittawi-dd acḍan i yixef nnes,
babas n ubuhaři war izemmar ad ifarḥ.
22 Uř ifarḥen ijebbed agenfu,
maca buḥbeř iceḍnen issaẓaɣ iɣsan. ◘17:22 Awřn. 15:13
23 Aɛeffan ad dd-iksi tarzeft n arrecwet
zeg weḥsin,
ḥima ad issfarɣ imesraq n řḥeqq.
24 Afehham ittegg tiɣit zzat i tmuɣři nnes,
maca tiṭṭawin n ubuhaři
ttawyent ař ṭṭarf n temmurt. ◘17:24 Amb. 2:14; 8:1
25 Ijj n mmis abuhaři d řeɛdab i babas,
d ijj n řeḥřiq amerzag
i wenni t-i-dd yurwen. ◘17:25 Awřn. 10:1; 15:20; 19:13
26 Aweddeb n umsegged war iǧi nican,
am uřa d tiyyita i ayt n ṭṭasiřet
di ssibbet n řeṣfayet nsen.
27 Wenni ɣar teǧa tussna,
imenneɛ awařen nnes,
aryaz afehham dayes buḥbeř nnes yarsa.
28 Uřa abuhaři issɣaden,
ad ittwaḥseb d amiɣis,
wenni ibellɛen iyencicen nnes
ad ittwaḥseb d afettan.
◘17:1 17:1 Awřn. 15:17
◘17:3 17:3 Awřn. 27:21; Irm. 17:10
◘17:5 17:5 Awřn. 14:31
◘17:13 17:13 Aɛwd. 32:35; Awřn. 20:22; 24:29; Rum. 12:17; 1 Ts. 5:15; 1 Bṭ. 3:9
◘17:14 17:14 Awřn. 20:3
◘17:15 17:15 Uf. 23:7; Awřn. 24:24; Ica. 5:23
◘17:19 17:19 Awřn. 16:18
◘17:22 17:22 Awřn. 15:13
◘17:25 17:25 Awřn. 10:1; 15:20; 19:13