26
Izři n temmurt n Yahuda
1 Deg wass nni ad ɣennjen izři-ya
di temmurt n Yahuda:
“Neccin ɣarneɣ ict n tendint ijehden,
Netta issbedd ‘Asenjem’
d řeḥyuḍ d řeqwarat. ◘26:1 Izhd. 46:6; 125:1; Awřn. 18:10
2 Arzmem tiwwura,
maḥend řgens amsegged ad dd-yadef,
řgens nni iḥeṭṭan
řaman i SIDI řebda.
3 S řbař imten am t iǧa,
Cek tḥeṭṭid t di řehna,
wah di řehna,
maɣar řgens ittcařa xak.”
4 “Tecřem x SIDI i řebda,
maɣar di SIDi, SIDI,
i teǧa d Taṣḍart n zzmanat.
5 Maɣar Netta ittarra ad aḍaren
inni izeddɣen dinni di řuɛřa,
tandint yuɛřan ad tt issehwa,
ad tt issehwa ař tammurt,
ad tt iɛarn deg ucař.
6 Ad xas iɛfes uḍar,
iḍaren n wenni ittwaḥṣaren,
řatarat n iḍaren n imezřaḍ.”
7 “Abrid n umsegged iwaṭa,
nican i iǧa řatar n umsegged,
Cek tᵉttseggamed t.
8 Uřa deg webrid n řeḥkamat nnec,
a SIDI, tuɣa nessitim ac,
řeɛmar nneɣ immeẓri
deg Yisem nnec u di řidaret nnec.
9 Tuɣa řeɛmar inu ittweḥḥac i Cek di ǧiřet,
uřa d buḥbeř inu dayi,
tuɣa yarezzu xak s jjehd.
Maɣar mařa řeḥkamat nnec
usint-i-dd x temmurt,
ad řemden imezdaɣ n temmurt tasegda.”
10 “Mařa isscen bnadem aḥinni i uɛeffan,
wanita war iřemmed tasegda,
maca ad yegg řɣar
di temmurt iccuren s tsegda,
u war iẓarr aɛuǧi n SIDI.”
11 “A SIDI, afus nnec ittwassgeɛɛad,
maca nitni war t ttwiřin.
Waxxa amenni ad t ẓaren ɛad,
maca ad seḍḥan zeg wasam nnec
i řgens nnec,
wah, timessi ad tecc iɣrimen nnec.
12 A SIDI, řḥukm nnec xaneɣ
ad yiři d řehna,
maɣar Cek tkemmřed
marra timegga nneɣ di ṭṭweɛ nneɣ.
13 A SIDI, AREBBI nneɣ,
isiditen nneɣni seǧḍen xaneɣ.
Zzayek Cek weḥḥdek
aqa nettidar Isem nnec.
14 Imettan war tteddaren ɛawed,
řexyařat war ttnekkaran.
S uya txeřfed asen s řɣar
uca teqḍid ten.
Cek tekksed marra řɛeqran xasen.
15 A SIDI, Cek tarnid di řgens-a,
Cek tarnid di řgens-a,
tᵉttwassɛuǧed dayes,
aqa tesswesɛed marra iymiren n temmurt.”
16 “A SIDI, di řeḥṣaret arzun xak,
zeǧɛen tiẓaǧitin nsen s tḥessect,
umi xasen dd-tusa tarbiyyet nnec.
17 Am mammec tᵉttnezbar
ict n temɣart s ddeyset,
tenni igguren ad taru aḥenjir nnes
u tesɣuyyu s řewjeɛ n tarut nnes,
ammu i d aneɣ tuɣa neccin, a SIDI,
zzat i tiṭṭawin nnec. ◘26:17 Yḥ. 16:21
18 Tuɣa neccin axmi neksi s ddeyset,
imneɛ aneɣ řeḥriq n tarwa,
tuɣa neccin axmi nuru asemmiḍ.
War dd-niwi asenjem i temmurt,
u imezdaɣ n ddunect war dd-ttwaxeřqen.”
19 “Imettan nnec ad ddaren!
Řxecbat inu ad beddent!
Faqem, uca sřiweřwem kenniw,
inni izeddɣen deg ucař!
Aqa nnda n tfawin am nnda nnec,
uca tammurt ad taru řexyařat n imettan.”
20 “Uyur, a řgens inu,
adef ɣar ixxamen nnec n daxeř,
belleɛ tiwwura awarni ac.
Snuffar ixef nnec
řqedd n ict n tzeḥziḥt
ař dd iɛdu wesxeḍ. ◘26:20 2 Kur. 4:17
21 Maɣar xzar, SIDI ad iffeɣ zeg wemcan nnes
maḥend ad ixřef i imezdaɣ n temmurt
řmuɛṣiyyet nsen,
uca tammurt ad tɛarra idammen
i xas ittwassizřen,
war txemmiř ɛad inni xas ittwanɣen.”