1 “Deg wass nni ad ixřef SIDI zi ‘Liviyatan’, afiɣar itteḥruǧuḍen s tazřa, s ssif nnes iqseḥ, imɣar d ijhed, wah ad ixřef zi ‘Liviyatan’, afiɣar itteḥruruden, uca ad ineɣ řhaycet nni iǧan di řebḥar.” ◘27:1 Asa. 12:9

2 “Deg wass nni ad din yiři ...

ijj n umarjeɛ n uḍiř s binu icnan.

Ɣennjem xas s nnubtat.

3 Necc, SIDI, ad tt iḥḍa,

ad tt ssbezzgeɣ,

ḥima war tt ijarreḥ ḥed,

Necc ad xas ɛesseɣ s wass d ǧiřet.

4 Tafqeḥt war dayi teǧi qaɛ,

maca mařa ca n yijjen izɛem

ad issars zzati tazeggʷart d isennanen,

Necc ad kidsen mmenɣeɣ,

ad ten ssarɣeɣ munen,

5 illa mařa iṭṭef bnadem di jjehd inu,

uca ad yegg řehna akidi,

wah ad yegg řehna akidi!”

6 “Deg wussan i dd ɣa yasen ad iwwet Yaɛqub aẓwar, Israil ad innuwar, ad iyma, u nitni ad ccuren tammurt s řɣiǧet.” ◘27:6 Izhd. 72:16

7 “Ma iwta i-t Netta, am mammec wenni iwtin, iwta i-t? Ma ittwaneɣ netta, am mammec ttwanɣen inni zzayes ittwanɣen? ◼27:7 Zzayes - ixs ad yini ‘zi AREBBI’. 8 Cek tarebbid tt s řeqyas řami tt tenḍared, Netta issuzzar i-tt s usemmiḍ nnes iqesḥen, deg ijj n wass n usemmiḍ zi manis i dd-tneqqar tfuct. ◘27:8 Irm. 30:11; 46:28 9 S uya ad ittwagg aṣřaḥ x řmuɛṣiyyet n Yaɛqub s man aya uca ad yiři aya d řɣiǧet tekmeř zeg uḥeyyed x ddnub nnes: aqa netta ad yarr marra iẓra n iɛalṭaren d iẓra n jjar ttwařebzen u war din ttbeddint ɛad trebbin n cwarti d ipilaren n arebbi n tfuct.”

10 “Maɣar tandint ittwassjehden ad tedweř ḥafi, am yict n tzeddiɣt ittwajjen, ixřan am řexřa. Dinni ad ihda uɛejmi, ad din ijna, ad icc tiseḍwin nnes. ◼27:10 aɛejmi - niɣ ‘amwa’, ‘ayenduz’ niɣ ‘yuggu’. 11 Xmi ɣa yaẓɣen řefruɛ nnes, ad ttwaqeḍɛen. Ad dd-asent temɣarin, ad ten ssarɣent, maɣar war iǧi d ijj n řgens dayes řefhamet. X uya wenni t iggin, war d asen izziǧiz, u wenni t ikewwnen, war d as yareṭṭa.”

12 “Deg wass nni ad izweḍ SIDI tidrin zi mani iǧa yeɣzar n Lfuraṭ ař Teɣzart n Miṣra. Maca kenniw ad ttwařeqḍem, ijjen awarni i wenneɣni, a ayt n Israil. ◘27:12 Ica. 17:5 13 Deg wass nni ad suḍen deg uyicc ameqqran n icarri. Xenni ad dd-asen inni isswejden ad hellken di Accur uřa d yinni ittwaɛarrnen ɣar temmurt n Miṣra. Nitni ad sejden i SIDI deg wedrar iqeddsen di Urcalim.”