1 Ammu i ttwakemmřen ijenwan d temmurt d qaɛ řɛeskar nsen. ◼2:1 qaɛ řɛeskar nsen - niɣ ‘marra řɛeskar nsen’. 2 Deg wass wiss sebɛa ikemmeř AREBBI řxedmet nnes i igga uca yareyyeḥ deg wass wiss sebɛa zi marra řxedmet nnes i igga. ◘2:2 Uf. 20:11; 31:17; Aɛwd. 5:14; Ɛbr. 4:4. 3 Ibarek AREBBI ass wiss sebɛa uca issqeddes i-t, minzi dayes i yareyyeḥ zi marra řxedmet nnes, řxedmet i dd-ixřeq AREBBI maḥend ad tt igg amenni.

Ina d imezruyen n wexřaq n ujenna d temmurt řami dd-ttwaxeřqen.

4 Deg wass i igga SIDI AREBBI tammurt d ijenwan 5 - qbeř tuɣi din marra cbarq di temmurt u qbeř dd-iɣmi wefsu n yeyyar, minzi SIDI AREBBI war ijji anẓar ad iwwet ɛad x temmurt - uca war tuɣi din Adam ɛad ḥima ad ixdem tammurt, 6 tgeɛɛed-dd tayyut zi temmurt, tessu marra udem n temmurt.

7 Uca ikewwen SIDI AREBBI Adam zi tɛejjajt n ucař uca isuḍ řeɛwin n tudart deg wenzaren nnes. Ammu i idweř Adam d ijj n nnefs iddar. ◘2:7 1 Kur. 15:45, 47.

8 Xenni iẓẓu SIDI AREBBI jjennet di Ɛadn, jjihet n ccarq, uca issars din Adam i igga. ◼2:8 Ɛadn - isem wanita ixs ad yini ‘meẓri’. S uyenni tuɣa jjennet Ɛadn d ijj n wemcan mani izemmar bnadem ad yarr meẓri ɛlaḥsab min ixs Arebbi, war iǧi ɛlaḥsab min ixs bnadem. 9 Uca isseɣmi-dd SIDI AREBBI zi temmurt kuř tacejjart, tecna i řxeẓrat u tmiẓidt i macca, uca isseɣmi-dd řa d tacejjart n tudart di řwesṭ n jjennet uřa d tacejjart n tussna n řxar d řɣar. ◘2:9 Asa. 2:7.

10 Iffeɣ-dd ijj n iɣzar zi Ɛadn, ḥima ad issuw jjennet u ssenni immsebḍa x arebɛa n izeǧifen i iggin tiseǧyawin. 11 Isem n yeɣzar amezwaru d Ficun. Netta i innḍen i marra tammurt n Ḥawila mani iǧa wureɣ. 12 Ureɣ n temmurt nni iṣbeḥ. Aqa din aserɣaɣ acemřař qqaren as ‘bᵉdula’, d weẓru n ‘uniks’. 13 Isem n iɣzar wiss tnayen d Jiḥun i tuɣa innḍen i marra tammurt n Kuc. 14 Isem n iɣzar wiss třata d Ḥiddaqil. Netta ittazzeř ɣar ccarq n Accur. U iɣzar wiss arebɛa d Lfuraṭ.

15 Iksi SIDI AREBBI Adam uca issars i-t di jjennet n Ɛadn, ḥima ad tt ixdem u ad tt iḥḍa. 16 SIDI AREBBI iweṣṣa Adam, inna: “Zi marra ticejjura n jjennet ad tecced macca, 17 maca zi tcejjart n tussna n řxar d řɣar war ttᵉtted ca zzayes, minzi deg wass i zzayes ɣa tecced, řmewt i ɣa temmted!”

18 Inna SIDI AREBBI: “War iɛeddeř ad yiři Adam weḥḥdes. Ad as ggeɣ wi t ɣa iɛawnen, am netta qibač nnes.”

19 Tuɣa SIDI AREBBI igga zeg ucař marra řmař n řexřa u marra ijḍaḍ n ujenna, uca indeh i-ten ɣar Adam, ḥima ad iẓar mammec i ten ɣa isemma. Mammec i ɣa isemma Adam kuř nnefs iddaren d wa d isem nnes. 20 Igga Adam ismawen i marra řebhayem d yejḍaḍ n ujenna u i marra řmař n řexřa, maca i Adam war yufi wi t ɣa iɛawnen d wi ɣa yiřin am netta qibač nnes.

21 Issehwa-dd SIDI AREBBI ijj n yiḍeṣ yuǧeɣ x Adam uca iṭṭeṣ. Xenni iksi icten zi tɣezdisin nnes uca iqqen amcan yarezmen nni s weysum. 22 Yarra SIDI AREBBI taɣezdist tenni i iksi zi Adam d tamɣart uca yiwyi tt-i-dd ɣar Adam. ◘2:22 1 Kur. 11:8. 23 Xenni inna Adam: “Twařa-ya tanita aqa-tt d iɣes zeg iɣsan inu d aysum zeg weysum inu. Tanita ad tᵉttwasemma ‘taryazt’, ixs ad yini ‘tamɣart’, minzi nettat tᵉttwaksi-dd zeg weryaz.” ◘2:23 Mal. 2:14; Afa. 5:30, 31. 24 X uya ad ismeḥ weryaz di babas d yemmas, ad iqqen ɣar temɣart nnes uca ad iřin d ict n ddat. ◼2:24 ict n ddat - s Tɛibranit ‘ijj n weysum’. Awařen xsen ad inin belli aryaz d temɣart nnes aqa-ten d ijj n bnadem. Man aya d ttidet s minzi Ḥawwa teffeɣ zeg arrimet n Adam s ufus n Arebbi.  ◘2:24 Mt. 19:5, 6; Mk. 10:8; Afa. 5:31; 1 Kur. 6:16. 25 Tuɣa-ten s tnayen idsen d iɛaryanen, Adam d temɣart nnes, maca tuɣa war din ca n řeḥya jar asen. ◘2:25 Amz. 3:7.