1 ... “A tawmat d ibabaten, sřem i min d awem ɣa iniɣ x udafeɛ inu.” 2 Umi sřin, aqa issawař akidsen s yiřes n Tɛibranit, qqimen sqaren ɛad ktar. Inna asen: 3 “Necc d ijj n bnadem d Uday, xeřqeɣ-dd di Tarsus di Kilikiya, maca arebbiɣ di tendint-a ɣar iḍaren n Gamaliyal u ttwassřemdeɣ ɛlaḥsab tidett nican n Ccariɛa n řejdud nneɣ. Ceṭṭareɣ x min iǧan n AREBBI am mammec uřa d kenniw marra. ◘22:3 Řex. 5:34; 9:11; 21:39; 2 Kur. 11:22 4 Necc tuɣa ḍeffareɣ Abrid-a s řmewt am carrfeɣ iryazen d temɣarin, ttsellameɣ ten ɣar řeḥbes. ◘22:4 Řex. 8:3; 9:1; 26:9; 1 Kur. 15:9; Gal. 1:13; 1 Tim. 1:13. 5 Arrays n ikehhanen d marra imɣaren n řgens zemmaren ad cehden belli ksiɣ tibratin i tawmat, maḥend ad ruḥeɣ ɣar Dimacq ḥima ad awyeɣ inni din iǧan ɛawed s tcarfin ɣar Urcalim, ḥima ad ṭṭfen lɛiqab.

6 Umi d ayi tuɣa deg webrid uca iwḍeɣ ɣar Dimacq ɣar wezyen n wass, tařɣa xafi s řɣefřet ict n tfawt temɣar zeg ujenna. ◘22:6 1 Kur. 15:8; 2 Kur. 12:2. 7 Wḍiɣ x temmurt, sřiɣ ict n tmijja, teqqar ayi: ‘Cawul, Cawul, mayemmi d ayi tdarrced?’ 8 Arriɣ-dd xas: ‘Min teɛnid Cek, a Sidi?’ Inna ayi: ‘Necc d Yasuɛ, Nnaṣiri, wenni tᵉttdarraced!’ 9 Iryazen nni tuɣa iǧan akidi, ẓrin tafawt, maca war sřin ca i tmijja n Wenni akidi issawařen. ◘22:9 Dan. 10:7. 10 Nniɣ: ‘Min ɣa ggeɣ, a Sidi?’ Inna ayi Siditneɣ: ‘Kkar, traḥed ɣar Dimacq, din ad ac ittwanna x marra min d ac yuran ad tegged!’ 11 Umi dewřeɣ war ttwiřiɣ zi tissiqt n tfawt nni, gewwden ayi inni i tuɣa akidi iǧan zeg ufus, uca ammu i dd-iwḍeɣ ɣar Dimacq.

12 Tuɣa din ijj weryaz, qqaren as Ananiyas. Netta d amsegged ɛlaḥsab Ccariɛa, am mammec tuɣa xas cehhden marra Udayen. ◘22:12 Řex. 9:17. 13 Netta yusa-dd ɣari, inna ayi: ‘A uma Cawul, arzem tiṭṭawin nnec!’ Řexdenni di tsaɛɛet nni ttwarzment tiṭṭawin inu, uca ẓriɣ t. 14 Netta inna ayi: ‘Aqa AREBBI n řejdud nneɣ ixḍar i cek, ḥima ad tessned min ixs Netta, u ḥima ad tẓared Amseggad, ad tesřed tmijja nnes zeg uqemmum nnes. ◘22:14 Řex. 7:52; Rum. 3:26; 1 Bṭ. 3:18; 1 Yḥ. 2:1 15 Cek ad as tiřid d acehhad ɣar marra iwdan s marra min teẓrid u s min tesřid. 16 Iwa řexxu, mayemmi war tezɛimed ɛad? Kkar, ejj ad cek ssɣeḍṣen, ad tᵉttwasizedged zi ddnub nnec am tᵉttřaɣid x Yisem nnes!’

17 Awarni řami dd-ɛeqbeɣ, iwḍeɣ da ɣar Urcalim, uca am tuɣa ttẓaǧiɣ di Zzawect Tameqqrant, 18 ẓriɣ t deg ijj n řewḥiy, inna ayi: ‘Azzeř, teffɣed deɣya zi Urcalim minzi war qebbřen ca cchadet nnec xafi!’ ◘22:18 Mt. 10:14. 19 Nniɣ necc: ‘A Sidi, aqa nitni ssnen belli tuɣa ttḥebbseɣ inni yumnen zzayek, hettkeɣ ten s urekkuḍ di temzidawin, ◘22:19 Řex. 22:4. 20 u řami ttwasizzřen idammen n ucehhad nnec Stifanus, tuɣa beddeɣ akidsen, arḍiɣ x yinni t nɣin u ḥḍiɣ arruḍ n yinni t yarejmen.’ ◘22:20 Řex. 7:58; 8:1. 21 Xenni inna ayi: ‘Ruḥ, minzi ad cek ssekkeɣ ɣar řaggʷaj ḥima ad tbarrḥed L’Injil i řegnus!’ ” ◘22:21 Řex. 9:15; 13:2; Gal. 1:15; 2:8; Afa. 3:8; 1 Tim. 2:7; 2 Tim. 1:11.

22 Tuɣa ttesřan as ař awař-a, xenni kkaren ssgeɛɛden tmijja nsen, qqaren: “Kksem t zi temmurt, minzi am wanita war isdiheǧ ad iddar.” ◘22:22 Řex. 21:36. 23 Am tuɣa sɣuyyun, neṭṭaren arruḍ nsen uca zuzzaran ucař ɣar ujenna. 24 Yumur ukumandar maḥend ad t ssidfen ɣar lqecla, ad t sseqsan am t tthettaken s urekkuḍ ḥima ad zzayes ifhem mayemmi xas sɣuyen ammu. 25 Umi t jebden s tḥezzamin i uhettek s urekkuḍ, inna Bulus i řqebṭan x mya i din ibedden: “Ma iḥeǧeř awem ɛlaḥsab ccariɛa nwem ad thettkem ijj n bnadem d Arumani s urekkuḍ am war xas teḥkimem ɛad?”

26 Umi isřa řqebṭan x mya man aya, iruḥ ɣar ukumandar, inna as: “Min ɣa tegged? Aqa aryaz-a d Arumani!” 27 Iqarreb-dd ɣares ukumandar, inna as: “Ini ayi, ma cek d Arumani?” Yarra-dd xas Bulus: “Wah!” 28 Yarra-dd xas ukumandar, inna: “Necc ṭṭfeɣ řḥeqq-a n umezdaɣ Arumani s ijj n řqedd d ameqqran n tmenyat!” Bulus inna: “Maca necc xeřqeɣ-dd zzayes!” 29 Řexdenni, inni tuɣa nwan ad t hettken s urekkud, jjin t. Akumandar idweř iggʷed, minzi ifhem aqa-t d Arumani u minzi ijja i-t ad t carfen. 30 Tiwecca nnes am tuɣa ixs ad issen tidett min xef t ḍeřmen Wudayen, igga ad fesyen iceddiyyen nnes uca yumur ad ssmunen izeǧifen n ikehhanen d marra Jmaɛet Tameqqrant n imeqqranen nsen uca issehwa-dd Bulus ɣar din, issbedd i-t di řwesṭ nsen.